ഗാലക്സി ടാബ് S12 അൾട്രാ: പെർഫോമൻസിൽ പുതിയ വിസ്‍മയം?

സാംസങിന്റെ അടുത്ത മുൻനിര ടാബ്ലെറ്റായ ഗാലക്സി ടാബ് എസ്12 അൾട്രാ ഗീക്ക്ബെഞ്ചിൽ പ്രത്യക്ഷപ്പെട്ടു. മീഡിയടെക് ഡൈമെൻസിറ്റി 9500 ചിപ്‌സെറ്റ്, 12 ജിബി റാം, ആൻഡ്രോയിഡ് 17 എന്നിവയുമായി ടാബ്ലെറ്റ് എത്തുമെന്നാണ് ഇത് സൂചിപ്പിക്കുന്നത്. 14.6 ഇഞ്ച് ഡിസ്‌പ്ലേയും 11,600 എംഎഎച്ച് ബാറ്ററിയും പ്രതീക്ഷിക്കുന്ന ഈ മോഡൽ സെപ്റ്റംബറിൽ വിപണിയിലെത്തിയേക്കും.

സാംസങിന്റെ അടുത്ത മുൻനിര ടാബ്ലെറ്റ് മോഡലായ ഗാലക്സി ടാബ് എസ്12 അൾട്രാ ഉടൻ വിപണിയിലെത്തുമെന്ന് സൂചന. ഗാലക്സി ടാബ് എസ്11 അൾട്രായുടെ പിൻഗാമിയായി എത്തുന്ന പുതിയ ടാബ്ലെറ്റിൽ പ്രകടനക്ഷമതയിലും ഹാർഡ്‌വെയറിലും വലിയ അപ്ഗ്രേഡുകൾ ഉണ്ടായേക്കുമെന്നാണ് റിപ്പോർട്ടുകൾ. ഔദ്യോഗിക പ്രഖ്യാപനത്തിന് മുന്നോടിയായി ഗാലക്സി ടാബ് എസ്12 അൾട്രായെ ഗീക്ക്ബെഞ്ച് ഡാറ്റാബേസിൽ കണ്ടെത്തിയതായാണ് വിവരം.

ഗീക്ക്ബെഞ്ചിൽ മികച്ച പ്രകടനം

എസ്.എം-എക്സ്940 എന്ന മോഡൽ നമ്പറിലാണ് വൈ-ഫൈ പതിപ്പായ ഗാലക്സി ടാബ് എസ്12 അൾട്രാ ഗീക്ക്ബെഞ്ച് 7-ൽ പ്രത്യക്ഷപ്പെട്ടത്. ടിപ്സ്റ്റർ അഭിഷേക് യാദവാണ് ഇക്കാര്യം കണ്ടെത്തിയത്. ഗീക്ക്ബെഞ്ച് പരിശോധനയിൽ ടാബ്ലെറ്റ് സിംഗിൾ-കോർ പരിശോധനയിൽ 2,760 പോയിന്റും മൾട്ടി-കോർ പരിശോധനയിൽ 9,291 പോയിന്റും നേടിയതായി റിപ്പോർട്ടുകൾ പറയുന്നു. മുൻനിര ടാബ്ലെറ്റിൽ നിന്ന് പ്രതീക്ഷിക്കാവുന്ന മികച്ച പ്രകടനമാണ് ബെഞ്ച്മാർക്ക് ഫലങ്ങൾ സൂചിപ്പിക്കുന്നത്.

ഡൈമെൻസിറ്റി 9500 ചിപ്സെറ്റ്

ഗാലക്സി ടാബ് എസ്12 അൾട്രായിൽ മീഡിയടെക് ഡൈമെൻസിറ്റി 9500 ചിപ്സെറ്റ് ഉപയോഗിച്ചേക്കുമെന്നാണ് ഗീക്ക്ബെഞ്ച് പട്ടിക നൽകുന്ന പ്രധാന സൂചന. മീഡിയടെക് എംടി6993 എന്ന കോഡ് നാമത്തിലാണ് ചിപ്സെറ്റ് പട്ടികയിൽ കാണുന്നത്. 2.70 ഗിഗാഹെർട്സ് അടിസ്ഥാന ക്ലോക്ക് വേഗതയും 4.71 ഗിഗാഹെർട്സ് വരെ ഉയരുന്ന പരമാവധി ക്ലോക്ക് വേഗതയുമുള്ള എട്ട് കോർ പ്രോസസറാണ് പട്ടികയിൽ കാണുന്നത്. ഈ കോഡ് നാമവും ക്ലോക്ക് വേഗതകളും മീഡിയടെക് ഡൈമെൻസിറ്റി 9500 ചിപ്സെറ്റുമായി ബന്ധപ്പെട്ടതാണെന്നാണ് റിപ്പോർട്ട്. കഴിഞ്ഞ വർഷം പുറത്തിറങ്ങിയ ഗാലക്സി ടാബ് എസ്11 അൾട്രായിൽ മീഡിയടെക് ഡൈമെൻസിറ്റി 9400 ചിപ്സെറ്റായിരുന്നു ഉപയോഗിച്ചിരുന്നത്. അതിനാൽ പുതിയ മോഡലിൽ പ്രകടനക്ഷമതയിൽ ശ്രദ്ധേയമായ മുന്നേറ്റമുണ്ടാകുമെന്നാണ് പ്രതീക്ഷ.

12 ജിബി റാമും ആൻഡ്രോയിഡ് 17ഉം

ഗീക്ക്ബെഞ്ച് പട്ടികയിൽ 11.20 ജിബി റാമാണ് രേഖപ്പെടുത്തിയിരിക്കുന്നത്. ഇത് വിപണിയിൽ 12 ജിബി റാം പതിപ്പായി അവതരിപ്പിക്കാനാണ് സാധ്യത. ആൻഡ്രോയിഡ് 17 ആയിരിക്കും ടാബ്ലെറ്റിന്റെ ഓപ്പറേറ്റിങ് സിസ്റ്റമെന്നും പട്ടിക സൂചിപ്പിക്കുന്നു. ഗ്രാഫിക്സ് ആവശ്യങ്ങൾ കൈകാര്യം ചെയ്യാൻ മാലി-ജി1-അൾട്രാ എംസി12 ജിപിയുവും നൽകിയേക്കും. ടാബ്ലെറ്റിന്റെ വൈ-ഫൈ പതിപ്പാണ് ഗീക്ക്ബെഞ്ചിൽ കണ്ടെത്തിയിരിക്കുന്നത്.

14.6 ഇഞ്ച് അമോലെഡ് ഡിസ്പ്ലേ?

നേരത്തെയുണ്ടായ ചോർച്ചകൾ പ്രകാരം ഗാലക്സി ടാബ് എസ്12 അൾട്രായിൽ 14.6 ഇഞ്ച് ഡൈനാമിക് അമോലെഡ് 2എക്സ് ഡിസ്പ്ലേ ലഭിച്ചേക്കും. 256 ജിബി ഇൻബിൽറ്റ് സ്റ്റോറേജും 11,600 എംഎഎച്ച് ബാറ്ററിയും ഫോണിലുണ്ടാകുമെന്നാണ് സൂചന. 45 വാട്ട് വേഗത്തിലുള്ള ചാർജിങ് പിന്തുണയും പ്രതീക്ഷിക്കുന്നുണ്ട്. ഗാലക്സി ടാബ് എസ്12 അൾട്രാ അടുത്തിടെ ഗൂഗിൾ പ്ലേ കൺസോളിലും എസ്.എം-എക്സ്940 എന്ന മോഡൽ നമ്പറിൽ പ്രത്യക്ഷപ്പെട്ടിരുന്നു.

സെപ്റ്റംബറിൽ ലോഞ്ച്?

ഗാലക്സി ടാബ് എസ്12 അൾട്രാ സെപ്റ്റംബറിൽ അവതരിപ്പിച്ചേക്കുമെന്നാണ് ടിപ്സ്റ്റർ നൽകുന്ന സൂചന. വൈ-ഫൈ പതിപ്പിന് പുറമെ വൈ-ഫൈ പ്ലസ് സെല്ലുലാർ പതിപ്പുകളും എത്തിയേക്കും. ഇവ എസ്.എം-എക്സ്946ബി, എസ്.എം-എക്സ്946എൻ എന്നീ മോഡൽ നമ്പറുകളിലാണ് നേരത്തെ പ്രത്യക്ഷപ്പെട്ടത്. എന്നാൽ സാംസങ് ഇതുവരെ ഗാലക്സി ടാബ് എസ്12 സീരീസിന്റെ ലോഞ്ച് തീയതിയോ മറ്റ് സവിശേഷതകളോ ഔദ്യോഗികമായി സ്ഥിരീകരിച്ചിട്ടില്ല. അതിനാൽ ഗീക്ക്ബെഞ്ച് വിവരങ്ങളും ചോർച്ചകളിൽ നിന്നുള്ള സവിശേഷതകളും ഔദ്യോഗിക പ്രഖ്യാപനം വരെ സ്ഥിരീകരിക്കാത്ത വിവരങ്ങളായി മാത്രം കാണേണ്ടതാണ്.