'അടി തുടങ്ങി', ഐഫോണ് 17 സീരീസിന് ചെക്ക് വച്ച് സാംസങ്; ഗാലക്സി എസ്25 എഫ്ഇ ലോഞ്ച് സെപ്റ്റംബര് 4ന്
Synopsis
സാംസങ് ഗാലക്സി എസ്25 എഫ്ഇ 5ജി സ്മാര്ട്ട്ഫോണിന്റെ ക്യാമറ, ചിപ്, ഡിസ്പ്ലെ, ബാറ്ററി, ഡിസൈന് തുടങ്ങിയ വിവരങ്ങള് ലോഞ്ചിന് മുമ്പായി പുറത്തായി
തിരുവനന്തപുരം: സ്മാര്ട്ട്ഫോണ് പ്രേമികള് കാത്തിരിക്കുന്ന മാസമാണ് സെപ്റ്റംബര്. സെപ്റ്റംബര് 9ന് ആപ്പിളിന്റെ ഐഫോണ് 17 സീരീസ് പുറത്തിറങ്ങും. അതിന് തൊട്ടുമുമ്പായി നാലാം തീയതി മറ്റൊരു ഗാലക്സി ലോഞ്ച് ഇവന്റ് പ്രഖ്യാപിച്ചിരിക്കുകയാണ് സാംസങ് മൊബൈല്സ്. ഗാലക്സിയുടെ ലോഞ്ച് പരിപാടിയില് അവതരിപ്പിക്കപ്പെടുക ഗാലക്സി എസ്25 എഫ്ഇ 5ജി (Galaxy S25 FE 5G) സ്മാര്ട്ട്ഫോണും, ഗാലക്സി ടാബ് എസ്11 ഉം. മറ്റ് സ്മാര്ട്ട്ഫോണ് മോഡലുകളുമായി താരതമ്യം ചെയ്യുമ്പോള് ബജറ്റ്-ഫ്രണ്ട്ലിയായ ഗാലക്സി എഫ്ഇ നിര സാംസങ് അവതരിപ്പിക്കുന്നത് ആപ്പിളിന് ഭീഷണിയായേക്കും. സാംസങ് ഗാലക്സി എസ്25 എഫ്ഇയുടെ പ്രധാന സവിശേഷതകള് പുറത്തുവന്നിരിക്കുകയാണ്.
ഗാലക്സി എസ്25 എഫ്ഇ സ്പെസിഫിക്കേഷനുകള്
കറുപ്പ്, വെളുപ്പ്, വയലറ്റ്, ഐസി ബ്ലൂ എന്നിങ്ങനെയുള്ള നിറങ്ങളിലാവും സാംസങ് ഗാലക്സി എസ്25 എഫ്ഇ വിപണിയിലെത്തുക എന്നാണ് ആന്ഡ്രോയ്ഡ് ഹെഡ്ലൈന്സിന്റെ റിപ്പോര്ട്ട്. ഡിസൈനിലേക്ക് വന്നാല് എസ്25 മോഡലിലെ മറ്റ് ഫോണുകള്ക്ക് ഏതാണ് സമാനമായിരിക്കും ഇതും. ഫ്ലാറ്റ് ഡിസ്പ്ലെയും വശങ്ങളും റിയര് ഭാഗവും, ഇടത് വശത്ത് മുകളിലായി ക്യാമറയും എല്ലാമായി ഡിസൈനില് പുതുമയ്ക്ക് വലിയ സാധ്യതയില്ല. റെന്ഡറുകള് നല്കുന്ന സൂചന അനുസരിച്ച് ഗാലക്സി എസ്25 എഫ്ഇയുടെ ബെസ്സെലില് നേരിയ മാറ്റത്തിന് സാധ്യതയുണ്ട്.
എക്സിനോസ് 2400 ചിപ്സെറ്റില് 8 ജിബി റാം, 256 ജിബി വരെ സ്റ്റോറേജ് സംയോജനത്തോടെയാവും സാംസങ് ഗാലക്സി എസ്25 എഫ്ഇ അവതരിപ്പിക്കപ്പെടുക. 50 എംപി പ്രധാന ക്യാമറ, 12 എംപി അള്ട്രാ-വൈഡ്, 8 എംപി ടെലിഫോട്ടോ (3x) എന്നിവയാണ് റിയര് ഭാഗത്ത് പറയപ്പെടുന്നത്. സെല്ഫിക്കും വീഡിയോ കോളിംഗിനുമായി 12 മെഗാപിക്സല് ക്യാമറയും പ്രതീക്ഷിക്കുന്നു. 4900 എംഎഎച്ചിന്റെ ബാറ്ററിയായിരിക്കും ഗാലക്സി എസ്25 എഫ്ഇയില് വരിക എന്നതാണ് മറ്റൊരു റൂമര്. 45 വാട്സിന്റെ വയേര്ഡ് ചാര്ജിംഗ് സൗകര്യമായിരിക്കും ഫോണില് വരിക. പൊടിയില് നിന്നും ജലത്തില് നിന്നും സുരക്ഷയ്ക്കായി ഐപി28 റേറ്റിംഗ്, 120 ഹെര്ട്സ് റിഫ്രഷ് റേറ്റ് സഹിതം 3.7 ഇഞ്ച് ഡൈനാമിക് അമോല്ഡ് 2എക്സ് ഡിസ്പ്ലെ, കോര്ണിംഗ് ഗോറില്ല ഗ്ലാസ് വിക്ടസ് സുരക്ഷ എന്നിവയും ഗാലക്സി എസ്25 എഫ്ഇ ഫോണിനുണ്ടാകും.
ഗാലക്സി എസ്25 എഫ്ഇയ്ക്ക് ഇന്ത്യയില് എത്ര രൂപയാകും?
ഗാലക്സി എസ്24 എഫ്ഇ 59,999 രൂപയിലായിരുന്നു ഇന്ത്യയില് അവതരിപ്പിച്ചിരുന്നത്. 256 ജിബി വേരിയന്റിന്റെ റിടെയ്ല് വില 65,999 രൂപയും. ഗാലക്സി എസ്25 നിലവില് 68,999 രൂപയിലാണ് ആരംഭിക്കുന്നത് എന്നതിനാല് ഗാലക്സി എസ്25 എഫ്ഇയുടെ വിലയും മുന്ഗാമിയുടെ അതേ നിലയില് തന്നെയായിരിക്കാനാണ് സാധ്യത. അങ്ങനെയെങ്കില് 59,999 രൂപയായിരിക്കും സാംസങ് ഗാലക്സി എസ്25 എഫ്ഇ ബേസ് മോഡലിന് ഇന്ത്യയില് വില.