ഏകദിന റാങ്കിംഗ്, ഒന്നാം സ്ഥാനം നിലനിര്‍ത്തി രോഹിത് ശര്‍മ, വിരാട് കോലി തൊട്ടുപിന്നില്‍, രാഹുലിനും നേട്ടം

ഐസിസി ഏകദിന റാങ്കിംഗില്‍ രോഹിത് ശർമ ഒന്നാം സ്ഥാനം നിലനിര്‍ത്തിയപ്പോള്‍, വിരാട് കോലി രണ്ടാം സ്ഥാനത്തേക്ക് ഉയർന്നു. ശുഭ്മാന്‍ ഗില്‍ അഞ്ചാം സ്ഥാനം നിലനിർത്തിയപ്പോൾ, കെ എല്‍ രാഹുലും കുല്‍ദീപ് യാദവും റാങ്കിംഗില്‍ നേട്ടമുണ്ടാക്കി.

രോഹിത് ഒന്നാമൻ

ഐസിസി ഏകദിന റാങ്കിംഗില്‍ ഒന്നാം സ്ഥാനം നിലനിര്‍ത്തി ഇന്ത്യൻ ഓപ്പണര്‍ രോഹിത് ശർമ. 781 റേറ്റിംഗ് പോയന്‍റുമായാണ് രോഹിത് ഒന്നാം സ്ഥാനത്ത് തുടരുന്നത്.

കോലി തൊട്ടുപിന്നില്‍

ദക്ഷിണാഫ്രിക്കക്കെതിരായ ഏകദിന പരമ്പരയില്‍ തുടര്‍ച്ചയായി രണ്ട് സെഞ്ചുറികള്‍ നേടിയ വിരാട് കോലി രണ്ട് സ്ഥാനം ഉയര്‍ന്ന് 773 റേറ്റിംഗ് പോയന്‍റുമായി രണ്ടാം സ്ഥാനത്തേക്ക് ഉയര്‍ന്നു. രോഹിത്തുമായി എട്ട് റേറ്റിംഗ് പോയന്‍റുകളുടെ അകലം മാത്രമാണ് കോലിക്കുള്ളത്. 2021ലാണ് കോലി അവസാനം ഒന്നാം സ്ഥാനത്തെത്തിയത്.

ഗില്ലിന് മാറ്റമില്ല

പരിക്കുമൂലം ദക്ഷിണാഫ്രിക്കക്കെതിരായ ഏകദിന പരമ്പരയില്‍ കളിച്ചില്ലെങ്കിലും ക്യാപ്റ്റൻ ശുഭ്മാന്‍ ഗില്‍ പുതിയ റാങ്കിംഗില്‍ അഞ്ചാം സ്ഥാനം നിലനിര്‍ത്തി. 723 റേറ്റിംഗ് പോയന്‍റുള്ള ഗില്ലിന് തൊട്ടുപിന്നിലായി 722 റേറ്റിംഗ് പോയന്‍റുമായി ബാബര്‍ അസമുണ്ട്.

ശ്രേയസ് അയ്യര്‍ ടോപ് 10ല്‍ നിന്ന് പുറത്ത്

പരിക്കുമൂലം ദക്ഷിണാഫ്രിക്കക്കെതിരായ ഏകദിന പരമ്പരയില്‍ കളിക്കാതിരുന്ന ശ്രേയസ് അയ്യര്‍ ഒരു സ്ഥാനം താഴേക്കിറങ്ങി പതിനൊന്നാം സ്ഥാനത്തായി.

നേട്ടം കൊയ്ത് രാഹുല്‍

ഗില്ലിന്‍റെ അഭാവത്തില്‍ ദക്ഷിണാഫ്രിക്കെതിരെ ഇന്ത്യയെ പരമ്പര നേട്ടത്തിലേക്ക് നയിക്കുകയും രണ്ട് അര്‍ധസെഞ്ചുറികളുമായി ബാറ്റിംഗില്‍ തിളങ്ങുകയും ചെയ്തു കെ എല്‍ രാഹുല്‍ രണ്ട് സ്ഥാനം ഉയര്‍ന്ന് 12-ാം സ്ഥാനത്തെത്തി.

കുല്‍ദീപിനും കുതിപ്പ്

ബൗളിംഗ് റാങ്കിംഗില്‍ ദക്ഷിണാഫ്രിക്കക്കെതിരായ ഏകദിന പരമ്പരയില്‍ തിളങ്ങിയ സ്പിന്നര്‍ കുല്‍ദീപ് യാദവ് മൂന്ന് സ്ഥാനം ഉയര്‍ന്ന് മൂന്നാം സ്ഥാനത്തെത്തി. ദക്ഷിണാഫ്രിക്കക്കെതിരായ പരമ്പരയില്‍ മൂന്ന് കളികളില്‍ 9 വിക്കറ്റാണ് കുല്‍ദീപ് നേടിയത്.

സിറാജിന് വീഴ്ച

ദക്ഷിണാഫ്രിക്കക്കെതിരായ ഏകദിന പരമ്പരയില്‍ കളിക്കാതിരുന്ന പേസര്‍ മുഹമ്മദ് സിറാജ് നാലു സ്ഥാനം താഴേക്കിറങ്ങി 21-ാം സ്ഥാനത്തായപ്പോള്‍ രവീന്ദ്ര ജഡേ രണ്ട് സ്ഥാനം നഷ്ടമാക്കി പതിനാറാം സ്ഥാനത്തേക്ക് വീണു.

ഓള്‍ റൗണ്ടര്‍മാരില്‍ അക്സര്‍ മാത്രം

ഓള്‍ റൗണ്ടര്‍മാരില്‍ ടോപ് 5ല്‍ ഇന്ത്യൻ താരങ്ങളാരുമില്ല. പത്താം സ്ഥാനത്തുള്ള അക്സര്‍ പട്ടേല്‍ മാത്രമാണ് ആദ്യ പത്തില്‍ ഇടം നേടിയ ഒരേയൊരു ഇന്ത്യൻ താരം. രവീന്ദ്ര ജഡേജ പതിനൊന്നാം സ്ഥാനത്താണ്.