ഒപ്പോയുടെ പുതിയ ഫോൺ വരുന്നു; ഈ ഫീച്ചറുകൾ നിങ്ങളെ ഞെട്ടിക്കും

ഒപ്പോ കെ14 പ്ലസ് സ്മാർട്ട്ഫോൺ സെപ്റ്റംബർ 29ന് ഇന്ത്യയിൽ അവതരിപ്പിക്കും. 8000 എംഎഎച്ച് ബാറ്ററി, 50 മെഗാപിക്സൽ ക്യാമറ, 144 ഹെർട്സ് അമോലെഡ് ഡിസ്പ്ലേ എന്നിവയാണ് പ്രധാന സവിശേഷതകൾ. ഫ്ലിപ്‍കാർട്ടിലൂടെയാണ് ഈ ഫോൺ വിൽപ്പനയ്ക്ക് എത്തുക.

മിഡ് റേഞ്ച് സ്‍മാർട്ട്ഫോൺ വിപണിയിൽ പുതിയ മോഡലുമായി ഒപ്പോ. കെ14 പ്ലസ് സ്‍മാർട്ട്ഫോൺ ഇന്ത്യയിൽ സെപ്റ്റംബർ 29ന് അവതരിപ്പിക്കും. ഉച്ചയ്ക്ക് 12 മണിക്കാണ് ലോഞ്ച്. ഫ്ലിപ്‍കാർട്ടിൽ ഒരുക്കിയ പ്രത്യേക മൈക്രോസൈറ്റിലൂടെ ഫോണിന്റെ ഡിസൈൻ ഉൾപ്പെടെയുള്ള പ്രധാന ഫീച്ചറുകൾ ഒപ്പോ പുറത്തുവിട്ടിട്ടുണ്ട്.

കെ സീരീസിലെ നാലാമൻ

ഇന്ത്യയിലെ ഒപ്പോ കെ സീരീസിലെ നാലാമത്തെ സ്‍മാർട്ട്ഫോണായിരിക്കും കെ14 പ്ലസ്. അടുത്തിടെ പുറത്തിറക്കിയ കെ14 ലൈറ്റ്, കെ14 എക്സ് എന്നീ മോഡലുകൾക്ക് പിന്നാലെയാണ് പുതിയ ഫോൺ എത്തുന്നത്. ഫ്ലിപ്‍കാർട്ടിന്റെ ബിഗ് ബില്യൺ ഡേയിസ് വിൽപ്പനയുടെ ഭാഗമായും കെ14 പ്ലസ് ലഭ്യമാകും. ലോഞ്ചിനോട് അനുബന്ധിച്ച് പ്രത്യേക ഓഫറുകളും കമ്പനി പ്രഖ്യാപിക്കുമെന്നാണ് പ്രതീക്ഷിക്കുന്നത്.

144 ഹെർട്സ് അമോലെഡ് ഡിസ്പ്ലേ

6.77 ഇഞ്ച് വലുപ്പമുള്ള 1.5കെ അമോലെഡ് ഡിസ്പ്ലേയാണ് കെ14 പ്ലസിൽ നൽകിയിരിക്കുന്നത്. 144 ഹെർട്സ് റിഫ്രഷ് റേറ്റും 3600 നിറ്റ് വരെ പീക്ക് ബ്രൈറ്റ്നസും ഡിസ്പ്ലേയുടെ പ്രത്യേകതകളാണ്. മീഡിയടെക് ഡൈമെൻസിറ്റി 7360 മാക്സ് ചിപ്സെറ്റാണ് ഫോണിന് കരുത്തേകുന്നത്. 8 ജിബി റാമും 256 ജിബി സ്റ്റോറേജുമുള്ള പതിപ്പാണ് നിലവിൽ സ്ഥിരീകരിച്ചിരിക്കുന്നത്. കളർഒഎസ് 16 ആയിരിക്കും ഫോണിന്റെ ഓപ്പറേറ്റിങ് സിസ്റ്റം.

50 മെഗാപിക്സൽ ക്യാമറ

പിന്നിൽ ഡ്യുവൽ ക്യാമറ സജ്ജീകരണമാണ് ഒപ്പോ നൽകിയിരിക്കുന്നത്. ഒപ്റ്റിക്കൽ ഇമേജ് സ്റ്റെബിലൈസേഷൻ അഥവാ ഒഐഎസ് പിന്തുണയുള്ള 50 മെഗാപിക്സൽ പ്രൈമറി ക്യാമറയാണ് ഇതിലെ പ്രധാന ക്യാമറ. സെൽഫികൾക്കായി 16 മെഗാപിക്സൽ ഫ്രണ്ട് ക്യാമറയും ലഭിക്കും. 4കെ വീഡിയോ റെക്കോർഡിങ്ങിനും ഫോൺ പിന്തുണ നൽകും.

8000 എംഎഎച്ച് ബാറ്ററി

കെ14 പ്ലസിന്റെ പ്രധാന സവിശേഷതകളിലൊന്ന് 8000 എംഎഎച്ച് ബാറ്ററിയാണ്. 45 വാട്ട് ഫാസ്റ്റ് ചാർജിങ് പിന്തുണയോടെയാണ് ബാറ്ററി എത്തുന്നത്. ദീർഘനേരം ഉപയോഗിക്കുമ്പോൾ ഫോൺ ചൂടാകുന്നത് നിയന്ത്രിക്കുന്നതിനായി 5000 ചതുരശ്ര മില്ലിമീറ്റർ വലുപ്പമുള്ള വേപ്പർ ചേംബർ കൂളിങ് സംവിധാനവും നൽകിയിട്ടുണ്ട്.

ഐപി69കെ റേറ്റിങ്ങും സ്റ്റീരിയോ സ്പീക്കറുകളും

ഡ്യുവൽ സ്റ്റീരിയോ സ്പീക്കറുകൾ, ഇൻ-ഡിസ്പ്ലേ ഫിംഗർപ്രിന്റ് സ്‍കാനർ എന്നിവയും കെ14 പ്ലസിലുണ്ടാകും. പൊടിയും വെള്ളവും പ്രതിരോധിക്കുന്ന ഐപി69കെ റേറ്റിങ്ങും ഫോണിനുണ്ട്. ഡാമേജ് പ്രൂഫ് 360 ആർമർ ബോഡി ഡിസൈനും 6 വർഷത്തെ സ്‍മൂത്ത്നെസ് പ്രൊട്ടക്ഷൻ സർട്ടിഫിക്കേഷനും ഫോണിന്റെ മറ്റൊരു പ്രത്യേകതയാണ്.

വില പ്രഖ്യാപിച്ചിട്ടില്ല

കെ14 പ്ലസിന്റെ ഇന്ത്യയിലെ വില ഒപ്പോ ഇതുവരെ പുറത്തുവിട്ടിട്ടില്ല. ഫോണിന്റെ മുഴുവൻ മെമ്മറി വേരിയന്റുകളും കമ്പനി സ്ഥിരീകരിച്ചിട്ടില്ല. ഫ്ലിപ്കാർട്ടിലൂടെ മാത്രമായിരിക്കും വിൽപ്പന. ഫോണിന്റെ നിറങ്ങളുടെ ഔദ്യോഗിക പേരുകളും ഇതുവരെ വെളിപ്പെടുത്തിയിട്ടില്ല. സെപ്റ്റംബർ 29ന് നടക്കുന്ന ലോഞ്ച് ചടങ്ങിൽ വില, വിൽപ്പന ഓഫറുകൾ, മറ്റ് സവിശേഷതകൾ എന്നിവ സംബന്ധിച്ച കൂടുതൽ വിവരങ്ങൾ ഒപ്പോ പുറത്തുവിടും.