ടെക്നോയുടെ പുതിയ അത്ഭുതം; കാമൺ സ്ലിം എത്തി

ട്രാൻഷൻ ഹോൾഡിങ്സിന്റെ ടെക്നോ, പുതിയ സ്മാർട്ട്ഫോണായ കാമൺ സ്ലിം ആഗോളതലത്തിൽ അവതരിപ്പിച്ചു. 6.39 മില്ലീമീറ്റർ കനമുള്ള ഈ ഫോണിൽ മീഡിയടെക് ഹെലിയോ G200 അൾട്ടിമേറ്റ് പ്രോസസർ, 144Hz അമോലെഡ് ഡിസ്പ്ലേ, 50 മെഗാപിക്സൽ സോണി ക്യാമറ, 5,600mAh ബാറ്ററി തുടങ്ങിയ മികച്ച സവിശേഷതകളുണ്ട്.  

ട്രാൻഷൻ ഹോൾഡിങ്സിന്റെ അനുബന്ധ ബ്രാൻഡായ ടെക്നോ പുതിയ സ്മാർട്ട്ഫോണായ ടെക്നോ കാമൺ സ്ലിം ആഗോള വിപണികളിൽ അവതരിപ്പിച്ചു. പേരിനൊത്ത രീതിയിൽ വെറും 6.39 മില്ലീമീറ്റർ കനമുള്ള ഡിസൈനുമായാണ് ഫോൺ എത്തുന്നത്. ആകർഷകമായ രൂപകൽപ്പനയ്‌ക്കൊപ്പം മീഡിയടെക് ഹെലിയോ G200 അൾട്ടിമേറ്റ് പ്രോസസർ, 144Hz റിഫ്രഷ് റേറ്റുള്ള അമോലെഡ് ഡിസ്പ്ലേ, 50 മെഗാപിക്സൽ സോണി ക്യാമറ എന്നിവയാണ് ഈ സ്‍മാർട്ട്ഫോണിന്റെ പ്രധാന സവിശേഷതകൾ.

ബർഗണ്ടി റെഡ്, ജംഗിൾ ഗ്രീൻ, ന്യൂ മോണ്ട്രിയൻ, പ്രിസം ബ്ലാക്ക്, വാൻ ഗോഗ് ബ്ലൂ എന്നീ അഞ്ച് നിറങ്ങളിലാണ് ഫോൺ ലഭ്യമാകുന്നത്. എന്നാൽ വിലയും വിപണിയിലെ ലഭ്യതയും സംബന്ധിച്ച വിവരങ്ങൾ കമ്പനി ഇതുവരെ പുറത്തുവിട്ടിട്ടില്ല. ആൻഡ്രോയിഡ് 16 അടിസ്ഥാനമാക്കിയുള്ള HiOS 16.2 ഓപ്പറേറ്റിങ് സിസ്റ്റത്തിലാണ് ടെക്നോ കാമൺ സ്ലിം പ്രവർത്തിക്കുന്നത്. ഫോണിന് മൂന്ന് തലമുറ ആൻഡ്രോയിഡ് അപ്ഡേറ്റുകൾ നൽകുമെന്ന് കമ്പനി ഉറപ്പുനൽകിയിട്ടുണ്ട്. 6.78 ഇഞ്ച് വലുപ്പമുള്ള 1.5K AMOLED ഡിസ്പ്ലേയാണ് ഫോണിലുള്ളത്. 144Hz റിഫ്രഷ് റേറ്റ് ലഭിക്കുന്നതിനാൽ ഗെയിമിംഗിനും മൾട്ടിമീഡിയ ഉപയോഗത്തിനും മികച്ച ദൃശ്യാനുഭവം ലഭിക്കും.

മീഡിയടെക് ഹെലിയോ G200 അൾട്ടിമേറ്റ് പ്രോസസറാണ് ഫോണിന് കരുത്ത് പകരുന്നത്. 8GB വരെ റാമും 256GB വരെ സ്റ്റോറേജും ഫോണിൽ ലഭ്യമാണ്. ഉയർന്ന പ്രകടനം ഉറപ്പാക്കുന്നതിനായി 12-ലെയർ കൂളിംഗ് സംവിധാനവും വലിയ വേപ്പർ ചേമ്പറും ഉൾപ്പെടുത്തിയിട്ടുണ്ട്.

ഫോട്ടോഗ്രഫിക്കായി 50 മെഗാപിക്സൽ പ്രധാന ക്യാമറയാണ് നൽകിയിരിക്കുന്നത്. 1/1.56 ഇഞ്ച് വലുപ്പമുള്ള സോണി LYT-600 സെൻസറാണ് ഇതിൽ ഉപയോഗിച്ചിരിക്കുന്നത്. സെൽഫികൾക്കും വീഡിയോ കോളുകൾക്കുമായി 32 മെഗാപിക്സൽ ഫ്രണ്ട് ക്യാമറയും ഉണ്ട്. ക്യാമറ മൊഡ്യൂളിൽ 354 മിനി LED ലൈറ്റുകൾ ഉൾപ്പെടുത്തിയിട്ടുണ്ട്. ഇൻകമിംഗ് കോളുകൾ, സന്ദേശങ്ങൾ, ചാർജിങ് സ്റ്റാറ്റസ് തുടങ്ങിയവ സൂചിപ്പിക്കുന്നതിനൊപ്പം ഇവ ഉപയോക്താക്കൾക്ക് ഇഷ്ടാനുസരണം ക്രമീകരിക്കാനും കഴിയും.

ഡോൾബി അറ്റ്‌മോസ് പിന്തുണയുള്ള ഡ്യുവൽ സ്റ്റീരിയോ സ്പീക്കറുകളും ഫോണിൽ ഉൾപ്പെടുത്തിയിട്ടുണ്ട്. 4G, NFC, Wi-Fi, ബ്ലൂടൂത്ത്, ജിപിഎസ്, എഫ്എം റേഡിയോ, യുഎസ്‍ബി ടൈപ്പ്-C തുടങ്ങിയ കണക്റ്റിവിറ്റി സൗകര്യങ്ങളും ലഭ്യമാണ്. പൊടിയും വെള്ളവും പ്രതിരോധിക്കുന്ന IP69, IP68 റേറ്റിംഗുകളും സൈനിക നിലവാരത്തിലുള്ള MIL-STD-810 ഡ്യൂറബിലിറ്റി സർട്ടിഫിക്കേഷനും ഫോണിനുണ്ട്.

5,600mAh ശേഷിയുള്ള ബാറ്ററിയാണ് ഫോണിൽ നൽകിയിരിക്കുന്നത്. 60W ഫാസ്റ്റ് ചാർജിങ് പിന്തുണയും ലഭ്യമാണ്. ഒറ്റ ചാർജിൽ 54 മണിക്കൂറിലധികം സംസാരസമയവും 576 മണിക്കൂറിലധികം സ്റ്റാൻഡ്ബൈ സമയവും ലഭിക്കുമെന്ന് ടെക്നോ അവകാശപ്പെടുന്നു. ദീർഘകാല ബാറ്ററി പ്രകടനവും അത്യാധുനിക സവിശേഷതകളും തേടുന്ന ഉപയോക്താക്കളെ ലക്ഷ്യമിട്ടാണ് ടെക്നോ കാമൺ സ്ലിം അവതരിപ്പിച്ചിരിക്കുന്നത്.