സാംസങ് ഗാലക്‌സി എസ്27: ആദ്യരഹസ്യങ്ങൾ പുറത്ത്?

സാംസങ് ഗാലക്‌സി എസ്27 സ്മാർട്ട്ഫോൺ SM-S952U എന്ന മോഡൽ നമ്പറോടെ ജിഎസ്എംഎ ഡാറ്റാബേസിൽ കണ്ടെത്തി. ഫോണിന്റെ ഡിസ്‌പ്ലേ, പ്രോസസർ, ക്യാമറ, ബാറ്ററി എന്നിവയെക്കുറിച്ചുള്ള പ്രതീക്ഷിക്കുന്ന സവിശേഷതകളും റിപ്പോർട്ടിൽ വിശദീകരിക്കുന്നു. ഈ ലിസ്റ്റിംഗ് ഫോണിന്റെ വികസനം പുരോഗമിക്കുന്നു എന്നതിന്റെ സൂചനയാണ്.

സാംസങിന്റെ അടുത്ത തലമുറ ഫ്ലാഗ്ഷിപ്പ് സ്മാർട്ട്ഫോൺ ശ്രേണിയായ ഗാലക്‌സി എസ്27 സീരീസിന്റെ അവതരണത്തിന് ഇനിയും മാസങ്ങൾ ബാക്കിയിരിക്കെ, ഗാലക്‌സി എസ്27 മോഡൽ ജിഎസ്എംഎ (GSMA) ഡാറ്റാബേസിൽ പ്രത്യക്ഷപ്പെട്ടതായി റിപ്പോർട്ടുകൾ. സ്‍മാർട്ട്‌പ്രിക്‌സ് പുറത്തുവിട്ട വിവരങ്ങൾ പ്രകാരം, ഫോണിന്റെ പേര്, മോഡൽ നമ്പർ എന്നിവയാണ് ഡാറ്റാബേസിൽ ഉൾപ്പെട്ടിരിക്കുന്നത്.

ജൂൺ 8 തീയതിയിലുള്ള ലിസ്റ്റിംഗിൽ ഗാലക്‌സി എസ്27ന് SM-S952U എന്ന മോഡൽ നമ്പറാണ് നൽകിയിരിക്കുന്നത്. സാംസങിന്റെ നിലവിലെ നാമകരണ രീതികൾ അനുസരിച്ച്, ഇത് അമേരിക്കൻ വിപണിക്കായി തയ്യാറാക്കുന്ന കാരിയർ-ലോക്ക്ഡ് പതിപ്പായിരിക്കാം എന്നാണ് വിലയിരുത്തൽ. എന്നാൽ, ലിസ്റ്റിംഗിൽ ഫോണിന്റെ സാങ്കേതിക സവിശേഷതകളെക്കുറിച്ചുള്ള കൂടുതൽ വിവരങ്ങൾ നൽകിയിട്ടില്ല.

സാംസങ് ഗാലക്‌സി എസ്27 അടുത്ത വർഷത്തിന്റെ തുടക്കത്തിൽ ഗാലക്‌സി എസ്27+, ഗാലക്‌സി എസ്27 പ്രോ, ഗാലക്‌സി എസ്27 അൾട്ര എന്നീ മോഡലുകൾക്കൊപ്പം അവതരിപ്പിക്കുമെന്നാണ് പ്രതീക്ഷിക്കുന്നത്. റിപ്പോർട്ടുകൾ പ്രകാരം, ഈ സീരീസിലെ ഡിസ്പ്ലേ പാനലുകൾ സാംസങ് ഡിസ്പ്ലേയ്ക്ക് പകരം BOE നിർമിച്ച ഓഎൽഇഡി പാനലുകൾ ആയിരിക്കാം.

സ്റ്റാൻഡേർഡ് ഗാലക്‌സി എസ്27 മോഡലിന് 6.3 ഇഞ്ച് വലിപ്പമുള്ള ഡിസ്പ്ലേ ലഭിക്കുമെന്നാണ് സൂചന. 120Hz വരെ റിഫ്രഷ് റേറ്റ് പിന്തുണയ്ക്കുന്ന സ്‌ക്രീൻ ഉപഭോക്താക്കൾക്ക് കൂടുതൽ സ്‍മൂത്തായ ദൃശ്യാനുഭവം നൽകും. ഫോണിന് കരുത്തേകുക സാംസങിന്റെ സ്വന്തം എക്സിനോസ് 2600 പ്രോസസറായിരിക്കും എന്നാണ് റിപ്പോർട്ടുകൾ. അതേസമയം, എസ്27 പ്രോ, എസ്27 അൾട്ര മോഡലുകളിൽ ക്വാൽകോം സ്‍നാപ്ഡ്രാഗൺ 8 എലൈറ്റ് ജെൻ 6 പ്രോ ചിപ്‌സെറ്റ് ഉപയോഗിക്കും എന്നാണ് സൂചന.

ആൻഡ്രോയിഡ് 17 അധിഷ്‍ഠിതമായ വൺ യു.ഐ 9.0 സോഫ്റ്റ്‌വെയറോടെയാകും ഫോൺ എത്തുക. പൊടിയിലും വെള്ളത്തിലും നിന്ന് സംരക്ഷണം നൽകുന്ന IP68 റേറ്റിംഗും ഉപകരണത്തിന് ലഭിക്കുമെന്നാണ് പ്രതീക്ഷിക്കുന്നത്. ക്യാമറ വിഭാഗത്തിൽ 50 മെഗാപിക്‌സൽ പ്രധാന ക്യാമറ ഉൾപ്പെടുന്ന ട്രിപ്പിൾ റിയർ ക്യാമറ സംവിധാനവും 12 മെഗാപിക്‌സൽ ഫ്രണ്ട് ക്യാമറയും ഉണ്ടായേക്കും. ബാറ്ററി വിഭാഗത്തിൽ 4,300mAh ശേഷിയോ അതിലധികമോ ഉള്ള ബാറ്ററിയും 25W വയർഡ് ഫാസ്റ്റ് ചാർജിംഗും 20W വയർലെസ് ചാർജിംഗ് പിന്തുണയും ലഭിക്കും എന്നാണ് റിപ്പോർട്ടുകൾ. സാംസങ് ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. എങ്കിലും, ജിഎസ്എംഎ ലിസ്റ്റിംഗ് ഗാലക്‌സി എസ്27 സീരീസിന്റെ വികസനം പുരോഗമിക്കുകയാണ് എന്നതിന്റെ ശക്തമായ സൂചനയായാണ് വിലയിരുത്തപ്പെടുന്നത്.