സാംസങ്ങ് ഗാലക്‌സി S26 എഫ്‍ഇ: വിവരങ്ങൾ ചോർന്നു; പുതിയ രൂപം ഇങ്ങനെ

സാംസങ്ങിന്റെ പുതിയ ഫാൻ എഡിഷൻ മോഡലായ ഗാലക്‌സി എസ്26 എഫ്ഇയുടെ യഥാർത്ഥ ചിത്രം ഓൺലൈനിൽ പ്രത്യക്ഷപ്പെട്ടു. മുൻ മോഡലുകളിൽ നിന്ന് വ്യത്യസ്തമായി, ഉയർന്നുനിൽക്കുന്ന പുതിയ ക്യാമറ ബമ്പാണ് ഇതിൽ നൽകിയിരിക്കുന്നത്. എക്സിനോസ് 2500 പ്രോസസർ, 8 ജിബി റാം തുടങ്ങിയ സവിശേഷതകളോടെ ഈ വർഷം അവസാനത്തോടെ ഫോൺ വിപണിയിലെത്തുമെന്നാണ് പ്രതീക്ഷ.

സാംസങ്ങിന്റെ ജനപ്രിയമായ ഫാൻ എഡിഷൻ (FE) സ്‍മാർട്ട്ഫോൺ ശ്രേണിയിലെ അടുത്ത മോഡലായ ഗാലക്‌സി എസ്26 എഫ്ഇയെക്കുറിച്ചുള്ള പുതിയ വിവരങ്ങൾ പുറത്തുവന്നു. ഈ വർഷം അവസാനത്തോടെ ഫോൺ ഔദ്യോഗികമായി അവതരിപ്പിക്കുമെന്നാണ് പ്രതീക്ഷിക്കപ്പെടുന്നത്. അതിന് മുന്നോടിയായി ഫോണിന്റെ യഥാർത്ഥ ചിത്രം ഓൺലൈനിൽ പ്രത്യക്ഷപ്പെട്ടതോടെ ടെക്ക് ലോകത്ത് വലിയ ചർച്ചകൾക്ക് വഴിയൊരുങ്ങിയിരിക്കുകയാണ്.

വയർലെസ് പവർ കോൺസോർഷ്യം (WPC) ലിസ്റ്റിംഗിലാണ് പുതിയ ഗാലക്‌സി എസ്26 എഫ്ഇ ആദ്യമായി ശ്രദ്ധിക്കപ്പെട്ടത്. SM-S741 എന്ന മോഡൽ നമ്പറോടെയാണ് ഫോൺ ലിസ്റ്റ് ചെയ്തിരിക്കുന്നത്. ഈ ലിസ്റ്റിംഗിനൊപ്പമാണ് ഫോണിന്റെ പിൻഭാഗത്തിന്റെ ചിത്രം പുറത്തുവന്നത്. ചിത്രത്തിൽ ഏറ്റവും ശ്രദ്ധേയമായ മാറ്റം ക്യാമറ മോഡ്യൂളിലാണ്. മുൻ തലമുറയായ ഗാലക്‌സി എസ്25 എഫ്ഇയിൽ നിന്ന് വ്യത്യസ്തമായി, എസ്26 എഫ്ഇയിൽ ഉയർന്നുനിൽക്കുന്ന ക്യാമറ ബമ്പാണ് ഉൾപ്പെടുത്തിയിരിക്കുന്നത്. സാംസങ്ങിന്റെ ഗാലക്‌സി Z ഫോൾഡ് സീരീസിൽ കണ്ട ഡിസൈൻ ശൈലിയോട് സാമ്യമുള്ള ഈ ക്യാമറ യൂണിറ്റ് ഫോണിന്റെ പിൻഭാഗത്തിന് പുതിയ രൂപം നൽകുന്നു. എന്നാൽ ക്യാമറ ബമ്പ് ഫോണിന്റെ മുകളിലെയും വശങ്ങളിലെയും അരികുകളോട് വളരെ അടുത്തായി സ്ഥിതിചെയ്യുന്നതായി ചിത്രങ്ങളിൽ കാണപ്പെടുന്നു. ഇതിന്റെ രൂപകൽപ്പന ചില ഉപയോക്താക്കൾക്ക് അത്ര ആകർഷകമല്ലെന്നാണ് സോഷ്യൽ മീഡിയയിലെ അഭിപ്രായങ്ങൾ. എങ്കിലും ഇത് പ്രീ-പ്രൊഡക്ഷൻ യൂണിറ്റായിരിക്കാമെന്നും അന്തിമ രൂപത്തിൽ മാറ്റങ്ങൾ ഉണ്ടായേക്കാമെന്നും റിപ്പോർട്ടുകൾ സൂചിപ്പിക്കുന്നു.

സവിശേഷതകളെക്കുറിച്ചും ചില വിവരങ്ങൾ ചോർന്നിട്ടുണ്ട്. ഫോണിൽ സാംസങ്ങിന്റെ പുതിയ എക്സിനോസ് 2500 പ്രോസസറായിരിക്കും ഉപയോഗിക്കുക എന്നാണ് റിപ്പോർട്ടുകൾ. ഇതോടൊപ്പം 8 ജിബി റാം ലഭിക്കുമെന്നും സൂചനകളുണ്ട്. കൂടാതെ ആൻഡ്രോയിഡ് 17 ഓപ്പറേറ്റിംഗ് സിസ്റ്റം അടിസ്ഥാനമാക്കിയുള്ള ഏറ്റവും പുതിയ സോഫ്റ്റ്‌വെയറുമായാണ് ഫോൺ എത്തുക എന്നുമാണ് പ്രതീക്ഷിക്കുന്നത്.

ഗാലക്‌സി എസ്26 എഫ്ഇയുടെ ലോഞ്ച് ഈ വർഷം ഓഗസ്റ്റ് അല്ലെങ്കിൽ സെപ്റ്റംബർ മാസങ്ങളിൽ നടക്കാനാണ് സാധ്യത. ഇന്ത്യയിലെ വില സംബന്ധിച്ച് ഔദ്യോഗിക പ്രഖ്യാപനം വന്നിട്ടില്ല. നിലവിലെ ഗാലക്‌സി എസ്25 എഫ്ഇയുടെ 128 ജിബി പതിപ്പ് 59,999 രൂപയ്ക്കാണ് അവതരിപ്പിച്ചിരുന്നത്. പുതിയ എക്സിനോസ് 2500 ചിപ്പിന്റെയും മെമ്മറി ഘടകങ്ങളുടെ വർധിച്ചുവരുന്ന ചെലവിന്റെയും പശ്ചാത്തലത്തിൽ എസ്26 എഫ്ഇയ്ക്ക് മുൻ മോഡലിനെക്കാൾ ഉയർന്ന വില വരാൻ സാധ്യതയുണ്ടെന്നാണ് ടെക്ക് വിപണി നിരീക്ഷകർ വിലയിരുത്തുന്നത്.

ഫോണിന്റെ ക്യാമറ, ബാറ്ററി, സ്റ്റോറേജ് ഓപ്ഷനുകൾ തുടങ്ങിയ കൂടുതൽ വിവരങ്ങൾ ഔദ്യോഗിക പ്രഖ്യാപനത്തിന് മുമ്പായി വരും ആഴ്ചകളിൽ പുറത്തുവരുമെന്നാണ് പ്രതീക്ഷിക്കുന്നത്. സാംസങ്ങ് ആരാധകർ ഇതിനോടകം തന്നെ ഈ പുതിയ ഫാൻ എഡിഷൻ മോഡലിനായി കാത്തിരിക്കുകയാണ്.