സാംസങിന്‍റെ പുത്തന്‍ ഫോള്‍ഡബിളുകള്‍ ഇന്നിറങ്ങും; ഗാലക്സി അണ്‍പാക്‌ഡ് ഇവന്‍റ് ഏങ്ങനെ തത്സമയം കാണാം?

ഗാലക്സി സ്സെഡ് ഫോള്‍ഡ് 7, ഗാലക്സി സ്സെഡ് ഫ്ലിപ് 7 എന്നീ സ്‌മാര്‍ട്ട്‌ഫോണുകളാണ് ഇന്നത്തെ ഗാലക്സി അണ്‍പാക്‌ഡ് ഇവന്‍റിന്‍റെ ആകര്‍ഷണം

ന്യൂയോര്‍ക്ക്: സാംസങ് ഗാലക്സി സ്‌മാര്‍ട്ട്‌ഫോണ്‍ പ്രേമികള്‍ ആകാംക്ഷയോടെ കാത്തിരിക്കുന്ന ദിനമാണിന്ന്. ഗാലക്സി അവരുടെ പുത്തന്‍ ഫോള്‍ഡബിള്‍ ഫോണുകള്‍ പുറത്തിറക്കുന്ന ദിവസമാണിന്ന്. ന്യൂയോര്‍ക്ക് വേദിയാവുന്ന ഗാലക്സി അണ്‍പാക്‌ഡ് ഇവന്‍റ് 2025-ല്‍ ഗാലക്സി സ്സെഡ് ഫോള്‍ഡ് 7, ഗാലക്സി സ്സെഡ് ഫ്ലിപ് 7 എന്നീ ഫോണുകള്‍ പുറത്തിറക്കും. ഇതിന് പുറമെ മറ്റ് ഗാഡ്‌ജറ്റുകളും ചടങ്ങില്‍ സാംസങ് അനാച്ഛാദനം ചെയ്യുമെന്നാണ് റിപ്പോര്‍ട്ട്.

ഗാലക്സി അണ്‍പാക്‌ഡ് ഇവന്‍റ് ഇന്ത്യയില്‍ എങ്ങനെ കാണാം

ഇന്ത്യന്‍ സമയം രാത്രി 7.30-നാണ് ഗാലക്സി അണ്‍പാക്‌ഡ് ഇവന്‍റ് 2025 ആരംഭിക്കുക. സാംസങ് ഡോക് കോം, സാംസങ് ന്യൂസ്റൂം, സാംസങിന്‍റെ ഔദ്യോഗിക യൂട്യൂബ് ചാനല്‍ എന്നിവ വഴി പരിപാടി തത്സമയം കാണാം.

ഗാലക്സി സ്സെഡ് ഫോള്‍ഡ് 7

ഗാലക്സി സ്സെഡ് ഫോള്‍ഡ് 7, ഗാലക്സി സ്സെഡ് ഫ്ലിപ് 7 എന്നീ സ്‌മാര്‍ട്ട്‌ഫോണുകളാണ് ഇന്നത്തെ ഗാലക്സി അണ്‍പാക്‌ഡ് ഇവന്‍റിന്‍റെ ശ്രദ്ധാകേന്ദ്രങ്ങള്‍. മടക്കിവയ്ക്കുമ്പോള്‍ 8.9 എംഎം കട്ടിയും തുറന്നിരിക്കുമ്പോള്‍ 4.2 എംഎം കട്ടിയുമാണ് സ്സെഡ് ഫോള്‍ഡ് 7-ന് പറയപ്പെടുന്നത്. ഈ സൂചന സത്യമെങ്കില്‍ സാംസങിന്‍റെ ചരിത്രത്തിലെ ഏറ്റവും സ്ലിം ആയ ഫോള്‍ഡബിളായിരിക്കും ഗാലക്സി സ്സെഡ് ഫോള്‍ഡ് 7.

ഗാലക്സി സ്സെഡ് ഫ്ലിപ് 7

അതേസമയം, ഓള്‍-സ്ക്രീന്‍ കവര്‍ ഡിസ്‌പ്ലെ സഹിതം വരാന്‍ സാധ്യതയുള്ള സ്‌മാര്‍ട്ട്‌ഫോണാണ് ഗാലക്സി സ്സെഡ് ഫ്ലിപ് 7. എക്‌സിനോസ് 2500 ചിപ്പിലായിരിക്കും ഈ ഫോണ്‍ വരികയെന്നാണ് സൂചന. ഈ രണ്ട് ഫോണുകള്‍ക്ക് പുറമെ കൂടുതല്‍ ബജറ്റ്-ഫ്രണ്ട്‌ലിയായ ഒരു ഫോള്‍ഡബിള്‍ കൂടി സാംസങ് പുറത്തിറക്കും എന്ന് അഭ്യൂഹങ്ങളുണ്ട്. ഗാലക്സി സ്സെഡ് ഫോള്‍ഡ് 7, സ്സെഡ് ഫ്ലിപ് 7 എന്നിവയേക്കാള്‍ വിലക്കുറവിലുള്ള ഫോള്‍ഡബിളായിരിക്കുമിത്. റൊട്ടേറ്റിംഗ് ബെസല്‍ സഹിതം ക്ലാസിക് സ്റ്റൈല്‍ ഗാലക്സി വാച്ച് 8 ആണ് ഇന്നത്തെ അണ്‍പാക്ഡ് ഇവന്‍റില്‍ പ്രതീക്ഷിക്കുന്ന മറ്റൊരു ഉത്പന്നം.