ഇന്ത്യയിൽ സ്‍മാർട്ട്ഫോൺ വിൽപ്പനയിൽ 20% ഇടിവ്; ഏറ്റവും വലിയ തിരിച്ചടി ബജറ്റ് ഫോണുകൾക്ക്, പ്രീമിയം ഫോണുകൾക്ക് നേട്ടം

Published : Nov 20, 2026, 01:15 PM IST
Budget 5G Smartphones

Synopsis

ഇന്ത്യൻ സ്‌‍മാർട്ട്ഫോൺ വിപണിയിൽ ബജറ്റ് ഫോണുകളുടെ വിൽപ്പന കുറയുമ്പോൾ പ്രീമിയം ഫോണുകൾക്ക് ആവശ്യക്കാർ ഏറുന്നു. മെമ്മറി ചിപ്പുകളുടെ ക്ഷാമം വിപണിയെ പ്രതികൂലമായി ബാധിച്ചിട്ടുണ്ട്.

ഇന്ത്യൻ സ്‌‍മാർട്ട്ഫോൺ വിപണിയിൽ വിൽപ്പന ഇടിയുന്നു. ആഗോളതലത്തിൽ തുടരുന്ന മെമ്മറി ചിപ്പുകളുടെ ക്ഷാമം വിപണിയെ പ്രതികൂലമായി ബാധിച്ചതായാണ് റിപ്പോർട്ട്. 2026 ജൂലൈ മുതൽ സെപ്റ്റംബർ വരെയുള്ള മൂന്നാം പാദത്തിൽ ഇന്ത്യയിലെ സ്മാർട്ട്ഫോൺ കയറ്റുമതിയിൽ കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 20% ഇടിവുണ്ടായതായി സൈബർ മീഡിയ റിസർച്ചിന്റെ (സിഎംആർ) റിപ്പോർട്ട് വ്യക്തമാക്കുന്നു. എന്നാൽ വിപണിയിലെ എല്ലാ വിഭാഗങ്ങളെയും പ്രതിസന്ധി ഒരുപോലെ ബാധിച്ചിട്ടില്ല. കുറഞ്ഞ വിലയുള്ള സ്മാർട്ട്ഫോണുകളുടെ വിൽപ്പനയിലാണ് ഏറ്റവും വലിയ ഇടിവ് രേഖപ്പെടുത്തിയത്. അതേസമയം, 25,000 രൂപയ്ക്ക് മുകളിൽ വിലയുള്ള പ്രീമിയം സ്മാർട്ട്ഫോണുകൾക്ക് ആവശ്യക്കാർ വർധിക്കുന്നതായും റിപ്പോർട്ട് ചൂണ്ടിക്കാട്ടുന്നു.

ബജറ്റ് ഫോണുകൾക്ക് വൻ തിരിച്ചടി

7,000 രൂപയിൽ താഴെ വിലയുള്ള സ്മാർട്ട്ഫോണുകളുടെ വിഭാഗത്തിൽ 2026ലെ മൂന്നാം പാദത്തിൽ 94% ഇടിവാണ് രേഖപ്പെടുത്തിയത്. 7,000 രൂപ മുതൽ 24,999 രൂപ വരെ വിലയുള്ള വാല്യു ഫോർ മണി വിഭാഗത്തിലും 42% ഇടിവുണ്ടായി. മെമ്മറി ചിപ്പുകളുടെയും മറ്റ് ഘടകങ്ങളുടെയും വില വർധിച്ചതോടെ സ്മാർട്ട്ഫോണുകളുടെ വിലയും ഉയർന്നതാണ് ഇതിന് പ്രധാന കാരണം. വിലക്കുറവുള്ള ഫോണുകൾ വാങ്ങാൻ ആഗ്രഹിക്കുന്ന ഉപഭോക്താക്കൾക്ക് പുതിയ ഫോണുകളിലേക്ക് മാറുന്നത് കൂടുതൽ ചെലവേറിയതായി. ഇതോടെ നിലവിലുള്ള ഫോണുകൾ കൂടുതൽ കാലം ഉപയോഗിക്കാനാണ് പലരും താൽപ്പര്യപ്പെടുന്നത്.

പ്രമുഖ ബ്രാൻഡുകൾക്കും തിരിച്ചടി

വിപണിയിലെ മാന്ദ്യം പ്രമുഖ സ്മാർട്ട്ഫോൺ ബ്രാൻഡുകളെയും ബാധിച്ചിട്ടുണ്ട്. വിവോയുടെ കയറ്റുമതിയിൽ 25% ഇടിവുണ്ടായി. ഓപ്പോയ്ക്കും സമാനമായ തിരിച്ചടിയാണ് നേരിട്ടത്. ഷവോമിയുടെയും പോക്കോയുടെയും കയറ്റുമതിയിൽ 28% കുറവുണ്ടായി. അതേസമയം, ഇന്ത്യയിലെ ഏറ്റവും വലിയ സ്മാർട്ട്ഫോൺ ബ്രാൻഡായി തുടരുന്ന സാംസങ്ങിന്റെ കയറ്റുമതിയിലും 8% ഇടിവ് രേഖപ്പെടുത്തി. 17% വിപണി വിഹിതവുമായാണ് സാംസങ് ഒന്നാം സ്ഥാനം നിലനിർത്തിയത്.

പ്രീമിയം സ്മാർട്ട്ഫോണുകൾക്ക് ആവശ്യക്കാർ കൂടി

വില കുറഞ്ഞ ഫോണുകളുടെ വിപണി തളരുമ്പോഴും പ്രീമിയം വിഭാഗത്തിൽ വളർച്ച തുടരുകയാണ്. 25,000 രൂപ മുതൽ 49,000 രൂപ വരെ വിലയുള്ള സ്മാർട്ട്ഫോണുകളുടെ വിൽപ്പനയിൽ 38% വളർച്ച രേഖപ്പെടുത്തി. 50,000 രൂപ മുതൽ 1 ലക്ഷം രൂപ വരെ വിലയുള്ള സൂപ്പർ പ്രീമിയം വിഭാഗത്തിലും 32% വളർച്ചയുണ്ടായി. മികച്ച പ്രകടനം, നൂതന സവിശേഷതകൾ, നിർമിത ബുദ്ധി അധിഷ്ഠിത സംവിധാനങ്ങൾ എന്നിവയുള്ള ഫോണുകളിലേക്ക് ഉപഭോക്താക്കൾ കൂടുതൽ ശ്രദ്ധ തിരിക്കുന്നതായാണ് ഈ കണക്കുകൾ സൂചിപ്പിക്കുന്നത്.

ആപ്പിളിനും വൺപ്ലസിനും നേട്ടം

ഇന്ത്യൻ സ്മാർട്ട്ഫോൺ വിപണിയിൽ 9% വിഹിതമാണ് ആപ്പിളിനുള്ളത്. ഐഫോൺ 17 ശ്രേണിയാണ് കമ്പനിയുടെ കയറ്റുമതിയിൽ പ്രധാന പങ്കുവഹിച്ചത്. ആപ്പിളിന്റെ ആകെ കയറ്റുമതിയുടെ 53% ഐഫോൺ 17 ശ്രേണിയിൽ നിന്നായിരുന്നു. വൺപ്ലസും മികച്ച വളർച്ച രേഖപ്പെടുത്തി. കമ്പനിയുടെ മൊത്തം കയറ്റുമതിയിൽ 27% വർധനയുണ്ടായി. 20,000 രൂപയിൽ താഴെ വിലയുള്ള വിഭാഗത്തിൽ വൺപ്ലസിന്റെ കയറ്റുമതി 500% ഉയർന്നു. എന്നാൽ താരതമ്യേന ചെറിയ വിൽപ്പന അടിത്തറയിൽ നിന്നുള്ള വളർച്ചയാണിതെന്നും ശ്രദ്ധിക്കണം.

അതേസമയം, വിപണിയിലെ താരതമ്യേന പുതിയ ബ്രാൻഡായ എഐ പ്ലസും ശ്രദ്ധേയമായ നേട്ടമുണ്ടാക്കി. കമ്പനിയുടെ കയറ്റുമതിയിൽ വാർഷികാടിസ്ഥാനത്തിൽ 247% വളർച്ചയാണ് രേഖപ്പെടുത്തിയത്. മൊത്തത്തിൽ, ഇന്ത്യൻ സ്മാർട്ട്ഫോൺ വിപണിയിൽ ഉപഭോക്താക്കളുടെ വാങ്ങൽ രീതിയിൽ മാറ്റം സംഭവിക്കുന്നതായാണ് റിപ്പോർട്ട് വ്യക്തമാക്കുന്നത്. വില കുറഞ്ഞ ഫോണുകളുടെ വിൽപ്പന കുറയുമ്പോൾ കൂടുതൽ പണം ചെലവഴിച്ച് മികച്ച ഫോണുകൾ വാങ്ങാൻ തയ്യാറുള്ളവരുടെ എണ്ണം വർധിക്കുകയാണ്.

PREV
Read more Articles on
click me!

Recommended Stories

വിവോ X500 സീരീസ് ഇന്ത്യയിലേക്ക്: പുതിയ രഹസ്യങ്ങളെന്തൊക്കെ?
ആപ്പിൾ ഐഫോൺ ഡ്യൂവിൽ വരുന്നു സുരക്ഷാ മാറ്റം