ചരിത്രത്തിലെ ആദ്യ വൈഡ് ഫോൾഡബിൾ ഫോൺ അവതരിപ്പിച്ച് വാവെയ്; ആപ്പിളിനും സാംസങ്ങിനും പുതിയ വെല്ലുവിളി

സാധാരണ ഫോൾഡബിൾ ഫോണുകൾ തുറക്കുമ്പോൾ ഏകദേശം സ്ക്വയർ രൂപത്തിലുള്ള സ്ക്രീനായി മാറുമ്പോൾ, Pura X Max കൂടുതൽ വീതിയേറിയ സ്ക്രീൻ നൽകുന്ന രീതിയിലാണ് രൂപകൽപ്പന ചെയ്‌തിരിക്കുന്നത്.

ബെയ്‌ജിംഗ്: ആഗോള സ്‍മാർട്ട്ഫോൺ വിപണിയിൽ പുതിയ മാറ്റങ്ങൾക്ക് തുടക്കമിട്ട്, ചൈനീസ് ടെക് ഭീമനായ വാവെയ് ലോകത്തിലെ ആദ്യത്തെ 'വൈഡ്' ഫോൾഡബിൾ ഫോൺ അവതരിപ്പിച്ചു. ആപ്പിളിനെയും സാംസങ്ങിനെയും മറികടന്നാണ് വാവെയ് ഈ പുതിയ നേട്ടം കൈവരിച്ചത്. Pura X Max എന്ന പേരിൽ പുറത്തിറക്കിയ ഈ ഫോൺ, പരമ്പരാഗത ഫോൾഡബിൾ ഫോണുകളിൽ നിന്ന് വ്യത്യസ്‌തമായ ഒരു ഡിസൈൻ കൊണ്ടാണ് ശ്രദ്ധ നേടുന്നത്.

വൈഡ് ഫോള്‍ഡബിള്‍ Pura X Max

സാധാരണ ഫോൾഡബിൾ ഫോണുകൾ തുറക്കുമ്പോൾ ഏകദേശം സ്ക്വയർ രൂപത്തിലുള്ള സ്ക്രീനായി മാറുമ്പോൾ, Pura X Max കൂടുതൽ വീതിയേറിയ സ്ക്രീൻ നൽകുന്ന രീതിയിലാണ് രൂപകൽപ്പന ചെയ്‌തിരിക്കുന്നത്. ചൈനീസ് സോഷ്യൽ മീഡിയ പ്ലാറ്റ്ഫോമായ വെയിബോയിൽ വാവെയ് പങ്കുവച്ച ചിത്രങ്ങൾ പ്രകാരം, ഈ ഉപകരണം ഐപാഡ് മിനി പോലെയുള്ള വീതിയേറിയ രൂപത്തില്‍ കാണപ്പെടുന്നു. ഇത് ഉപയോക്താക്കൾക്ക് കൂടുതൽ സ്വാഭാവികമായ വീഡിയോ അനുഭവവും മെച്ചപ്പെട്ട വായനാനുഭവവും നൽകുമെന്നാണ് വിലയിരുത്തൽ.

വാവെയ് ഇതിനെ “ഹൊറിസോണ്ടൽ വൈഡ് ഫോൾഡബിൾ” സ്‌മാര്‍ട്ട്‌ഫോൺ എന്ന് വിശേഷിപ്പിക്കുന്നു. മീഡിയ കോണ്ടന്‍റുകൾ കാണുന്നതിനും മൾട്ടിടാസ്‍കിംഗിനും അനുയോജ്യമായ 4:3 സ്‌ക്രീന്‍ അനുപാതമാണ് ഇതിന്‍റെ പ്രധാന സവിശേഷത. വീഡിയോ കാണുമ്പോൾ സാധാരണ കാണുന്ന കറുത്ത ബാർ പ്രശ്‌നങ്ങൾ കുറയുന്നതും ഇതിന്‍റെ ഗുണമാണ്. എങ്കിലും ഈ വീതിയേറിയ ഡിസൈൻ ഫോണിന്‍റെ കൈകാര്യം ചെയ്യൽ കുറച്ച് ബുദ്ധിമുട്ടാക്കാൻ ഇടയാക്കാം.

സാംസങ്ങും സമാന പരീക്ഷണത്തിന്

Pura X Max ഫോണിൽ ട്രിപ്പിൾ റിയർ ക്യാമറ സജ്ജീകരണവും കുറഞ്ഞ സ്ക്രീൻ ക്രീസും മൂന്ന് നിറ ഓപ്ഷനുകളും (വെള്ള, ഓറഞ്ച്, പർപ്പിൾ) ഉൾപ്പെടുത്തിയിട്ടുണ്ട്. ഉപകരണത്തിന്‍റെ മുഴുവൻ സാങ്കേതിക സവിശേഷതകൾ വാവെയ് ഏപ്രിൽ 21-ന് ഔദ്യോഗികമായി പ്രഖ്യാപിക്കുമെന്ന് അറിയിച്ചിട്ടുണ്ട്. ഇതിനകം തന്നെ ചൈനയിൽ പ്രീ-ഓർഡറുകൾ ആരംഭിച്ചിരിക്കുകയാണ്. ഇതിനിടെ, ആപ്പിളും സാംസങ്ങും സമാനമായ ഫോം ഫാക്‌ടറിലുള്ള ഫോൾഡബിൾ ഫോണുകൾ പുറത്തിറക്കാൻ ഒരുങ്ങുന്നതായി റിപ്പോർട്ടുകൾ സൂചിപ്പിക്കുന്നു. സാംസങ് ജൂലൈയിൽ പുതിയ മോഡൽ അവതരിപ്പിക്കാനാണ് സാധ്യത, ആപ്പിളിന്‍റെ ആദ്യ ഫോൾഡബിൾ ഫോൺ സെപ്റ്റംബറിൽ എത്തുമെന്നാണ് പ്രതീക്ഷ.

അതേസമയം, സ്‍മാർട്ട്‌ഫോൺ വിപണിയിൽ മത്സരം നിറഞ്ഞുനിൽക്കുന്ന സാഹചര്യത്തിൽ, പുതിയ ഡിസൈനുകളും ഉയർന്ന നിലവാരമുള്ള ഡിവൈസുകളും പുറത്തിറക്കി ഉപഭോക്താക്കളെ ആകർഷിക്കാൻ കമ്പനികൾ ശ്രമിക്കുന്നതായി വ്യവസായ വിദഗ്‌ധർ വിലയിരുത്തുന്നു. വാവെ‌യ്‌യുടെ ഈ നീക്കം ഭാവിയിലെ സ്‌മാർട്ട്ഫോൺ ഡിസൈനുകൾക്ക് പുതിയ ദിശ നൽകുമെന്നാണ് പ്രതീക്ഷിക്കുന്നത്.