വൺപ്ലസ് നോർഡ് സിഇ 6, നോർഡ് സിഇ 6 ലൈറ്റ് ഇന്ത്യയിൽ ഉടൻ ലോഞ്ച് ചെയ്യാൻ ഒരുങ്ങുന്നു

വൺപ്ലസ് നോർഡ് 6 അടുത്ത മാസം ഇന്ത്യയിൽ അവതരിപ്പിക്കാൻ ഒരുങ്ങുന്നു. ഇതിനൊപ്പം, 2026-ൽ പുറത്തിറങ്ങുമെന്ന് പ്രതീക്ഷിക്കുന്ന വൺപ്ലസ് നോർഡ് സിഇ 6, നോർഡ് സിഇ 6 ലൈറ്റ് എന്നീ രണ്ട് പുതിയ മോഡലുകളെക്കുറിച്ചുള്ള റിപ്പോർട്ടുകളും പുറത്തുവന്നു. 7,000 എംഎഎച്ച് ബാറ്ററിയും മീഡിയാടെക്ക് ഡൈമൻസിറ്റി 6300 പ്രോസസറുമാണ് നോർഡ് സിഇ 6 ലൈറ്റിന്റെ പ്രധാന ആകർഷണങ്ങൾ.

ദില്ലി: ഇന്ത്യൻ സ്‍മാർട്ട്ഫോൺ വിപണിയിൽ പുതിയ ചലനങ്ങൾ സൃഷ്‌ടിക്കാൻ ഒരുങ്ങുകയാണ് വൺപ്ലസ്. കമ്പനിയുടെ പുതിയ നോർഡ് സീരീസായ വൺപ്ലസ് നോർഡ് 6 അടുത്ത മാസം തുടക്കത്തിൽ ഇന്ത്യയിൽ അവതരിപ്പിക്കാനിരിക്കുകയാണ്. കഴിഞ്ഞ വർഷം പുറത്തിറങ്ങിയ നോർഡ് 5-ന്‍റെ പിൻഗാമിയായാണ് ഈ മോഡൽ എത്തുന്നത്. ഇതോടൊപ്പം തന്നെ, നോർഡ് സീരീസിൽ രണ്ട് പുതിയ മോഡലുകൾ കൂടി അവതരിപ്പിക്കാൻ വൺപ്ലസ് പദ്ധതിയിടുന്നതായും റിപ്പോർട്ടുകൾ സൂചിപ്പിക്കുന്നു. വൺപ്ലസ് നോർഡ് സിഇ 6, വൺപ്ലസ് നോർഡ് സിഇ 6 ലൈറ്റ് എന്നിവയാണ് ഈ മോഡലുകൾ.

പ്രശസ്‍ത ടെക് ടിപ്സ്റ്റർ മുകുൾ ശർമ്മയുടെ വെളിപ്പെടുത്തലുകൾ പ്രകാരം, ഈ രണ്ട് ഫോണുകളും 2026 മേയ് മാസത്തിൽ ഇന്ത്യയിൽ അവതരിപ്പിക്കപ്പെടാനിടയുണ്ട്. ഇതോടെ ഏകദേശം രണ്ട് വർഷങ്ങൾക്ക് ശേഷം വൺപ്ലസ് നോർഡ് സിഇ 6 ലൈറ്റ് സീരീസ് വീണ്ടും തിരിച്ചെത്തുന്നതായിരിക്കും. അവസാനമായി വൺപ്ലസ് നോർഡ് സിഇ 4 ലൈറ്റ് 5ജി 2024 ജൂണിൽ ഇന്ത്യയിൽ പുറത്തിറങ്ങിയിരുന്നു.

നോർഡ് സിഇ 6-ന്‍റെ രൂപകൽപ്പനയെ കുറിച്ചുള്ള ചില വിവരങ്ങളും പുറത്തുവന്നിട്ടുണ്ട്. ലീക്കായ ചിത്രങ്ങൾ പ്രകാരം, ഫോണിന് ഫ്ലാറ്റ് ബാക്ക് പാനലും ലളിതമായ ഡിസൈനും ഉണ്ടായിരിക്കും. മുകളിൽ ഇടത് വശത്ത് ചതുരാകൃതിയിലുള്ള ക്യാമറ മോഡ്യൂളും രണ്ട് ലെൻസുകളും എൽഇഡി ഫ്ലാഷും ഉൾപ്പെടും. ഫോണിന്‍റെ മധ്യഭാഗത്ത് വൺപ്ലസ് ലോഗോയും ലഭിക്കും. വോള്യം ബട്ടണുകളും പവർ ബട്ടണും ഇടത് വശത്തായിരിക്കും എന്നതാണ് ശ്രദ്ധേയമായ മാറ്റം.

അതേസമയം, വൺപ്ലസ് നോർഡ് സിഇ 6 ലൈറ്റിന്‍റെ പ്രധാന സവിശേഷതകൾ കൂടി പുറത്തുവന്നിട്ടുണ്ട്. 6.7 ഇഞ്ച് എല്‍സിഡി ഡിസ്പ്ലേയും 120 ഹെര്‍ട്‌സ് വരെ റിഫ്രഷ് റേറ്റും ഫോണിൽ ഉണ്ടായിരിക്കും. മീഡിയാടെക്ക് ഡൈമൻസിറ്റി 6300 പ്രോസസറാണ് ഇത് പ്രവർത്തിപ്പിക്കുക. ഏറ്റവും ശ്രദ്ധേയമായത് 7,000 എംഎഎച്ച് ശേഷിയുള്ള വലിയ ബാറ്ററിയാണ്.

ക്യാമറ വിഭാഗത്തിൽ 50-മെഗാപിക്‌സൽ പ്രൈമറി ക്യാമറയും ഒരു സെക്കൻഡറി സെൻസറും ഉൾപ്പെടും. സെൽഫിക്കായി 16-മെഗാപിക്‌സൽ ഫ്രണ്ട് ക്യാമറയും ഉണ്ടായിരിക്കും. ആൻഡ്രോയ്‌ഡ് 16 അധിഷ്ഠിതമായ ഓക്‌സിജൻഒഎസ് 16-ൽ പ്രവർത്തിക്കുന്ന ഈ ഫോണിൽ സൈഡ്-മൗണ്ടഡ് ഫിംഗർപ്രിന്റ് സെൻസറും ഉൾപ്പെടും. 23,000-ൽ താഴെ പ്രാരംഭവിലയിൽ ഈ സ്‍മാർട്ട്‌ഫോൺ എത്താൻ സാധ്യത ഉണ്ടെന്നാണ് റിപ്പോർട്ടുകൾ. ബാങ്ക് ഓഫറുകൾ ഉൾപ്പെടെ വില 20,000 രൂപയിൽ താഴെയാകാനും സാധ്യതയുണ്ട്. എങ്കിലും ഈ വിവരങ്ങൾ ഔദ്യോഗികമായി സ്ഥിരീകരിച്ചിട്ടില്ല.