ഹോണർ 600 സീരീസ് എത്തുന്നു; 200എംപി ക്യാമറയും 7000 എംഎഎച്ച് ബാറ്ററിയുമായി പുതിയ സ്‍മാർട്ട്ഫോണുകൾ

പ്രമുഖ ടെക് കമ്പനിയായ ഹോണർ, 600 സീരീസിലെ പുതിയ സ്മാർട്ട്ഫോണുകളായ ഹോണർ 600, 600 പ്രോ എന്നിവ പുറത്തിറക്കാൻ ഒരുങ്ങുന്നു. 200-മെഗാപിക്സൽ പ്രൈമറി ക്യാമറ, 7,000 എംഎഎച്ച് ബാറ്ററി, സ്നാപ്ഡ്രാഗൺ പ്രോസസ്സറുകൾ എന്നിവയാണ് ഈ ഫോണുകളുടെ പ്രധാന ആകർഷണങ്ങൾ. 

പ്രമുഖ ടെക് കമ്പനിയായ ഹോണറിന്‍റെ ഹോണർ 600 സീരീസിലെ പുതിയ സ്‍മാർട്ട്ഫോണുകളായ ഹോണർ 600 പ്രോയും ഹോണർ 600 ഉം ആഗോള വിപണിയിൽ പുറത്തിറങ്ങാൻ ഒരുങ്ങുന്നു. ഈ മാസം അവസാനം തന്നെ ഈ രണ്ട് മോഡലുകളും അവതരിപ്പിക്കുമെന്ന് ഹോണർ സ്ഥിരീകരിച്ചിട്ടുണ്ട്. ലോഞ്ചിന് മുമ്പ് തന്നെ, കമ്പനിയുടെയും ഔദ്യോഗിക ഓൺലൈൻ സ്റ്റോറിലൂടെയും ഈ ഫോണുകളുടെ പ്രധാന സവിശേഷതകൾ പുറത്തുവന്നിരിക്കുകയാണ്.

ഹോണർ 600 പ്രോ സവിശേഷതകള്‍

ലഭ്യമായ വിവരങ്ങൾ പ്രകാരം, ഹോണർ 600 പ്രോ മോഡൽ ക്വാൽക്കം സ്‍നാപ്‍ഡ്രാഗൺ 8 എലൈറ്റ് ചിപ്സെറ്റിന്റെ ശക്തിയോടെ പ്രവർത്തിക്കും. അതേസമയം, സാധാരണ ഹോണർ 600 മോഡൽ സ്‍നാപ്‍ ഡ്രാഗൺ 7 ജെൻ 4 SoC ഉപയോഗിച്ചായിരിക്കും എത്തുക. ഇരു സ്മാർട്ട്ഫോണുകളും 7,000 എംഎഎച്ച് ശേഷിയുള്ള വൻ ബാറ്ററിയോടുകൂടി വരും. കൂടാതെ, 80 വാട്‌സ് വയർഡ് ഫാസ്റ്റ് ചാർജിംഗിനും 27 വാട്‌സ് റിവേഴ്‌സ് ചാർജിംഗിനും പിന്തുണ ഉണ്ടായിരിക്കും.

ഹോണർ 600 പ്രോ മോഡലിന് മാത്രമായി 50 വാട്‌സ് വയർലെസ് ഫാസ്റ്റ് ചാർജിംഗ് സൗകര്യം നൽകുന്നു. ഇരു ഫോണുകളും 7.8 എംഎം ഭാരം മാത്രമുള്ള സ്ലിം ഡിസൈനിലാണ് ഒരുക്കിയിരിക്കുന്നത്. ഹോണർ 600 പ്രോയ്ക്ക് ഏകദേശം 200 ഗ്രാം ഭാരം ലഭിക്കുമ്പോൾ ഹോണർ 600 ന് 190 ഗ്രാം മാത്രമാണ് ഉള്ളത്. മെറ്റൽ ഫ്രെയിംയും മട്ട് ഫിനിഷും ഉൾപ്പെടുന്ന പ്രീമിയം ഡിസൈൻ ഫോണുകൾക്ക് നൽകപ്പെട്ടിട്ടുണ്ട്. കൂടാതെ, 0.98 എംഎം ബെസലുകളുള്ള ഡിസ്പ്ലേയും ഇവയിൽ ഉൾപ്പെടുത്തിയിരിക്കുന്നു.

ഡസ്റ്റ്, വാട്ടർ റെസിസ്റ്റൻസിനായി ഐപി68, ഐപി69, ഐപി69കെ സർട്ടിഫിക്കേഷനുകളും ഈ സീരീസിന് ലഭ്യമാണ്. ക്യാമറ വിഭാഗത്തിൽ ഹോണർ 600 പ്രോ മുന്നിൽ നിൽക്കുന്നു. 200 മെഗാപിക്സൽ പ്രൈമറി ക്യാമറ, 50എംപി പെരിസ്കോപ്പ് ടെലിഫോട്ടോ ലെൻസ് (3.5x സൂം), 12എംപി അൾട്രാവൈഡ് ലെൻസ് എന്നിവയോടെ ട്രിപ്പിൾ ക്യാമറ സജ്ജീകരണമാണ് ഇതിൽ ഉള്ളത്.

200എംപി പ്രൈമറി ക്യാമറ, 50എംപി സെല്‍ഫി ക്യാമറ

അതേസമയം, ഹോണർ 600 മോഡലിൽ 200എംപി പ്രൈമറി ക്യാമറയും 12എംപി അൾട്രാവൈഡ് ക്യാമറയും ഉൾപ്പെടുന്ന ഡ്യുവൽ ക്യാമറ സംവിധാനമാണ് നൽകിയിരിക്കുന്നത്. ടെലിഫോട്ടോ ലെൻസ് ഈ മോഡലിൽ ഉണ്ടായിരിക്കില്ല. ഇരു ഫോണുകളിലും 50എംപി ഫ്രണ്ട് ക്യാമറയും ഉൾപ്പെടുത്തിയിട്ടുണ്ട്.

ഹോണർ 600 സീരീസ് ഏപ്രിൽ 23ന് ആഗോള വിപണിയിൽ അവതരിപ്പിക്കും. ബ്ലാക്ക്, ഗോൾഡൻ വൈറ്റ്, ഓറഞ്ച് ബി എന്നീ മൂന്ന് നിറങ്ങളിൽ ഫോണുകൾ ലഭ്യമാകും. പുതിയ സവിശേഷതകളോടെ എത്തുന്ന ഈ സീരീസ് വിപണിയിൽ ശ്രദ്ധേയമായ മത്സരം സൃഷ്‍ടിക്കുമെന്ന് പ്രതീക്ഷിക്കുന്നു.