7000 എംഎഎച്ച് ബാറ്ററിയും ഡൈമൻസിറ്റി 6300 ചിപ്പും; റിയൽമി പി4 ലൈറ്റ് 5ജി ഇന്ത്യയിൽ
Synopsis
റിയൽമി പുതിയ സ്മാർട്ട്ഫോണായ പി4 ലൈറ്റ് 5ജി ഇന്ത്യയിൽ അവതരിപ്പിച്ചു. മീഡിയടെക് ഡൈമെൻസിറ്റി 6300 5ജി ചിപ്സെറ്റ്, 144 ഹെർട്സ് ഡിസ്പ്ലേ, 7,000 എംഎഎച്ച് ബാറ്ററി എന്നിവയാണ് പ്രധാന ആകർഷണങ്ങൾ. 12,999 രൂപ മുതൽ വില ആരംഭിക്കുന്ന ഈ ഫോൺ ഫ്ലിപ്പ്കാർട്ട്, റിയൽമി വെബ്സൈറ്റ്, ഓഫ്ലൈൻ സ്റ്റോറുകൾ വഴി ലഭ്യമാണ്.
ദില്ലി: റിയൽമി പുതിയ സ്മാര്ട്ട്ഫോണ് മോഡലായ പി4 ലൈറ്റ് 5ജി ഇന്ത്യയിൽ അവതരിപ്പിച്ചു. പി4 സീരീസിലെ ഏറ്റവും പുതിയ അംഗമായ ഈ ഹാൻഡ്സെറ്റ് ഇതിനകം തന്നെ പി4, പി4എക്സ്, പി4 പ്രോ 5ജി എന്നീ മോഡലുകൾ ഉൾപ്പെടുന്ന സീരീസിലേക്ക് ചേരുന്നു. മീഡിയടെക് ഡൈമെൻസിറ്റി 6300 5ജി ചിപ്സെറ്റാണ് ഈ ഫോണിന്റെ ഹൃദയം. മികച്ച പ്രകടനവും 5ജി കണക്റ്റിവിറ്റിയും ഉറപ്പാക്കുന്ന ഈ പ്രോസസറിനൊപ്പം, ചൂട് നിയന്ത്രിക്കാൻ എയർഫ്ലോ വേപ്പർ ചേംബർ സംവിധാനവും നൽകിയിരിക്കുന്നു. 5,300 സ്ക്വയർ മില്ലിമീറ്റർ വിസ്തൃതിയുള്ള ഈ കൂളിംഗ് സംവിധാനം ദീർഘനേരം ഉപയോഗിക്കുമ്പോഴും ഫോണിന്റെ താപനില നിയന്ത്രിതമാക്കാൻ സഹായിക്കുന്നു.
റിയല്മി പി4 ലൈറ്റ് 5ജി: സവിശേഷതകള് വിശദമായി
6.8 ഇഞ്ച് വലുപ്പമുള്ള എച്ച്ഡി+ എൽസിഡി ഡിസ്പ്ലേയാണ് റിയല്മി പി4 ലൈറ്റ് 5ജിയിൽ ഉൾപ്പെടുത്തിയിരിക്കുന്നത്. 144 ഹെര്ട്സ് വരെ റിഫ്രെഷ് റേറ്റും 180 ഹെര്ട്സ് ടച്ച് സാംപ്ലിംഗ് റേറ്റും ഉള്ള ഈ സ്ക്രീൻ ഗെയിമിംഗിനും സ്മൂത്ത് യൂസർ എക്സ്പീരിയൻസിനും അനുയോജ്യമാണ്. കൂടാതെ 900 നിറ്റ്സ് പീക്ക് ബ്രൈറ്റ്നസ് കാരണം പുറത്ത് ഉപയോഗിക്കുമ്പോഴും മികച്ച ദൃശ്യമാനത ലഭിക്കും. ഫോട്ടോഗ്രഫി വിഭാഗത്തിൽ, 13-മെഗാപിക്സൽ പ്രൈമറി സെന്സറുള്ള ഡ്യൂവൽ റിയർ ക്യാമറ സെറ്റപ്പാണ് നൽകിയിരിക്കുന്നത്. സെൽഫികൾക്കും വീഡിയോ കോളുകൾക്കുമായി മുൻവശത്ത് 5-മെഗാപിക്സൽ ക്യാമറയും ഉൾപ്പെടുത്തിയിട്ടുണ്ട്. സാധാരണ ഉപയോഗത്തിനും സോഷ്യൽ മീഡിയ ആവശ്യങ്ങൾക്കും ഈ ക്യാമറകൾ മതിയായ പ്രകടനം നൽകും. 5ജി, 4ജി LTE, വൈ-ഫൈ 5, ബ്ലൂടൂത്ത് 5.3, 3.5mm ഹെഡ്ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവയാണ് റിയൽമി ഹാൻഡ്സെറ്റിലെ കണക്റ്റിവിറ്റി ഓപ്ഷനുകൾ.
7,000 എംഎഎച്ച് ശേഷിയുള്ള വമ്പൻ ബാറ്ററിയാണ് റിയല്മി പി4 ലൈറ്റ് 5ജി ഫോണിന്റെ ഏറ്റവും വലിയ ആകർഷണം. 15 വാട്സ് വയർഡ് ചാർജിംഗ് പിന്തുണയോടുകൂടി ദീർഘനേരം ബാറ്ററി ലൈഫ് ഉറപ്പാക്കുന്നു. ആൻഡ്രോയ്ഡ് 16 അടിസ്ഥാനമാക്കിയ റിയൽമി യുഐ 7.0ൽ പ്രവർത്തിക്കുന്ന ഈ ഫോണിന് രണ്ട് വർഷം ഒഎസ് അപ്ഡേറ്റുകളും മൂന്ന് വർഷം സുരക്ഷാ അപ്ഡേറ്റുകളും വാഗ്ദാനം ചെയ്തിട്ടുണ്ട്. 12,999 രൂപ മുതൽ ആരംഭിക്കുന്ന വിലയിൽ ലഭ്യമാകുന്ന റിയൽമി പി4 ലൈറ്റ് 5ജി, മൊസൈക്ക് ബ്ലൂ, മൊസൈക്ക് ഗ്രീൻ നിറങ്ങളിൽ വിപണിയിലെത്തുന്നു. ഫ്ലിപ്കാർട്ട്, റിയൽമി ഔദ്യോഗിക വെബ്സൈറ്റ്, കൂടാതെ ഓഫ്ലൈൻ സ്റ്റോറുകൾ വഴി ഉപഭോക്താക്കൾക്ക് ഇത് സ്വന്തമാക്കാം. ലോഞ്ച് ഓഫറുകളുടെ ഭാഗമായി ഡിസ്കൌണ്ടുകളും എക്സ്ചേഞ്ച് ബോണസുകളും ലഭ്യമാകുന്നത് ഉപഭോക്താക്കൾക്ക് കൂടുതൽ ആകർഷകമാക്കുന്നു.