വൺപ്ലസ് 185Hz ഡിസ്പ്ലേ ഇനി ഈ ഫോണുകളിലും ലഭിക്കും

വൺപ്ലസ് തങ്ങളുടെ ഉയർന്ന റിഫ്രഷ് റേറ്റ് ഡിസ്പ്ലേ ഫ്ലാഗ്ഷിപ്പ് മോഡലുകളിൽ നിന്ന് മിഡ്-റേഞ്ച് ഫോണുകളിലേക്കും വ്യാപിപ്പിക്കാൻ ഒരുങ്ങുന്നതായി റിപ്പോർട്ട്. നിലവിലെ 165Hz പാനലുകൾക്ക് പകരം വൺപ്ലസ് 16R, നോർഡ് 7 തുടങ്ങിയ വരാനിരിക്കുന്ന മോഡലുകളിൽ 185Hz ഡിസ്പ്ലേ എത്തിയേക്കും. ഇത് ഉപഭോക്താക്കൾക്ക് മികച്ച സ്ക്രോളിംഗ്, ഗെയിമിംഗ് അനുഭവം നൽകുമെന്നാണ് പ്രതീക്ഷ.

വൺപ്ലസ് സ്മാർട്ട്ഫോൺ നിരയിൽ ഉയർന്ന റിഫ്രഷ് റേറ്റ് ഡിസ്പ്ലേ കൂടുതൽ മോഡലുകളിലേക്ക് വ്യാപിപ്പിക്കാൻ കമ്പനി ഒരുങ്ങുന്നതായി പുതിയ റിപ്പോർട്ട്. ഇതുവരെ ഫ്ലാഗ്ഷിപ്പ് മോഡലുകളിൽ മാത്രം പ്രതീക്ഷിച്ചിരുന്ന 185Hz റിഫ്രഷ് റേറ്റ് ഡിസ്പ്ലേ, ഇനി മിഡ്-റേഞ്ച് ഫോണുകളിലേക്കും എത്തിച്ചേക്കുമെന്നാണ് ചൈനീസ് ടിപ്സ്റ്ററുടെ വെളിപ്പെടുത്തൽ. റിപ്പോർട്ട് ശരിയാണെങ്കിൽ, നിലവിൽ ഉപയോഗിക്കുന്ന 165Hz പാനലുകൾക്ക് പകരം വൺപ്ലസിന്റെ നിരവധി പുതിയ മോഡലുകളിൽ 185Hz ഡിസ്പ്ലേകൾ ലഭിച്ചേക്കും.

ചൈനീസ് സോഷ്യൽ മീഡിയ പ്ലാറ്റ്ഫോമായ വെയ്ബോയിൽ സ്മാർട്ട് പികാച്ചു എന്ന ടിപ്സ്റ്റർ പങ്കുവെച്ച വിവരമനുസരിച്ച്, ഉയർന്ന റിഫ്രഷ് റേറ്റ് സാങ്കേതികവിദ്യ ഫ്ലാഗ്ഷിപ്പ് ഫോണുകളിൽ മാത്രം ഒതുക്കാതെ പ്രീമിയം, മിഡ്-റേഞ്ച് വിഭാഗങ്ങളിലേക്കും വ്യാപിപ്പിക്കാനാണ് വൺപ്ലസ് പദ്ധതിയിടുന്നത്. ഇതോടെ കൂടുതൽ ഉപഭോക്താക്കൾക്ക് മികച്ച സ്ക്രോളിംഗും ഗെയിമിംഗ് അനുഭവവും ലഭിക്കുമെന്നാണ് വിലയിരുത്തൽ.

നിലവിലെ വൺപ്ലസ് 15R, വൺപ്ലസ് നോർഡ് 6 മോഡലുകളിൽ 165Hz ഡിസ്പ്ലേയാണ് ഉപയോഗിച്ചിരിക്കുന്നത്. ഇവയുടെ പിൻഗാമികളായി എത്തുന്ന വൺപ്ലസ് 16R, വൺപ്ലസ് നോർഡ് 7 എന്നിവയിൽ 185Hz റിഫ്രഷ് റേറ്റ് ഡിസ്പ്ലേ ഉൾപ്പെടുത്താൻ സാധ്യതയുണ്ടെന്നാണ് റിപ്പോർട്ട് സൂചിപ്പിക്കുന്നത്.

ഇതോടൊപ്പം, വൺപ്ലസ് 15, 15R, 15T, നോർഡ് 6, ഏസ് 6, ഏസ് 6T, ഏസ് 6 അൾട്ര എന്നീ നിലവിലെ 165Hz ഡിസ്പ്ലേ മോഡലുകളുടെ പിൻഗാമികൾക്കും 185Hz പാനൽ ലഭിച്ചേക്കാമെന്നാണ് അഭ്യൂഹം. ഇതിൽ ഏസ് ബ്രാൻഡിലുള്ള ഫോണുകളും വൺപ്ലസ് 15T-യും ചൈനീസ് വിപണിയിൽ മാത്രമാണ് ലഭ്യമാകുക. അതേസമയം, വൺപ്ലസ് 15, 15R, നോർഡ് 6 എന്നിവ തിരഞ്ഞെടുത്ത ആഗോള വിപണികളിലും വിൽപ്പനയ്ക്കുണ്ട്.

ലോഞ്ച് സമയത്തെക്കുറിച്ചും റിപ്പോർട്ടിൽ സൂചനകളുണ്ട്. 2025 ഡിസംബറിലാണ് വൺപ്ലസ് 15R അവതരിപ്പിച്ചത്. അതിനാൽ 16R ഉടൻ എത്താനിടയില്ല. അതുപോലെ, 2026 ഏപ്രിലിൽ പുറത്തിറങ്ങിയ നോർഡ് 6-ന്റെ പിൻഗാമിയായ നോർഡ് 7, 2027-ന്റെ തുടക്കത്തിലായിരിക്കും അവതരിപ്പിക്കപ്പെടുക എന്നാണ് വിലയിരുത്തൽ. വൺപ്ലസ് 16R ഈ വർഷാവസാനത്തോടെ പ്രഖ്യാപിക്കപ്പെടാനും സാധ്യതയുണ്ട്.

അതേസമയം, നേരത്തെ പുറത്തുവന്ന റിപ്പോർട്ടുകൾ പ്രകാരം വൺപ്ലസ് 16 സ്‍മാർട്ട്ഫോണിൽ സ്‍നാപ്ഡ്രാഗൺ 8 എലൈറ്റ് ജെൻ 6 പ്രോ പ്രോസസറായിരിക്കും കരുത്ത് പകരുക. കൂടാതെ, BOE നിർമ്മിക്കുന്ന 6.78 ഇഞ്ച് ഡിസ്പ്ലേ, നാല് വശങ്ങളിലും ഒരു മില്ലീമീറ്ററിൽ താഴെ മാത്രം ബെസലുകൾ എന്നിവയും ഫോണിന്റെ പ്രധാന സവിശേഷതകളായിരിക്കുമെന്നാണ് സൂചന. എങ്കിലും ഇതുവരെ പുറത്തുവന്ന വിവരങ്ങളൊന്നും വൺപ്ലസ് ഔദ്യോഗികമായി സ്ഥിരീകരിച്ചിട്ടില്ല. അതിനാൽ അന്തിമ സവിശേഷതകളും ലോഞ്ച് സമയവും കമ്പനി പ്രഖ്യാപിക്കുന്നതുവരെ കാത്തിരിക്കേണ്ടതുണ്ട്.