ബോട്ട് ഹെഡ്‍ഫോൺ വാങ്ങിയാൽ നാല് മാസം സ്‍പോട്ടിഫൈ പ്രീമിയം സൗജന്യം! പുതിയ ഓഫർ പ്രഖ്യാപിച്ചു

പ്രമുഖ ഓഡിയോ ബ്രാൻഡായ ബോട്ടും സംഗീത സ്ട്രീമിങ് പ്ലാറ്റ്‌ഫോമായ സ്‌പോട്ടിഫൈയും പുതിയ പങ്കാളിത്തം പ്രഖ്യാപിച്ചു. ഇതിന്റെ ഭാഗമായി, ബോട്ടിന്റെ തിരഞ്ഞെടുത്ത ഉൽപ്പന്നങ്ങൾ വാങ്ങുന്നവർക്ക് നാല് മാസത്തെ സ്‌പോട്ടിഫൈ പ്രീമിയം സബ്‌സ്‌ക്രിപ്ഷൻ സൗജന്യമായി ലഭിക്കും. ഹാർഡ്‌വെയറിനൊപ്പം ഡിജിറ്റൽ സേവനങ്ങൾ നൽകുക എന്നതാണ് ഈ സഹകരണത്തിന്റെ ലക്ഷ്യം.

രാജ്യത്തെ പ്രമുഖ ഉപഭോക്തൃ ഓഡിയോ ബ്രാൻഡായ ബോട്ട് സംഗീത സ്ട്രീമിങ് പ്ലാറ്റ്ഫോമായ സ്‌പോട്ടിഫൈയുമായി പുതിയ പങ്കാളിത്തം പ്രഖ്യാപിച്ചു. ഇതിന്റെ ഭാഗമായി ഇന്ത്യയിൽ വിൽക്കുന്ന ബോട്ടിന്റെ തിരഞ്ഞെടുത്ത ഓഡിയോ ഉൽപ്പന്നങ്ങൾ വാങ്ങുന്ന ഉപഭോക്താക്കൾക്ക് നാല് മാസത്തെ സ്‌പോട്ടിഫൈ പ്രീമിയം സബ്‌സ്‌ക്രിപ്ഷൻ ലഭ്യമാക്കും. ഹാർഡ്‌വെയർ ഉൽപ്പന്നങ്ങൾക്കൊപ്പം ഡിജിറ്റൽ സേവനങ്ങളും ലഭ്യമാക്കുകയെന്ന ലക്ഷ്യത്തോടെയാണ് പുതിയ സഹകരണം.

ആദ്യ പന്ത്രണ്ട് ആഴ്ച സൗജന്യം

കമ്പനിയുടെ അറിയിപ്പുപ്രകാരം, ഓഫറിന് അർഹമായ ബോട്ട് ഉൽപ്പന്നങ്ങൾ വാങ്ങുന്നവർക്ക് നാല് മാസത്തെ സ്‌പോട്ടിഫൈ പ്രീമിയം മെമ്പർഷിപ്പാണ് ലഭിക്കുക. ഇതിൽ ആദ്യ പന്ത്രണ്ട് ആഴ്ചയുടെ സേവനം അധിക ചെലവില്ലാതെ ഉപയോഗിക്കാനാകും. പരസ്യങ്ങളില്ലാത്ത സംഗീതാസ്വാദനം, ഓഫ്‌ലൈൻ ഡൗൺലോഡ് സൗകര്യം, മെച്ചപ്പെട്ട ശബ്ദ നിലവാരത്തിൽ സംഗീതം കേൾക്കാനുള്ള അവസരം എന്നിവ പ്രീമിയം അംഗത്വത്തിന്റെ പ്രധാന സവിശേഷതകളാണ്.

പുതിയ ഡിജിറ്റൽ പ്രചാരണവുമായി കമ്പനികൾ

പങ്കാളിത്തത്തിന്റെ ഭാഗമായി ‘ഹാഫ് ദ എക്‌സ്പീരിയൻസ്’ എന്ന പേരിൽ പുതിയ ഡിജിറ്റൽ പ്രചാരണവും ബോട്ടും സ്‌പോട്ടിഫൈയും അവതരിപ്പിച്ചു. സംഗീതജ്ഞനായ ചാർ ദിവാരി അഭിനയിക്കുന്ന പരസ്യചിത്രത്തിൽ, ഇടവേളകളാൽ തടസപ്പെടുന്ന സംഗീതാനുഭവവും തുടർന്ന് പ്രീമിയം സേവനത്തിലൂടെ ലഭിക്കുന്ന തടസമില്ലാത്ത ആസ്വാദനവും ദൃശ്യവൽക്കരിച്ചിരിക്കുന്നു. പ്രീമിയം സേവനം നൽകുന്ന മെച്ചപ്പെട്ട അനുഭവം പ്രേക്ഷകരിലേക്ക് എത്തിക്കുകയാണ് പ്രചാരണത്തിന്റെ ലക്ഷ്യം.

ഓഫറിന് അർഹമായ ഉൽപ്പന്നങ്ങളുടെ പട്ടിക പുറത്തുവിട്ടിട്ടില്ല

അതേസമയം സ്‌പോട്ടിഫൈ പ്രീമിയം ഓഫർ ലഭ്യമാകുന്ന ബോട്ട് ഉൽപ്പന്നങ്ങളുടെ പൂർണ പട്ടിക കമ്പനി ഇതുവരെ പുറത്തുവിട്ടിട്ടില്ല. അതുപോലെ തന്നെ, ഈ പ്രചാരണ ഓഫർ എത്രകാലം തുടരുമെന്ന കാര്യത്തിലും ഔദ്യോഗിക വിശദീകരണം നൽകിയിട്ടില്ല.

ബോട്ടിന്റെ പുതിയ ഉൽപ്പന്നങ്ങളും ശ്രദ്ധയിൽ

കഴിഞ്ഞ മാസം ബോട്ട് ഇന്ത്യൻ വിപണിയിൽ നിരവധി പുതിയ ഉൽപ്പന്നങ്ങൾ അവതരിപ്പിച്ചിരുന്നു. 5999 രൂപ വിലയിൽ പുറത്തിറക്കിയ നിർവാണ യൂട്ടോപ്യ ടു എഎൻസി ഹെഡ്‌ഫോണിൽ അഡാപ്റ്റീവ് ഹൈബ്രിഡ് നോയിസ് ക്യാൻസലേഷൻ, ഉയർന്ന നിലവാരത്തിലുള്ള ശബ്‍ദ പിന്തുണ, ത്രിമാന സ്പേഷ്യൽ ഓഡിയോ, 80 മണിക്കൂർ വരെ ബാറ്ററി ശേഷി തുടങ്ങിയ സവിശേഷതകളുണ്ട്. അതോടൊപ്പം,1499 രൂപ വിലയിൽ സെയിലർ പ്ലേ ഹെഡ്‌ഫോണും കമ്പനി അവതരിപ്പിച്ചിരുന്നു. 60 മണിക്കൂർ വരെ ബാറ്ററി ബാക്കപ്പ്, 40 മില്ലീമീറ്റർ ഡൈനാമിക് ഡ്രൈവർ, ഇൻബിൽറ്റ് മൈക്രോഫോൺ, ബ്ലൂടൂത്ത് കണക്റ്റിവിറ്റി എന്നിവയാണ് ഈ മോഡലിന്റെ പ്രധാന സവിശേഷതകൾ.