പോക്കോ എം8 പവർ: വമ്പൻ ബാറ്ററിയുമായി പുതിയ കരുത്തൻ ഇന്നെത്തും

ഷവോമിയുടെ ഉപബ്രാൻഡായ പോക്കോയുടെ പുതിയ മിഡ് റേഞ്ച് സ്മാർട്ട്ഫോണായ എം8 പവർ ഓഗസ്റ്റ് 4-ന് ഇന്ത്യയിൽ അവതരിപ്പിക്കും. 8000mAh ബാറ്ററി, സ്നാപ്ഡ്രാഗൺ 4 ജെൻ 4 പ്രൊസസർ, 50MP എഐ ക്യാമറ എന്നിവയാണ് പ്രധാന ആകർഷണങ്ങൾ. നാല് വർഷത്തെ ഒഎസ് അപ്‌ഡേറ്റുകളും ഐപി65 റേറ്റിംഗും ഈ ഫോണിനുണ്ടാകും.

ഷവോമിയുടെ ഉപബ്രാൻഡായ പോക്കോ ഇന്ത്യയിൽ ഓഗസ്റ്റ് 4-ന് അവതരിപ്പിക്കുന്ന പുതിയ മിഡ് റേഞ്ച് സ്‍മാർട്ട്ഫോണായ പോക്കോ എം8 പവറിന്റെ കൂടുതൽ വിവരങ്ങൾ ലോഞ്ചിന് മുമ്പ് പുറത്തുവിട്ടു. നേരത്തെ 8000 എം.എ.എച്ച് ബാറ്ററിയും സ്നാപ്ഡ്രാഗൺ 4 സീരീസ് പ്രോസസറും ഫോണിൽ ഉണ്ടാകുമെന്ന് കമ്പനി സ്ഥിരീകരിച്ചിരുന്നു. ഇപ്പോൾ ക്യാമറ സംവിധാനവും സോഫ്റ്റ്‌വെയർ പിന്തുണയും ഡസ്റ്റ്-വാട്ടർ റെസിസ്റ്റൻസ് റേറ്റിങ്ങും ഉൾപ്പെടെയുള്ള പ്രധാന സവിശേഷതകളും വെളിപ്പെടുത്തിയിരിക്കുകയാണ്.

മൂന്ന് നിറങ്ങളിൽ എത്തും

കമ്പനിയുടെ ഔദ്യോഗിക മൈക്രോസൈറ്റിലാണ് പോക്കോ എം8 പവറിന്‍റെ പ്രധാന വിവരങ്ങൾ പ്രസിദ്ധീകരിച്ചിരിക്കുന്നത്. ബ്ലാക്ക്, ബ്ലേസ് ഓറഞ്ച്, ഗ്രീൻ എന്നീ മൂന്ന് നിറങ്ങളിലാകും ഫോൺ ഇന്ത്യൻ വിപണിയിലെത്തുക. കൂടാതെ പൊടിയിൽ നിന്നും വെള്ളത്തിൽ നിന്നുമുള്ള സംരക്ഷണത്തിനായി ഐ.പി65 റേറ്റിങ്ങും ഫോണിന് ലഭിക്കും.

ഹൈപ്പർ ഒഎസ് 3, നാല് വർഷം ഒഎസ് അപ്ഡേറ്റുകൾ

ആൻഡ്രോയിഡ് 16 അധിഷ്ഠിതമായ ഹൈപ്പർ ഒ.എസ് 3-ലാണ് പോക്കോ എം8 പവർ പ്രവർത്തിക്കുക. നാല് പ്രധാന ഒ.എസ് അപ്ഡേറ്റുകളും ആറ് വർഷത്തെ സുരക്ഷാ അപ്ഡേറ്റുകളും നൽകുമെന്ന് കമ്പനി ഉറപ്പുനൽകുന്നു. എൽ.പി.ഡി.ഡി.ആർ4എക്സ് റാം, യു.എഫ്.എസ് 2.2 സ്റ്റോറേജ് എന്നിവയും ഫോണിലുണ്ടാകും. ഡിസ്പ്ലേയ്ക്ക് കോർണിങ് ഗൊറില്ല ഗ്ലാസ് 7ഐ സംരക്ഷണവും നൽകിയിട്ടുണ്ട്. മാറ്റ് ഫിനിഷുള്ള പിൻ പാനലും മെറ്റൽ ഫ്രെയിമും ഫോണിന്റെ മറ്റൊരു പ്രത്യേകതയാണ്.

50 മെഗാപിക്സൽ എ.ഐ ക്യാമറ

ഫോട്ടോഗ്രഫിക്കായി 50 മെഗാപിക്സൽ എ.ഐ പ്രധാന ക്യാമറയാണ് പോക്കോ നൽകിയിരിക്കുന്നത്. ലൈറ്റ് ഫ്യൂഷൻ 400 സെൻസർ ഉപയോഗിക്കുന്ന ഈ ക്യാമറയ്‌ക്കൊപ്പം ഡ്യുവൽ റിയർ ക്യാമറ സംവിധാനമാണ് ഒരുക്കിയിരിക്കുന്നത്. സെൽഫിക്കും വീഡിയോ കോളുകൾക്കുമായി എട്ട് മെഗാപിക്സൽ മുൻ ക്യാമറയും ഫോണിലുണ്ട്. ഓട്ടോ നൈറ്റ് മോഡ്, എ.ഐ ഇറേസർ, എ.ഐ സ്കൈ, എ.ഐ ബൊക്കെ പോർട്രെയിറ്റ്, എ.ഐ എച്ച്.ഡി.ആർ ഒപ്റ്റിമൈസേഷൻ തുടങ്ങിയ എ.ഐ അധിഷ്ഠിത ക്യാമറ ഫീച്ചറുകളും ലഭ്യമാകും. ഫോണിന്റെ കനം 8.45 മില്ലിമീറ്റർ മാത്രമാണെന്നും കമ്പനി അറിയിച്ചു.

സ്‍നാപ്ഡ്രാഗൺ 4 ജെൻ 4 ചിപ്‌സെറ്റ്

ക്വാൽകോമിന്റെ നാല് നാനോമീറ്റർ സ്നാപ്ഡ്രാഗൺ 4 ജെൻ 4 ഒക്ടാകോർ പ്രോസസറാണ് പോക്കോ എം8 പവറിന് കരുത്തേകുന്നത്. ആൻടുടു ബെഞ്ച്മാർക്ക് പരീക്ഷണത്തിൽ 6.30 ലക്ഷത്തിലധികം പോയിന്റ് നേടാൻ ഈ ചിപ്‌സെറ്റിന് കഴിഞ്ഞതായി കമ്പനി അവകാശപ്പെടുന്നു. എട്ട് ജി.ബി റാം, 8000 എം.എ.എച്ച് ബാറ്ററി, കൂടാതെ 10,416 ചതുരശ്ര മില്ലിമീറ്റർ ഗ്രാഫൈറ്റ് ഹീറ്റ് ഡിസിപ്പേഷൻ ഏരിയ ഉൾപ്പെടുന്ന വേപ്പർ ചേംബർ കൂളിങ് സംവിധാനം എന്നിവയും ഫോണിലുണ്ട്.

ലോഞ്ച് ഓഗസ്റ്റ് 4-ന്

പോക്കോ എം8 പവർ ഇന്ത്യയിൽ ഓഗസ്റ്റ് 4-ന് ഉച്ചയ്ക്ക് 12 മണിക്ക് അവതരിപ്പിക്കും. തുടർന്ന് ഫ്ലിപ്‍കാർട്ട് വഴി ഫോൺ വിൽപ്പനയ്‌ക്കെത്തും. വലിയ ബാറ്ററി, ദീർഘകാല സോഫ്റ്റ്‌വെയർ പിന്തുണ, എ.ഐ ക്യാമറ സവിശേഷതകൾ എന്നിവയിലൂടെ മിഡ് റേഞ്ച് വിഭാഗത്തിൽ ശ്രദ്ധ നേടാനാണ് പോക്കോയുടെ ശ്രമം.