ഐഫോൺ 18 പ്രോ മാക്സ്: കനം കുറയില്ല, കരുത്ത് കൂടുമോ? കൂടുതൽ വിവരങ്ങൾ ചോ‍ർന്നു

ആപ്പിളിന്റെ അടുത്ത തലമുറ ഐഫോൺ 18 പ്രോ മാക്സിനെക്കുറിച്ചുള്ള പുതിയ ലീക്കുകൾ പുറത്തുവന്നു. ഡിസൈനിൽ കാര്യമായ മാറ്റങ്ങൾ പ്രതീക്ഷിക്കേണ്ടതില്ലെന്നും, എന്നാൽ ബാറ്ററി, ക്യാമറ തുടങ്ങിയ ആന്തരിക ഘടകങ്ങളിൽ വലിയ മെച്ചപ്പെടുത്തലുകൾ ഉണ്ടാകുമെന്നും റിപ്പോർട്ടുകൾ സൂചിപ്പിക്കുന്നു. ഇതോടൊപ്പം ഒരു പുതിയ 'അൾട്ര' മോഡലിനെക്കുറിച്ചുള്ള അഭ്യൂഹങ്ങളും ശക്തമാണ്.

ആപ്പിളിന്റെ അടുത്ത തലമുറ ഫ്ലാഗ്ഷിപ്പ് സ്‍മാർട്ട്‌ഫോണായ ഐഫോൺ 18 പ്രോ മാക്‌സിനെക്കുറിച്ച് പുതിയ വിവരങ്ങൾ പുറത്തുവന്നു. ലഭ്യമായ റിപ്പോർട്ടുകൾ പ്രകാരം, ഡിസൈൻ രംഗത്ത് വലിയ മാറ്റങ്ങൾ പ്രതീക്ഷിക്കേണ്ടതില്ലെന്നും, പ്രത്യേകിച്ച് ഫോണിന്റെ കനം നിലവിലെ മോഡലിനോട് സമാനമായിരിക്കും എന്നും സൂചനയുണ്ട്. ഇത് മുൻപ് ഉണ്ടായിരുന്ന ചില റിപ്പോർട്ടുകളെക്കാൾ വ്യത്യസ്‍തമായ വിലയിരുത്തലാണ്.

കനം ഏകദേശം 8.75 മില്ലിമീറ്റ‍ർ

പ്രശസ്‍ത ടിപ്പ്‌സ്റ്റർ ഐസ് യൂണിവേഴ്സ് (Ice Univers) ചൈനീസ് സോഷ്യൽ മീഡിയ പ്ലാറ്റ്‌ഫോമായ വീബോയിൽലെ പുതിയ പോസ്റ്റിലാണ് ഈ വിവരങ്ങൾ പുറത്ത് വന്നത്. ടിപ്സ്റ്ററുടെ അഭിപ്രായത്തിൽ, ഐഫോൺ 18 പ്രോ മാക്‌സിന്റെ കനം ഏകദേശം 8.75 മില്ലിമീറ്റ‍ർ ആയിരിക്കും. ഇത് ഐഫോൺ 17 പ്രോ മാക്‌സിനോട് ഏകദേശം സമാനമായ രൂപകൽപ്പന തുടരുന്നതായി സൂചിപ്പിക്കുന്നു. ഇതിന് മുമ്പ് ഇതേ ടിപ്പ്‌സ്റ്റർ തന്നെ അൽപ്പം കൂടുതലായ കനം (8.8 മില്ലിമീറ്റർ) ഉണ്ടാകാമെന്ന് പറഞ്ഞിരുന്നു.

അതേസമയം, ആപ്പിൾ ഈ വർഷം കൂടുതൽ ശ്രദ്ധ നൽകുന്നത് പുതിയ 'അൾട്ര' മോഡലിലേക്കാണെന്നും റിപ്പോർട്ടുകൾ പറയുന്നു. ഇത് കമ്പനിയുടെ ആദ്യ ഫോൾഡബിൾ ഐഫോൺ ആയിരിക്കാമെന്ന അഭ്യൂഹങ്ങളും ശക്തമാണ്. ഐഫോൺ 18 സീരീസിനൊപ്പം തന്നെ ഈ പുതിയ ഡിവൈസ് അവതരിപ്പിക്കപ്പെടാനിടയുണ്ടെന്നും ടെക് ലോകത്ത് ചർച്ചയുണ്ട്.

മുൻപ് വന്ന ലീക്കുകൾ പ്രകാരം, ഐഫോൺ 18 പ്രോ മാക്‌സ് കൂടുതൽ ഭാരം കൂടിയ മോഡൽ ആയിരിക്കാമെന്നും സൂചനയുണ്ട്. 240 ഗ്രാം കവിഞ്ഞേക്കാമെന്ന വിലയിരുത്തലും ഉണ്ട്. ഇത് ഐഫോൺ 14 പ്രോ മാക്‌സിന് ശേഷം ഏറ്റവും ഭാരമേറിയ ഐഫോൺ ആകാനുള്ള സാധ്യത ഉയർത്തുന്നു. ബാറ്ററി കാര്യത്തിൽ വലിയ മാറ്റങ്ങൾ പ്രതീക്ഷിക്കുന്നു. പുതിയ മോഡലിൽ 5,100 മുതൽ 5,200mAh വരെ ശേഷിയുള്ള ബാറ്ററി ഉണ്ടായേക്കാമെന്ന് റിപ്പോർട്ടുകൾ പറയുന്നു. നിലവിലെ ഐഫോൺ 17 പ്രോ മാക്‌സിലെ ഏകദേശം 5,088mAh ബാറ്ററിയുമായി താരതമ്യം ചെയ്യുമ്പോൾ ഇത് ചെറിയ വർധനവാണ്. കനം കൂട്ടാതെ ബാറ്ററി വലുപ്പം വർധിപ്പിക്കാൻ ആന്തരിക ഘടകങ്ങളുടെ പുനഃക്രമീകരണം ആവശ്യമാകുമെന്നാണ് വിലയിരുത്തൽ.

കൂടാതെ, 6.9 ഇഞ്ച് ഡിസ്‌പ്ലേ തുടരുമെന്നും, ഡൈനാമിക് ഐലൻഡ് ചെറുതാകാമെന്നും റിപ്പോർട്ടുകൾ പറയുന്നു. പുതിയ C2 മോഡം, മെച്ചപ്പെട്ട ക്യാമറ സിസ്റ്റം, വേരിയബിൾ അപർച്ചർ പിന്തുണയുള്ള പ്രൈമറി ക്യാമറ എന്നിവയും പ്രതീക്ഷിക്കപ്പെടുന്ന അപ്ഗ്രേഡുകളിലാണ് ഉൾപ്പെടുന്നത്. ഐഫോൺ 18 പ്രോ മാക്‌സ് വലിയ പുറംമാറ്റങ്ങളില്ലാതെ, കൂടുതൽ ആന്തരിക ശക്തിയിലേക്ക് ശ്രദ്ധ കേന്ദ്രീകരിക്കുന്ന ഒരു അപ്ഗ്രേഡ് ആയിരിക്കും എന്നാണ് നിലവിലെ ലീക്കുകൾ സൂചിപ്പിക്കുന്നത്.