വൺപ്ലസ് നോർഡ് 6; 50 എംപി ക്യാമറയും 9000 എംഎഎച്ച് ബാറ്ററിയുമായി ഏപ്രിൽ 7-ന് ഇന്ത്യയിൽ ലോഞ്ച്
Synopsis
വൺപ്ലസ് നോർഡ് 6-ന്റെ (OnePlus Nord 6) പ്രധാന ആകർഷണം അതിന്റെ ശക്തമായ ക്യാമറ സംവിധാനമാണ്. 50-മെഗാപിക്സൽ സോണി LYTIA പ്രൈമറി സെൻസർ ഓഐഎസ് പിന്തുണയോടെയാണ് എത്തുന്നത്.
ദില്ലി: വൺപ്ലസ് ഇന്ത്യയിലെ സ്മാർട്ട്ഫോൺ വിപണിയിൽ വീണ്ടും ശ്രദ്ധ നേടാൻ നോർഡ് സീരീസിലെ പുതിയ മോഡൽ വൺപ്ലസ് നോർഡ് 6 പുറത്തിറക്കാൻ ഒരുങ്ങുന്നു. ഏപ്രിൽ 7-ന് ആണ് ഫോണിന്റെ ഔദ്യോഗിക ലോഞ്ച് നിശ്ചയിച്ചിരിക്കുന്നത്. ഇതിനോടകം തന്നെ ഈ ഡിവൈസിനെ സംബന്ധിച്ചുള്ള നിരവധി പ്രധാന വിവരങ്ങൾ കമ്പനി പുറത്തുവിട്ടു. ഇതോടെ ടെക് പ്രേമികളിൽ വലിയ പ്രതീക്ഷ ഉയർന്നിരിക്കുകയാണ്.
വൺപ്ലസ് നോർഡ് 6 ക്യാമറ സംവിധാനങ്ങള്
വൺപ്ലസ് നോർഡ് 6-ന്റെ പ്രധാന ആകർഷണം അതിന്റെ ശക്തമായ ക്യാമറ സംവിധാനമാണ്. 50-മെഗാപിക്സൽ സോണി LYTIA പ്രൈമറി സെൻസർ ഒഐഎസ് പിന്തുണയോടെയാണ് എത്തുന്നത്. കൂടാതെ എട്ട് മെഗാപിക്സൽ അൾട്രാ-വൈഡ് ക്യാമറയും ഉൾപ്പെടുത്തിയിട്ടുണ്ട്. മുൻവശത്ത് 32-മെഗാപിക്സൽ പഞ്ച് ഹോൾ സെൽഫി ക്യാമറയാണ് നൽകിയിരിക്കുന്നത്. മുൻ മോഡലായ നോർഡ് 5-ൽ 50-മെഗാപിക്സൽ ഫ്രണ്ട് ക്യാമറ ഉണ്ടായിരുന്നതിനെ അപേക്ഷിച്ച് ചെറിയ കുറവാണിത്. എന്നാൽ, പ്രധാന ക്യാമറ ഉപയോഗിച്ച് 4K വീഡിയോ 60fps-ൽ റെക്കോർഡ് ചെയ്യാൻ കഴിയുന്നത് വലിയ നേട്ടമാണ്.
ഡിസ്പ്ലേ വിഭാഗത്തിലും വൺപ്ലസ് നോർഡ് 6 ശ്രദ്ധേയമാണ്. 1.5K റെസല്യൂഷനുള്ള ഫ്ലാറ്റ് അമോലെഡ് ഡിസ്പ്ലേയും 165 ഹെര്ട്സ് ഉയർന്ന റിഫ്രെഷ് റേറ്റും ഉൾപ്പെടുത്തിയിട്ടുണ്ട്. 1,800 നിറ്റ്സ് വരെ പീക്ക് ബ്രൈറ്റ്നസും 3,840 ഹെര്ട്സ് PWM ഡിമ്മിംഗും ഫോണിനെ കൂടുതൽ മികച്ച ദൃശ്യമാന അനുഭവത്തിന് അനുയോജ്യമാക്കുന്നു. അക്വാ ടെക് 2.0 സാങ്കേതികവിദ്യയുടെ സഹായത്തോടെ നനഞ്ഞ കൈകൾ ഉപയോഗിച്ചും സ്ക്രീൻ സുഖമായി ഉപയോഗിക്കാനാകും.
വൺപ്ലസ് നോർഡ് 6 ചിപ്പും ബാറ്ററി കപ്പാസിറ്റിയും
പെർഫോമൻസിന്റെ കാര്യത്തിൽ, ക്വാൽക്കം സ്നാപ്ഡ്രാഗൺ 8s ജെൻ 4 ചിപ്സെറ്റാണ് ഈ ഫോണിന് കരുത്താകുന്നത്. 12 ജിബി വരെ LPDDR5x RAM, 256 ജിബി വരെ UFS 4.1 സ്റ്റോറേജ് എന്നിവയും ലഭ്യമാകും. കൂടാതെ 9,000 എംഎഎച്ച് ശേഷിയുള്ള വലിയ ബാറ്ററിയും 80 വാട്സ് ഫാസ്റ്റ് ചാർജിംഗും 27 വാട്സ് റിവേഴ്സ് ചാർജിംഗും സപ്പോർട്ട് ചെയ്യുന്നു. വില സംബന്ധിച്ച്, വൺപ്ലസ് നോർഡ് 6 ഇന്ത്യയിൽ 35,000 രൂപയിൽ കൂടുതലായിരിക്കും എന്നാണ് സൂചന. മുൻ മോഡലുകളെ അപേക്ഷിച്ച് വിലയിൽ വർധനവ് ഉണ്ടാകുമെങ്കിലും, അപ്ഗ്രേഡുകൾ കണക്കിലെടുക്കുമ്പോൾ ഇത് യുക്തിസഹമാണെന്ന് വിലയിരുത്തപ്പെടുന്നു.