50 എംപി പെരിസ്കോപ്പ് ക്യാമറ, 6500 എംഎഎച്ച് ബാറ്ററി; വിവോ ടി4 പ്രോ ഇന്ത്യയില് പുറത്തിറക്കി, വിലയറിയാം
Synopsis
വിവോ ടി4 പ്രോ സ്മാര്ട്ട്ഫോണിന്റെ വില ഇന്ത്യയില് ആരംഭിക്കുന്നത് 27,999 രൂപയില്, വില്പനയുടെ തുടക്കത്തിലെ ഡിസ്കൗണ്ടുകള്
തിരുവനന്തപുരം: മിഡ്-റേഞ്ച് സ്മാര്ട്ട്ഫോണ് വിപണി പിടിക്കാന് വിവോ ടി4 പ്രോ (Vivo T4 Pro) ഇന്ത്യയില് പുറത്തിറക്കി. 50 മെഗാപിക്സല് പെരിസ്കോപ്പ് ക്യാമറ, 6500 എംഎഎച്ച് ബാറ്ററി, 90 വാട്സ് ഫാസ്റ്റ് ചാര്ജിംഗ്, 12 ജിബി വരെ റാം, ഐപി68, ഐപി69 റേറ്റിംഗ്, എഐ തുടങ്ങി മികച്ച സവിശേഷതകള് വിവോ ടി4 പ്രോ മൊബൈല് ഫോണിനുണ്ട്. 27,999 രൂപയാണ് വിവോ ടി4 പ്രോയുടെ ആരംഭ വില. വില്പനയുടെ ആരംഭത്തില് തന്നെ ഈ ഫോണിന് വിലക്കിഴിവും ലഭ്യമാണ്.
വിവോ ടി4 പ്രോ വിലയും ലഭ്യതയും
വിവോ ടി4 പ്രോ സ്മാര്ട്ട്ഫോണിന്റെ വില ഇന്ത്യയില് ആരംഭിക്കുന്നത് 27,999 രൂപയിലാണ്. 8 ജിബി റാമും 128 ജിബി സ്റ്റോറേജും വരുന്ന മോഡലിന്റെ വിലയാണിത്. അതേസമയം 8 ജിബി + 256 ജിബി വേരിയന്റിന് 29,999 രൂപയും 12 ജിബി + 256 ജിബി വേരിയന്റിന് 31,999 രൂപയുമാണ് വില. രണ്ട് നിറങ്ങളിലായി ഇന്ത്യയിലെത്തിയ വിവോ ടി4 പ്രോ ഓഗസ്റ്റ് 29 മുതല് വിവോ ഇന്ത്യ ഇ-സ്റ്റോറുകളും ഫ്ലിപ്കാര്ട്ടും തെരഞ്ഞെടുക്കപ്പെട്ട ഓഫ്ലൈന് റീടെയ്ല് സ്റ്റോറുകളും വഴി വില്പനയ്ക്കെത്തും. വിവോ ടി4 പ്രോ വാങ്ങുന്നവര്ക്ക് എച്ച്ഡിഎഫ്സി, ആക്സിസ്, എസ്ബിഐ ബാങ്ക് കാര്ഡുകള് വഴി 3,000 രൂപ ഇന്സ്റ്റന്റ് ഡിസ്കൗണ്ട് ലഭിക്കും. 3,000 രൂപയുടെ എക്സ്ചേഞ്ച് ബോണസ് സൗകര്യവും ആറ് മാസത്തെ നോ-കോസ്റ്റ് ഇഎംഐ സൗകര്യവുമാണ് മറ്റ് പ്രത്യേകതകള്.
വിവോ ടി4 പ്രോ സവിശേഷതകള്
വിവോ ടി4 പ്രോ 6.77 ഇഞ്ച് ഫുള്-എച്ച്ഡി+ ക്വാഡ് കര്വ്ഡ് അമോലെഡ് ഡിസ്പ്ലെയോടെയാണ് വിപണിയില് എത്തിയിരിക്കുന്നത്. 120 ഹെര്ട്സ് ആണ് റിഫ്രഷ് റേറ്റ്. സ്നാപ്ഡ്രാഗണ് 7 ജെനറേഷന് 4 സോക് ചിപ്പിലാണ് പ്രവര്ത്തനം. ആന്ഡ്രോയ്ഡ് 15 അടിസ്ഥാനമാക്കിയുള്ള ഫണ്ടച്ച് ഒഎസ് 15 ആണ് പ്ലാറ്റ്ഫോം. നാല് വര്ഷത്തെ ഒഎസ് അപ്ഗ്രേഡുകളും ആറ് വര്ഷത്തെ സുരക്ഷാ അപ്ഡേറ്റുകളും വിവോ ടി4 പ്രോ വാഗ്ദാനം ചെയ്യുന്നു. പ്രീ-ഇന്സ്റ്റാള് ചെയ്ത ഗൂഗിള് ജെമിനി ആപ്പ് സഹിതം വരുന്ന വിവോ ടി4 പ്രോയില് ജെമിനി ലൈവ് പോലുള്ള എഐ ഫീച്ചറുകളുണ്ട്. എഐ ക്യാപ്ഷന്സ്, എഐ സ്മാര്ട്ട്കോള് അസിസ്റ്റന്റ്, എഐ സ്പാം കോള് പ്രൊട്ടക്ഷന്, എഐ പ്രൊഫഷണല് പോട്രൈറ്റ്, എഐ ഇറേസ് 3.0, എഐ മാജിക് മൂന്, എഐ ഇമേജ് എക്സ്പാന്ഡര്, എഐ ഫോട്ടോ എന്ഹാന്സ് എന്നിവയും പ്രത്യേകതയാണ്.
വിവോ ടി4 പ്രോ ക്യാമറ, ബാറ്ററി
ക്യാമറ വിഭാഗത്തിലേക്ക് വന്നാല് വിവോ ടി4 പ്രോയില് റിയര് ഭാഗത്ത് 50 എംപി സോണി ഐഎംഎക്സ്882 പ്രധാന സെന്സറും, 50 എംപി സോണി ഐഎംഎക്സ്882 പെരിസ്കോപ്പ് ടെലിഫോട്ടോ ലെന്സും, 3x സൂം സഹിതം 2 എംപി ബൊക്കേ ക്യാമറയും ഉള്പ്പെടുന്നു. സെല്ഫിക്കും വീഡിയോ കോളിംഗിനുമായുള്ളത് 32 എംപിയുടെ ഫ്രണ്ട് ക്യാമറയാണ്. 6,500 എംഎഎച്ച് ബാറ്ററി കരുത്തിലുള്ള ഫോണ് 90 വാട്സ് ഫാസ്റ്റ് ചാര്ജിംഗ് സൗകര്യം നല്കുന്നു. സുരക്ഷയ്ക്ക് ഐപി68, ഐപി69 റേറ്റിംഗ്, ഇന്-ഡിസ്പ്ലെ ഫിംഗര്പ്രിന്റ് സെന്സര്, 5ജി, 4ജി, വൈ-ഫൈ, ബ്ലൂടൂത്ത് 5.4, ജിപിഎസ്, യുഎസ്ബി ടൈപ്പ്-സി എന്നിവയാണ് മറ്റ് പ്രത്യേകതകള്.