റെഡ്‍മി നോട്ട് 15 എസ്‍ഇ ഏപ്രിൽ രണ്ടിന് ഇന്ത്യയിൽ എത്തും; ഡിസൈൻ, ഫീച്ചറുകൾ പുറത്ത്

സ്മാർട്ട്ഫോൺ പ്രേമികൾ ആകാംക്ഷയോടെ കാത്തിരുന്ന റെഡ്മി നോട്ട് 15 SE ഏപ്രിൽ രണ്ടിന് ഇന്ത്യൻ വിപണിയിൽ എത്തുന്നു. ബജറ്റ് ഫ്രണ്ട്ലി നിരയിൽ കരുത്തരായ റെഡ്മി, തങ്ങളുടെ മുൻഗാമിയായ നോട്ട് 14 SE-യേക്കാൾ ഏറെ പരിഷ്കാരങ്ങളുമായാണ് പുതിയ പതിപ്പിനെ അവതരിപ്പിക്കുന്നത്. 

സ്‍മാർട്ട്ഫോൺ വിപണിയിൽ ശ്രദ്ധേയ സ്ഥാനമുള്ള റെഡ്‍മി, പുതിയ മോഡലായ റെഡ്‍മി നോട്ട് 15 എസ്‍ഇ ഏപ്രിൽ രണ്ടിന് ഇന്ത്യയിൽ അവതരിപ്പിക്കാൻ ഒരുങ്ങുന്നു. കഴിഞ്ഞ വർഷം പുറത്തിറങ്ങിയ റെഡ്‍മി നോട്ട് 14 എസ്‍ഇയുടെ പിന്‍ഗാമിയായാണ് ഈ ഫോൺ എത്തുന്നത്. പുറത്തിറക്കുന്നതിനുമുമ്പ് തന്നെ കമ്പനിയുടെ ടീസറുകളിലൂടെ ഈ ഫോണിന്റെ പ്രധാന സവിശേഷതകൾ വ്യക്തമാക്കിയിട്ടുണ്ട്.

ഫ്ലിപ്‍കാർട്ടിൽ ലഭ്യമായ മൈക്രോസൈറ്റ് പ്രകാരം, റെഡ്‍മി നോട്ട് 15 SE വളരെ സ്ലിം ആയ 7.35 മില്ലീമീറ്റർ കട്ടിയിലാണ് രൂപകൽപ്പന ചെയ്തിരിക്കുന്നത്. ലെതർ ഫിനിഷ് പോലെയുള്ള ടെക്സ്ചർ നൽകിയ പിൻഭാഗം ഈ ഫോണിന് പ്രീമിയം ലുക്ക് നൽകുന്നു. പ്രത്യേകിച്ച് ചുവപ്പ് നിറത്തിലുള്ള മോഡലിന് കൂടുതൽ ആകർഷകതയുണ്ട്. ഫോണിന്റെ പിൻഭാഗത്ത് മധ്യഭാഗത്തായി സ്വർണ്ണ അലങ്കാരമുള്ള ഓവൽ ആകൃതിയിലുള്ള ക്യാമറ മോഡ്യൂൾ നൽകിയിട്ടുണ്ട്. അതിൽ നാല് ക്യാമറ സെൻസറുകൾ ഉൾപ്പെടുത്തിയിരിക്കുന്നു.

5,800mAh ശേഷിയുള്ള വലിയ ബാറ്ററി ഈ ഫോണിന്‍റെ പ്രധാന ഹൈലൈറ്റുകളിൽ ഒന്നാണ്. ഇത് ഒറ്റ ചാർജിൽ 44 മണിക്കൂറിൽ അധികം ഉപയോഗിക്കാൻ സാധിക്കും എന്ന് കമ്പനി അവകാശപ്പെടുന്നു. 45W ഫാസ്റ്റ് ചാർജിംഗ് സപ്പോർട്ടും ഇതിലുണ്ട്. കൂടാതെ ബാറ്ററി അഞ്ച് വർഷം വരെ നല്ല പ്രകടനം നിലനിർത്തുമെന്ന് കമ്പനി ഉറപ്പുനൽകുന്നു.

ഡിസ്പ്ലേ രംഗത്തും ഈ ഫോൺ മുന്നിലാണ്. 6.77 ഇഞ്ച് അമോലെഡ് സ്ക്രീൻ, 120Hz റിഫ്രഷ് റേറ്റ്, 3,200 നിറ്റ്സ് വരെ പീക്ക് ബ്രൈറ്റ്‌നസ് എന്നിവ ഉപയോക്താക്കൾക്ക് മികച്ച ദൃശ്യാനുഭവം നൽകും. ഫോട്ടോഗ്രഫിക്കായി 108 മെഗാപിക്സൽ പ്രൈമറി ക്യാമറയും 8 മെഗാപിക്സൽ സെക്കൻഡറി സെൻസറും, 20 മെഗാപിക്സൽ ഫ്രണ്ട് ക്യാമറയും ഉണ്ടായിരിക്കുമെന്നാണ് റിപ്പോർട്ടുകൾ. കൂടാതെ IP65, IP66 റേറ്റിംഗുകൾ വഴി ഡസ്റ്റ്, വാട്ടർ റെസിസ്റ്റൻസ് സവിശേഷതകളും ലഭിക്കും.

കാർബൺ ബ്ലാക്ക്, ക്രിംസൺ റിസർവ്, ഫ്രോസ്റ്റഡ് വൈറ്റ് എന്നീ മൂന്ന് നിറങ്ങളിൽ ഫോൺ ലഭ്യമാകും. ഇന്ത്യയിൽ ഫ്ലിപ്കാർട്ടിലൂടെ വിൽപ്പന ആരംഭിക്കും. ഈ സ്‍മാർട്ട് ഫോണിന്‍റെ വില സംബന്ധിച്ച് ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. എന്നാൽ മുൻ മോഡലിന്റെ വില വർധന കണക്കിലെടുത്താൽ, പുതിയ മോഡലിന് കുറച്ച് ഉയർന്ന വില പ്രതീക്ഷിക്കപ്പെടുന്നു. ഇതോടെ മിഡ്-റേഞ്ച് വിപണിയിൽ റെഡ്‍മി കൂടുതൽ ശക്തമായ മത്സരത്തിനൊരുങ്ങുകയാണ്.