200MP ക്യാമറയുമായി ഒപ്പോ റെനോ 16 പ്രോ; പുതിയ വിവരങ്ങൾ പുറത്ത്
Synopsis
സ്മാർട്ട്ഫോൺ വിപണിയിൽ ശ്രദ്ധേയമായ മുന്നേറ്റം കൈവരിച്ച ഒപ്പോയുടെ അടുത്ത തലമുറ മോഡലായ റെനോ 16 പ്രോയെ കുറിച്ചുള്ള വിവരങ്ങൾ വീണ്ടും ചർച്ചയാകുന്നു. റെനോ 15 പ്രോയുടെ പിൻഗാമിയായാണ് ഈ ഫോണിനെ അവതരിപ്പിക്കാൻ ഒരുങ്ങുന്നത് എന്നാണ് റിപ്പോർട്ടുകൾ.
സ്മാർട്ട്ഫോൺ വിപണിയിൽ ശ്രദ്ധേയമായ മുന്നേറ്റം കൈവരിച്ച ഒപ്പോയുടെ അടുത്ത തലമുറ മോഡലായ റെനോ 16 പ്രോയെ കുറിച്ചുള്ള വിവരങ്ങൾ വീണ്ടും ചർച്ചയാകുന്നു. റെനോ 15 പ്രോയുടെ പിൻഗാമിയായാണ് ഈ ഫോണിനെ അവതരിപ്പിക്കാൻ ഒരുങ്ങുന്നത് എന്നാണ് റിപ്പോർട്ടുകൾ. അതേസമയം ഇതുസംബന്ധിച്ച് ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. എങ്കിലും പുതിയ ലീക്കുകൾ ഫോണിന്റെ ലോഞ്ച് സമയവും പ്രധാന സവിശേഷതകളും സംബന്ധിച്ച് വ്യക്തത നൽകുന്നു.
ഒപ്പോ റെനോ 16 പ്രോ ഈ വർഷം ജൂലൈ മുതൽ ഓഗസ്റ്റ് മാസങ്ങൾക്കിടയിൽ പുറത്തിറങ്ങാൻ സാധ്യതയുണ്ട് എന്നാണ് ടെക് ടിപ്സ്റ്റർ യോഗേഷ് ബ്രാർ പുറത്തുവിട്ട വിവരങ്ങൾ പറയുന്നത്. മുൻ മോഡലായ റെനോ 15 സീരീസ് നവംബർ മാസത്തിൽ ചൈനയിൽ അവതരിപ്പിച്ചിരുന്നു. അതുകൊണ്ടുതന്നെ ഈ വേഗത്തിലുള്ള അപ്ഡേറ്റ് ശ്രദ്ധേയമാണ്. ഡിസ്പ്ലേ കാര്യത്തിൽ, ഗ്ലോബൽ പതിപ്പിൽ 6.32 ഇഞ്ച് ഒഎൽഇഡി (OLED) സ്ക്രീൻ തുടരും എന്നാണ് റിപ്പോർട്ടുകൾ. എന്നാൽ റെനോ 15 പ്രോയിൽ 6.78 ഇഞ്ച് വലിയ ഡിസ്പ്ലേ ഉണ്ടായിരുന്നതും ശ്രദ്ധിക്കേണ്ടതാണ്. ക്യാമറ വിഭാഗത്തിൽ, 200 മെഗാപിക്സൽ പ്രാഥമിക സെൻസറോടുകൂടിയ ട്രിപ്പിൾ റിയർ ക്യാമറ സജ്ജീകരണം തുടരും എന്നാണ് പ്രതീക്ഷിക്കുന്നത്. ഫോട്ടോഗ്രഫിയിൽ മികച്ച പ്രകടനം നൽകാൻ ഇത് സഹായിക്കുമെന്ന് വിലയിരുത്തപ്പെടുന്നു.
ഇനി പുതിയ ഫോണിന്റെ ഡിസൈൻ ഭാഗം പരിശോധിച്ചാൽ ഗ്ലാസ്, അലുമിനിയം നിർമ്മിതിയുള്ള പ്രീമിയം ഫിനിഷ് ഉണ്ടാകും. കൂടാതെ, പുതിയ വൺപ്ലസ് ഫോണുകളിലെ പോലെ ഒരു ആക്ഷൻ ബട്ടൺ ഉൾപ്പെടുത്തിയേക്കാമെന്നും റിപ്പോർട്ടുകൾ പറയുന്നു. ബാറ്ററിയിൽ ചെറിയ മെച്ചപ്പെടുത്തലും ഉണ്ടാകുമെന്ന് റിപ്പോർട്ടുകൾ സൂചിപ്പിക്കുന്നു. റെനോ 15 പ്രോയിലെ 6500mAh ബാറ്ററിയേക്കാൾ കൂടുതൽ ശേഷിയുള്ള യൂണിറ്റ് പ്രതീക്ഷിക്കാം.
സ്റ്റോറേജ്, റാം കോൺഫിഗറേഷനുകളിൽ വിപുലമായ ഓപ്ഷനുകൾ ലഭ്യമാകും. 12 ജിബി മുതൽ 16 ജിബി വരെ റാം, 256 ജിബി മുതൽ 1 ടിബി വരെ സ്റ്റോറേജ് ഉൾപ്പെടെയുള്ള പതിപ്പുകൾ ലഭ്യമാകുമെന്നാണ് റിപ്പോർട്ടുകൾ. കറുപ്പ്, പച്ച, വയലറ്റ്, വെള്ള എന്നീ നിറങ്ങളിൽ ഫോൺ എത്താൻ സാധ്യതയുണ്ട്. പെർഫോമൻസിനായി മീഡിയടെക് ഡൈമൻസിറ്റി 9400+ അല്ലെങ്കിൽ ഡൈമൻസിറ്റി 9500s ചിപ്സെറ്റുകളിൽ ഒന്നാകാം ഉപയോഗിക്കുക. കൂടാതെ റെനോ 16, റെനോ 16 പ്രോ മിനി, റെനോ 16 പ്രോ മാക്സ് തുടങ്ങിയ മറ്റു മോഡലുകളോടൊപ്പം തന്നെ ലോഞ്ച് നടക്കാനും സാധ്യതയുണ്ട്. ഒപ്പോയുടെ പുതിയ മോഡൽ വിപണിയിൽ എത്തുമ്പോൾ പ്രീമിയം സെഗ്മെന്റിൽ ശക്തമായ മത്സരം സൃഷ്ടിക്കും.