ഷവോമിയുടെ പുതിയ കരുത്തൻ ഫോണുകൾ വരുന്നു; പോകോ സി95 പ്രോ 4ജി, റെഡ്‍മി നോട്ട് 17 പ്രോ 5ജി വിവരങ്ങൾ പുറത്ത്

ഷവോമിയുടെ പുതിയ സ്മാർട്ട്ഫോണുകളായ പോകോ സി95 പ്രോ 4ജി, റെഡ്മി നോട്ട് 17 പ്രോ 5ജി എന്നിവയ്ക്ക് തായ്‌ലൻഡിൽ എൻബിടിസി സർട്ടിഫിക്കേഷൻ ലഭിച്ചു, ഇത് ആഗോള ലോഞ്ച് ഉടനുണ്ടാകുമെന്ന സൂചന നൽകുന്നു.

ഷവോമിയുടെ പുതിയ സ്‍മാർട്ട്ഫോണുകളായ പോകോ സി95 പ്രോ 4ജി, റെഡ്മി നോട്ട് 17 പ്രോ 5ജി എന്നിവ തായ്‌ലൻഡിലെ എൻബിടിസി (നാഷണൽ ബ്രോഡ്കാസ്റ്റിങ് ആൻഡ് ടെലികമ്മ്യൂണിക്കേഷൻസ് കമ്മിഷൻ) സർട്ടിഫിക്കേഷൻ നേടിയതായി റിപ്പോർട്ട്. ഇതോടെ ഈ രണ്ട് ഫോണുകളുടെയും ആഗോള അവതരണം വൈകാതെ ഉണ്ടാകുമെന്ന സൂചനയാണ് ലഭിക്കുന്നത്. മുൻപ് പുറത്തുവന്ന വിവരങ്ങൾ പ്രകാരം, അന്താരാഷ്ട്ര വിപണിക്കായി ഷവോമി ഈ രണ്ട് മോഡലുകളിലും ചില മാറ്റങ്ങളോടെയാണ് എത്തുന്നത്. പ്രത്യേകിച്ച് റെഡ്മി നോട്ട് 17 പ്രോ 5ജിയുടെ ആഗോള പതിപ്പിൽ ബാറ്ററിയിലും ക്യാമറയിലും മാറ്റങ്ങളുണ്ടാകുമെന്നാണ് റിപ്പോർട്ടുകൾ.

പോകോ സി95 പ്രോ 4ജി റെഡ്മി 17 4ജിയുടെ റീബ്രാൻഡഡ് പതിപ്പ്

എക്സ്പർട്ട്പിക്ക് പുറത്തുവിട്ട റിപ്പോർട്ട് പ്രകാരം, പോകോ സി95 പ്രോ 4ജി യഥാർഥത്തിൽ റെഡ്മി 17 4ജിയുടെ റീബ്രാൻഡഡ് പതിപ്പായിരിക്കും. 2606എഫ്പിസി72വൈ എന്ന മോഡൽ നമ്പറിലാണ് ഈ ഫോൺ എൻബിടിസി ഡാറ്റാബേസിൽ പ്രത്യക്ഷപ്പെട്ടത്. അതേസമയം റെഡ്മി 17 4ജി 2606എഫ്ആർഎൻ72വൈ, 2606എഫ്ആർഎൻ72എൽ എന്നീ മോഡൽ നമ്പറുകളോടെയാണ് പട്ടികയിലുള്ളത്.

വലിയ ബാറ്ററിയും 120 ഹെർട്സ് ഡിസ്പ്ലേയും

റെഡ്മി 17 4ജിയിൽ 6.9 ഇഞ്ച് എച്ച്ഡി പ്ലസ് ഐപിഎസ് എൽസിഡി ഡിസ്പ്ലേ, 120 ഹെർട്സ് റിഫ്രഷ് റേറ്റ്, മീഡിയടെക് ഹീലിയോ ജി91 അൾട്രാ പ്രോസസർ എന്നിവ ലഭിക്കുമെന്നാണ് റിപ്പോർട്ടുകൾ. കൂടാതെ 6 ജിബി വരെ റാം, 256 ജിബി വരെ സ്റ്റോറേജ്, 45 വാട്ട് ഫാസ്റ്റ് ചാർജിങ് പിന്തുണയുള്ള 7,500 എംഎഎഎച്ച് ബാറ്ററി എന്നിവയും പ്രതീക്ഷിക്കുന്നു. ഫോട്ടോഗ്രാഫിക്കായി 50 മെഗാപിക്സൽ പ്രധാന ക്യാമറ, 8 മെഗാപിക്സൽ സെൽഫി ക്യാമറ, സൈഡ് മൗണ്ടഡ് ഫിംഗർപ്രിന്റ് സെൻസർ, എൻഎഫ്സി കണക്റ്റിവിറ്റി എന്നിവയും ഫോണിലുണ്ടാകുമെന്നാണ് സൂചന.

റെഡ്മി നോട്ട് 17 പ്രോ 5ജിയിൽ ബാറ്ററിയിൽ മാറ്റം

അതേസമയം റെഡ്മി നോട്ട് 17 പ്രോ 5ജിയുടെ ആഗോള പതിപ്പും 2607ഡിആർഎ18ജി എന്ന മോഡൽ നമ്പറോടെ എൻബിടിസി സർട്ടിഫിക്കേഷൻ നേടിയിട്ടുണ്ട്. ടിപ്സ്റ്റർ കാസ്പർ സ്‌ക്രിസിപെക് പുറത്തുവിട്ട വിവരമനുസരിച്ച്, ചൈനീസ് പതിപ്പിലെ 9,000 എംഎഎഎച്ച് ബാറ്ററിക്ക് പകരം ആഗോള മോഡലിൽ 8,340 എംഎഎഎച്ച് ബാറ്ററിയായിരിക്കും നൽകുക. ഇതിനൊപ്പം അധികമായി 8 മെഗാപിക്സൽ അൾട്രാ വൈഡ് ക്യാമറയും ലഭിക്കുമെന്നാണ് റിപ്പോർട്ട്.

ചൈനീസ് പതിപ്പിലെ സവിശേഷതകൾ

ചൈനയിൽ അവതരിപ്പിച്ച റെഡ്‍മി നോട്ട് 17 പ്രോയിൽ 6.83 ഇഞ്ച് 1.5കെ അമോലെഡ് ഡിസ്പ്ലേ, 120 ഹെർട്സ് റിഫ്രഷ് റേറ്റ്, ക്വാൽകോം സ്‌നാപ്ഡ്രാഗൺ 6എസ് ജനറേഷൻ 4 പ്രോസസർ, 67 വാട്ട് ഫാസ്റ്റ് ചാർജിങ് പിന്തുണ എന്നിവയാണ് നൽകിയിരിക്കുന്നത്. ക്യാമറ വിഭാഗത്തിൽ 50 മെഗാപിക്സൽ പ്രധാന ക്യാമറ, 8 മെഗാപിക്സൽ മുൻ ക്യാമറ എന്നിവയും ഉൾപ്പെടുന്നു.

ഇന്ത്യൻ ലോഞ്ചിൽ അനിശ്ചിതത്വം

റെഡ്മി നോട്ട് 17 സീരീസിലെ എല്ലാ മോഡലുകളും ഇപ്പോൾ എൻബിടിസി ഡാറ്റാബേസിൽ പ്രത്യക്ഷപ്പെട്ടിട്ടുണ്ട്. ഇതിനിടെ റെഡ്മി നോട്ട് 17 ഇന്ത്യയിൽ ഓഗസ്റ്റ് 6-ന് അവതരിപ്പിക്കുമെന്ന് ഷവോമി നേരത്തെ സ്ഥിരീകരിച്ചിട്ടുണ്ട്. അതിനാൽ പ്രോ മോഡലുകളുടെയും ആഗോള ലോഞ്ച് ഉടൻ പ്രഖ്യാപിക്കുമെന്നാണ് വിലയിരുത്തൽ.

എന്നാൽ നിലവിൽ ലഭ്യമായ വിവരങ്ങൾ പ്രകാരം പോകോ സി95 പ്രോ 4ജിക്കും റെഡ്മി 17 4ജിക്കും ഇന്ത്യൻ പതിപ്പില്ല. അതിനാൽ ഈ രണ്ട് സ്മാർട്ട്ഫോണുകളും ഇന്ത്യൻ വിപണിയിലെത്തുമോയെന്ന കാര്യത്തിൽ കമ്പനി ഇതുവരെ ഔദ്യോഗിക വിശദീകരണം നൽകിയിട്ടില്ല.