മോട്ടറോള എഡ്‍ജ് 70 മാക്‌സ്: സ്‍മാർട്ട്ഫോൺ വിപണി കീഴടക്കാൻ പുതിയ കരുത്തൻ

മോട്ടറോളയുടെ പുതിയ പ്രീമിയം സ്‍മാർട്ട്ഫോണായ എഡ്‍ജ് 70 മാക്‌സ് ഉടൻ വിപണിയിലെത്തുമെന്ന് സൂചന. HDR10+, WPC സർട്ടിഫിക്കേഷൻ വെബ്സൈറ്റുകളിൽ ഫോൺ പ്രത്യക്ഷപ്പെട്ടതോടെയാണ് ലോഞ്ച് വാർത്തകൾ സജീവമായത്. സ്നാപ്ഡ്രാഗൺ 8 ജെൻ 5 ചിപ്‌സെറ്റ്, 25W വയർലെസ് ചാർജിങ്, മിലിട്ടറി ഗ്രേഡ് ഡ്യൂറബിലിറ്റി എന്നിവ ഫോണിന്റെ പ്രധാന ആകർഷണങ്ങളാകുമെന്നാണ് റിപ്പോർട്ടുകൾ.

മോട്ടറോളയുടെ പുതിയ പ്രീമിയം സ്‍മാർട്ട്ഫോണായ മോട്ടറോള എഡ്‍ജ് 70 മാക്‌സ് വിപണിയിലെത്താൻ ഒരുങ്ങുന്നതായി റിപ്പോർട്ട്. ഇതുവരെ ഇതുസംബന്ധിച്ച് ഔദ്യോഗിക പ്രഖ്യാപനം ഉണ്ടായിട്ടില്ലെങ്കിലും, സ്മാർട്ട്ഫോൺ HDR10+ സർട്ടിഫിക്കേഷൻ വെബ്‌സൈറ്റിലും വയർലെസ് പവർ കോൺസോർഷ്യം (WPC) ഡാറ്റാബേസിലും പ്രത്യക്ഷപ്പെട്ടതോടെ ലോഞ്ച് അടുത്തുതന്നെയാണെന്ന സൂചന ശക്തമായിരിക്കുകയാണ്. പുതിയ എഡ്‍ജ് സീരീസ് സ്‍മാർട്ട്ഫോണിന്റെ ലോഞ്ച് വൈകാതെ ഉണ്ടാകുമെന്ന പ്രതീക്ഷയിലാണ് ടെക് ലോകം.

ലിസ്റ്റിംഗ് വിവരങ്ങൾ

HDR10+ സർട്ടിഫിക്കേഷൻ ലിസ്റ്റിംഗിൽ മോട്ടറോള എഡ്‍ജ് 70 മാക്‌സ് എന്ന പേര് സ്ഥിരീകരിച്ചിട്ടുണ്ട്. ഇന്ത്യയുൾപ്പെടെ ഏഷ്യ-പസഫിക് മേഖലയിലും യൂറോപ്പ്, മിഡിൽ ഈസ്റ്റ്, ആഫ്രിക്ക (EMEA) വിപണികളിലും ഫോൺ അവതരിപ്പിക്കുമെന്ന സൂചനയാണ് ലിസ്റ്റിംഗ് നൽകുന്നത്. എന്നാൽ ഹാൻഡ്സെറ്റിന്റെ മറ്റ് സാങ്കേതിക വിവരങ്ങൾ വെളിപ്പെടുത്തിയിട്ടില്ല.

അതേസമയം, XT2611 എന്ന മോഡൽ നമ്പറോടെ WPC ഡാറ്റാബേസിലും ഫോൺ പ്രത്യക്ഷപ്പെട്ടു. Qi 2.2.1 സ്റ്റാൻഡേർഡ് പിന്തുണയ്ക്കുന്ന ഈ മോഡലിന് 25W വയർലെസ് ചാർജിങ് സൗകര്യമുണ്ടാകുമെന്നാണ് ലിസ്റ്റിംഗ് സൂചിപ്പിക്കുന്നത്. വയർലെസ് ചാർജിങ് സൗകര്യത്തോടെ എത്തുന്ന മോട്ടറോളയുടെ പുതിയ പ്രീമിയം ഫോണെന്ന നിലയിൽ ഈ ഫോൺ ശ്രദ്ധ നേടുകയാണ്.

നേരത്തെ പുറത്തുവന്ന മാർക്കറ്റിങ് ചിത്രങ്ങൾ പ്രകാരം, മധ്യഭാഗത്ത് പഞ്ച്-ഹോൾ ക്യാമറയുള്ള ഫ്ലാറ്റ് ഡിസ്പ്ലേ, ഫ്ലാറ്റ് റിയർ പാനൽ, ചതുരാകൃതിയിലുള്ള ക്യാമറ മോഡ്യൂൾ എന്നിവയോടെയാകും ഫോൺ എത്തുക. ഗ്ലേഷ്യർ ബ്ലൂ, ഓനിക്സ് ബ്ലാക്ക്, സേജ് ഗ്രീൻ എന്നീ മൂന്ന് നിറങ്ങളിലായിരിക്കും ഉപഭോക്താക്കൾക്ക് തിരഞ്ഞെടുക്കാനാകുക.

ക്വാൽകോമിന്റെ ഏറ്റവും പുതിയ സ്‍നാപ്‍‍ഡ്രാഗൺ 8 ജെൻ 5 ചിപ്സെറ്റാകും ഫോണിന് കരുത്തേകുകയെന്നാണ് റിപ്പോർട്ടുകൾ. പ്രധാന ക്യാമറ, ടെലിഫോട്ടോ ലെൻസ്, അൾട്രാവൈഡ് ക്യാമറ എന്നിവ ഉൾപ്പെടുന്ന ട്രിപ്പിൾ റിയർ ക്യാമറ സംവിധാനവും പ്രതീക്ഷിക്കപ്പെടുന്നു. ദൈനംദിന ഉപയോഗത്തിൽ കൂടുതൽ കരുത്തും വിശ്വാസ്യതയും ഉറപ്പാക്കാൻ MIL-STD-810H മിലിട്ടറി ഗ്രേഡ് ഡ്യൂറബിലിറ്റി സർട്ടിഫിക്കേഷനും ഫോണിന് ലഭിച്ചേക്കുമെന്നാണ് റിപ്പോർട്ടുകൾ. അതിനാൽ സാധാരണ ഉപയോഗത്തിനൊപ്പം കൂടുതൽ കഠിനമായ സാഹചര്യങ്ങളിലും മികച്ച പ്രകടനം കാഴ്ചവയ്ക്കാൻ ഈ മോഡലിന് കഴിയുമെന്നാണ് വിലയിരുത്തൽ.

ലോഞ്ച് തീയതി സംബന്ധിച്ച് മോട്ടറോള ഇതുവരെ ഔദ്യോഗിക പ്രഖ്യാപനം നടത്തിയിട്ടില്ല. എന്നാൽ ഒന്നിന് പിന്നാലെ ഒന്നായി സർട്ടിഫിക്കേഷൻ പ്ലാറ്റ്ഫോമുകളിൽ ഫോൺ പ്രത്യക്ഷപ്പെടുന്ന സാഹചര്യത്തിൽ, എഡ്‍ജ് 70 മാക്‌സ് ഉടൻ തന്നെ ആഗോള വിപണിയിൽ അവതരിപ്പിക്കുമെന്നാണ് ടെക് വിദഗ്ധരുടെ വിലയിരുത്തൽ.