ഐഫോൺ 16-ന് വൻ വിലക്കുറവ്; വാങ്ങാൻ ഇതാണോ മികച്ച സമയം?

ഫ്ലിപ്പ്കാർട്ടിൽ ഐഫോൺ 16-ന് 20,000 രൂപ വരെ വിലക്കുറവ് പ്രഖ്യാപിച്ചു. എച്ച്ഡിഎഫ്സി ബാങ്ക് കാർഡ് ഓഫർ കൂടി ചേരുമ്പോൾ 59,900 രൂപയ്ക്ക് ഫോൺ സ്വന്തമാക്കാം. എന്നാൽ, കൂടുതൽ മികച്ച ഫീച്ചറുകളോടെ എത്തുന്ന ഐഫോൺ 17-നായി കാത്തിരിക്കണോ അതോ ഈ ഓഫർ പ്രയോജനപ്പെടുത്തണോ എന്ന ചർച്ചയും സജീവമാണ്.

ആപ്പിളിന്റെ ജനപ്രിയ സ്‍മാർട്ട്ഫോണായ ഐഫോൺ 16 ഇന്ത്യയിൽ ഇതുവരെ ലഭിച്ചിട്ടില്ലാത്ത ഏറ്റവും കുറഞ്ഞ വിലയിൽ ലഭ്യമായിരിക്കുകയാണ്. ഫ്ലിപ്‍കാർട്ടിന്റെ പ്രത്യേക ഓഫറിലൂടെ ഉപഭോക്താക്കൾക്ക് 20,000 രൂപ വരെ ലാഭിക്കാൻ കഴിയുമെന്ന് റിപ്പോർട്ടുകൾ സൂചിപ്പിക്കുന്നു. ആപ്പിളിന്റെ പ്രീമിയം സ്‍മാർട്ട്ഫോൺ സ്വന്തമാക്കാൻ ആഗ്രഹിക്കുന്നവർക്കായി ഈ ഓഫർ മികച്ച അവസരമായാണ് വിലയിരുത്തപ്പെടുന്നത്.

79,900 രൂപ പ്രാരംഭ വിലയിൽ ഇന്ത്യയിൽ അവതരിപ്പിച്ച ഐഫോൺ 16 നിലവിൽ ഫ്ലിപ്‍കാർട്ടിൽ 63,900 രൂപയ്ക്കാണ് വിൽപ്പനയ്ക്കുള്ളത്. ഇതോടെ ഉപഭോക്താക്കൾക്ക് നേരിട്ട് 16,000 രൂപയുടെ വിലക്കുറവ് ലഭിക്കുന്നു. പ്രത്യേക നിബന്ധനകളൊന്നുമില്ലാതെ ഈ ഓഫർ പ്രയോജനപ്പെടുത്താനാകുമെന്നതും ശ്രദ്ധേയമാണ്.

ഇതുകൂടാതെ, എച്ച്ഡിഎഫ്സി ബാങ്ക് ക്രെഡിറ്റ് കാർഡ് ഉപയോഗിച്ച് വാങ്ങുന്നവർക്ക് 4,000 രൂപയുടെ അധിക ഇൻസ്റ്റന്റ് ഡിസ്കൗണ്ടും ലഭിക്കും. ഈ ഓഫർ കൂടി പ്രയോഗിച്ചാൽ ഐഫോൺ 16ന്റെ വില 59,900 രൂപയായി കുറയും. അതായത്, ലോഞ്ച് വിലയുമായി താരതമ്യം ചെയ്യുമ്പോൾ ആകെ 20,000 രൂപയുടെ നേട്ടമാണ് ഉപഭോക്താക്കൾക്ക് ലഭിക്കുന്നത്.

അതേസമയം, പുതിയ ഫോൺ വാങ്ങാൻ ആലോചിക്കുന്നവർക്ക് ഐഫോൺ 16 മതിയോ, അല്ലെങ്കിൽ ഐഫോൺ 17 തിരഞ്ഞെടുക്കണമോയെന്ന ചർച്ചയും സജീവമാണ്. ഐഫോൺ 17 കൂടുതൽ വലിയ 6.3 ഇഞ്ച് ഡിസ്‌പ്ലേ, 120Hz പ്രോമോഷൻ സപ്പോർട്ട്, എ19 ചിപ്പ്, 48 മെഗാപിക്സൽ ഡ്യുവൽ ഫ്യൂഷൻ ക്യാമറ സംവിധാനം, മെച്ചപ്പെട്ട ഫ്രണ്ട് ക്യാമറ തുടങ്ങിയ നിരവധി അപ്ഗ്രേഡുകളോടെയാണ് എത്തുന്നത്. ദീർഘകാല ഉപയോഗം ലക്ഷ്യമിടുന്നവർക്ക് ഐഫോൺ 17 കൂടുതൽ മൂല്യമുള്ള തിരഞ്ഞെടുപ്പ് ആയിരിക്കാം എന്നാണ് വിദഗ്ധരുടെ വിലയിരുത്തൽ. പുതിയ ഹാർഡ്‌വെയറും കൂടുതൽ കാലം സോഫ്റ്റ്‌വെയർ അപ്ഡേറ്റുകളും ലഭിക്കുമെന്നതാണ് പ്രധാന കാരണം.

അതേസമയം, പരിമിത ബജറ്റിൽ മികച്ച ഐഫോൺ അനുഭവം ആഗ്രഹിക്കുന്നവർക്ക് ഐഫോൺ 16 ഇപ്പോഴും മികച്ച തിരഞ്ഞെടുപ്പായി തുടരുന്നു. നിലവിലെ വിലക്കുറവോടെ ഇത് കൂടുതൽ ആകർഷകമായ ഓപ്ഷനായി മാറിയിട്ടുണ്ട്.

ഐഫോൺ 18 പുറത്തിറങ്ങുന്നതുവരെ കാത്തിരിക്കണമോയെന്ന ചോദ്യത്തിനും വ്യക്തമായ ഉത്തരമില്ല. ടെക്ക് വ്യവസായ രംഗത്തെ അഭ്യൂഹങ്ങൾ പ്രകാരം സാധാരണ ഐഫോൺ 18 മോഡലിന്റെ അവതരണം 2027 മാർച്ചിലേക്ക് നീളാൻ സാധ്യതയുണ്ടെന്നാണ് സൂചന. അതിനാൽ പുതിയ ഫോൺ വാങ്ങാൻ ഉദ്ദേശിക്കുന്നവർക്ക് നിലവിലെ ഓഫർ ഗൗരവമായി പരിഗണിക്കാവുന്നതാണ്.