വിവോ Y31s 5G: മിഡ്-റേഞ്ചിലെ പുതിയ താരം?

പ്രമുഖ സ്മാർട്ട്ഫോൺ നിർമ്മാതാക്കളായ വിവോ, പുതിയ മിഡ്-റേഞ്ച് 5G സ്മാർട്ട്ഫോണായ വിവോ Y31s 5G മലേഷ്യയിൽ അവതരിപ്പിച്ചു. സ്നാപ്ഡ്രാഗൺ 4 ജെൻ 2 പ്രോസസർ, 6,500mAh ബാറ്ററി, 50 മെഗാപിക്സൽ പ്രൈമറി ക്യാമറ എന്നിവയാണ് ഫോണിന്റെ പ്രധാന സവിശേഷതകൾ.

പ്രമുഖ സ്‍മാർട്ട്ഫോൺ നിർമ്മാതാക്കളായ വിവോ പുതിയ മിഡ്-റേഞ്ച് 5G സ്മാർട്ട്ഫോണായ വിവോ Y31s 5G മലേഷ്യയിൽ അവതരിപ്പിച്ചു. ശക്തമായ ബാറ്ററി, ആധുനിക പ്രോസസർ, ഉയർന്ന റെസല്യൂഷൻ ക്യാമറ എന്നിവയുമായി എത്തുന്ന ഈ ഫോൺ മിഡ്-റേഞ്ച് വിപണിയിൽ ശ്രദ്ധ നേടുമെന്നാണ് പ്രതീക്ഷിക്കുന്നത്.

മലേഷ്യയിൽ വിവോ Y31s 5G-യുടെ വില RM 1,499 (ഏകദേശം 35,200 രൂപ) ആയാണ് നിശ്ചയിച്ചിരിക്കുന്നത്. 8GB റാമും 256GB സ്റ്റോറേജുമുള്ള ഒരേയൊരു വേരിയന്റിലാണ് ഫോൺ ലഭ്യമാകുന്നത്. ബ്ലാക്ക്, പർപ്പിൾ എന്നീ രണ്ട് നിറങ്ങളിൽ എത്തുന്ന സ്മാർട്ട്ഫോൺ വിവോ മലേഷ്യയുടെ ഔദ്യോഗിക വെബ്സൈറ്റിലൂടെയും അംഗീകൃത റീട്ടെയിൽ സ്റ്റോറുകളിലൂടെയും വാങ്ങാൻ സാധിക്കും.

ആൻഡ്രോയിഡ് 16 അധിഷ്ഠിതമായ ഒറിജിൻOS 6 ഓപ്പറേറ്റിംഗ് സിസ്റ്റത്തിലാണ് വിവോ Y31s 5G പ്രവർത്തിക്കുന്നത്. 6.74 ഇഞ്ച് ഫുൾ HD ഡിസ്പ്ലേയാണ് ഫോണിന്റെ പ്രധാന ആകർഷണങ്ങളിലൊന്ന്. 1,050 നിറ്റ്സ് വരെ പീക്ക് ബ്രൈറ്റ്നസ് ലഭിക്കുന്നതിനാൽ ശക്തമായ സൂര്യപ്രകാശത്തിലും മികച്ച ദൃശ്യാനുഭവം ഉറപ്പാക്കുമെന്ന് കമ്പനി അവകാശപ്പെടുന്നു. ഇതിനെ ‘സൺലൈറ്റ് ഡിസ്‍പ്ലേ’ എന്ന പേരിലാണ് വിവോ വിപണനം ചെയ്യുന്നത്.

പെർഫോമൻസിനായി ക്വാൽകോമിന്റെ സ്‍നാപ്‍ഡ്രാഗൺ 4 ജെൻ 2 പ്രോസസറാണ് ഫോണിൽ ഉപയോഗിച്ചിരിക്കുന്നത്. 8GB റാമും 256GB ഇന്റേണൽ സ്റ്റോറേജും ഉപഭോക്താക്കൾക്ക് മികച്ച മൾട്ടിടാസ്‍കിംഗ് അനുഭവം നൽകും. ഫോട്ടോഗ്രഫിക്കായി 50 മെഗാപിക്സൽ പ്രൈമറി ക്യാമറയും 2 മെഗാപിക്സൽ ബൊക്കെ സെൻസറുമടങ്ങുന്ന ഡ്യുവൽ റിയർ ക്യാമറ സംവിധാനമാണ് ഒരുക്കിയിരിക്കുന്നത്. സെൽഫികൾക്കും വീഡിയോ കോളുകൾക്കുമായി 32 മെഗാപിക്സൽ ഫ്രണ്ട് ക്യാമറയും നൽകിയിട്ടുണ്ട്. 5G, NFC, യുഎസ്‍ബി ടൈപ്പ്-സി എന്നിവ ഉൾപ്പെടെയുള്ള ആധുനിക കണക്റ്റിവിറ്റി സംവിധാനങ്ങൾ ഫോണിൽ ലഭ്യമാണ്. കോൾ റെക്കോർഡിംഗിനും ഓഡിയോ റെക്കോർഡിംഗിനും പിന്തുണയുണ്ട്. എന്നാൽ Hi-Fi ഓഡിയോ സപ്പോർട്ട് ലഭ്യമല്ലെന്ന് കമ്പനി വ്യക്തമാക്കിയിട്ടുണ്ട്.

6,500mAh ശേഷിയുള്ള ബ്ലുവോൾട്ട് ബാറ്ററിയാണ് ഫോണിന് കരുത്തേകുന്നത്. 44W ഫ്ളാഷ് ചാർജ്ജ് ഫാസ്റ്റ് ചാർജിംഗ് സാങ്കേതികവിദ്യയും ഇതോടൊപ്പം ലഭ്യമാണ്. ഏകദേശം 209 ഗ്രാം ഭാരമുള്ള ഈ സ്‍മാർട്ട്ഫോൺ IP68, IP69, IP69K+ റേറ്റിംഗുകളോടെയാണ് എത്തുന്നത്. പൊടിയെയും വെള്ളത്തെയും പ്രതിരോധിക്കുന്ന ഈ സവിശേഷതകൾ ഫോണിന്റെ ദൈർഘ്യവും വിശ്വാസ്യതയും വർധിപ്പിക്കുന്നു. മികച്ച ബാറ്ററി ലൈഫ്, കരുത്തുറ്റ ക്യാമറ, 5G പിന്തുണ എന്നിവ തേടുന്ന ഉപഭോക്താക്കളെ ലക്ഷ്യമിട്ടാണ് വിവോ Y31s 5G വിപണിയിലെത്തിയിരിക്കുന്നത്.