മോദി@20 ഡ്രീംസ് മീറ്റ് ഡെലിവറി; കേന്ദ്രമന്ത്രി സഭയുടെ സാന്നിധ്യത്തില്‍ പ്രകാശനം ചെയ്തു

പ്രധാനമന്ത്രി നരേന്ദ്രമോദിയെ കുറിച്ചുള്ള പുതിയ പുസ്തകം ദില്ലിയില്‍ പ്രകാശനം ചെയ്തു.  ഡൽഹി വിജ്ഞാന് ഭവനിൽ സംഘടിപ്പിച്ച ചടങ്ങിൽ ഉപരാഷ്ട്രപതി വെങ്കയ്യ നായിഡു പുസ്തക പ്രകാശനം നിര്‍വ്വഹിച്ചു. കേന്ദ്രമന്ത്രി സഭ ഒന്നടങ്കം ചടങ്ങിന് സാക്ഷിയായി. പ്രധാനമന്ത്രി ഒരു പ്രതിഭാസമാണെന്നും സ്വപ്നങ്ങള്‍ എങ്ങനെ യാഥാര്‍ത്ഥ്യമാക്കാമെന്ന് ലോകത്തിന് കാട്ടിക്കൊടുത്ത പ്രതിഭയാണെന്നും ഉപരാഷ്ട്രപതി വെങ്കയ്യനായിഡു പുസ്തക പ്രകാശന വേളയില്‍ പറഞ്ഞു. കേന്ദ്രമന്ത്രിമാരായ അമിത് ഷാ, രാജീവ് ചന്ദ്രശേഖര്‍, സ്മൃതി ഇറാനി എന്നിവരും ചടങ്ങില്‍ പങ്കെടുത്തു. ചിത്രങ്ങള്‍ ഏഷ്യാനെറ്റ് ന്യൂസ് ക്യാമറാമാന്‍ വസിം സെയ്ദി.   

ഗുജറാത്തില്‍ മുഖ്യമന്ത്രിയായത് മുതലുള്ള 20 വര്‍ഷത്തെ നരേന്ദ്ര മോദിയുടെ രാഷ്ട്രീയ വളര്‍ച്ചയും, ഭരണ നൈപുണ്യവും വ്യക്തമാക്കുന്നതാണ് മോദി@20 ഡ്രീംസ് മീറ്റ് ഡെലിവറിയെന്ന പുസ്തകം. 

"പ്രധാനമന്ത്രി ദേശീയ തലത്തിൽ ഒരു പ്രതിഭാസമാണ്. വ്യതിരിക്തമായ ചിന്താ പ്രക്രിയയുടെ വ്യത്യസ്ത വശങ്ങൾ, പയനിയറിംഗ്, പ്രോ-ആക്റ്റീവ് സമീപനം, നരേന്ദ്ര മോദിയുമായി വളരെ അടുത്ത് തിരിച്ചറിയപ്പെട്ടിട്ടുള്ള, പരിണാമപരവും പരിവർത്തനാത്മകവുമായ നേതൃശൈലി എന്നിവ പുസ്തകം അവതരിപ്പിക്കുന്നു." ഉപരാഷ്ട്രപതി വെങ്കയ്യ നായിഡു പറഞ്ഞു.

സ്വാതന്ത്ര്യത്തിന് ശേഷം ജനിച്ച ആദ്യത്തെ പ്രധാനമന്ത്രിയാണ് പ്രധാനമന്ത്രി മോദിയെന്നും, കഴിഞ്ഞ 20 വർഷമായി, 13 വർഷവും കഴിഞ്ഞ വർഷവും ഗുജറാത്ത് മുഖ്യമന്ത്രിയായിരിക്കെ, സ്വാതന്ത്ര്യാനന്തര ഇന്ത്യയുടെ ചരിത്രത്തിൽ അതുല്യമായ സ്ഥാനം അദ്ദേഹം നേടിയിട്ടുണ്ടെന്നും ഉപരാഷ്ട്രപതി കൂട്ടിച്ചേർത്തു. 

പുസ്തകം തന്‍റെ രാജ്യത്തെ ജനങ്ങൾക്ക് വേണ്ടി വലിയ സ്വപ്നം കാണാൻ അദ്ദേഹത്തിന് എങ്ങനെ ധൈര്യമുണ്ടെന്ന് മനസ്സിലാക്കാന്‍ സഹായിക്കുന്നു. ഈ സ്വപ്നങ്ങളെ മൂർത്തമായ യാഥാർത്ഥ്യത്തിലേക്ക് വിവർത്തനം ചെയ്യാനുള്ള ധൈര്യം കോടിക്കണക്കിന് ഇന്ത്യക്കാരുടെ ജീവിതത്തെ ക്രിയാത്മകമായി ബാധിക്കുന്നുവെന്നും  ഉപരാഷ്ട്രപതി നായിഡു പറഞ്ഞു.

സമ്പൂർണ്ണ വ്യക്തിത്വം കെട്ടിപ്പടുക്കുന്നതിനുള്ള പാതയിൽ വിശ്വസിക്കുന്നവർക്കും സാമൂഹിക പ്രവർത്തന രംഗത്തും രാഷ്ട്രീയ രംഗത്തും ഉള്ളവർക്കും ഗീതയ്ക്ക് തുല്യമായി ഈ പുസ്തകം ഉയരുമെന്ന് അമിത് ഷാ പറഞ്ഞു.

പ്രധാനമന്ത്രി മോദിയെ സദ്ഭരണ സ്ഥാപനമെന്നാണ് മുഖ്താർ നഖ്‌വി വിശേഷിപ്പിച്ചത്. ബിജെപിയുടെ മുതിർന്ന നേതാവും കേന്ദ്രമന്ത്രിയുമായ മുഖ്താർ അബ്ബാസ് നഖ്‌വിയും പ്രധാനമന്ത്രി നരേന്ദ്ര മോദിയെ സദ്ഭരണത്തിന്‍റെ "സ്ഥാപനം" എന്നും "എല്ലാവരെയും ഉൾക്കൊള്ളുന്ന വികസനത്തിന്‍റെ ദൗത്യം" ചെയ്യുന്ന വ്യക്തിയെന്നും പ്രശംസിച്ചു.

ഗായിക ലതാമങ്കേഷ്ക്കറിന്‍റെ ആമുഖത്തോടെ തുടങ്ങുന്ന പുസ്തകത്തില്‍ കേന്ദ്രമന്ത്രിമാരായ അമിത്ഷാ, എസ് ജയ് ശങ്കര്‍, ദേശീയ സുരക്ഷ ഉപദേഷ്ടാവ് അജിത് ദോവല്‍, നടന്‍ അനുപം ഖേര്‍, സുധ മൂര്‍ത്തിയടക്കം 22 പേര്‍ മോദിയെ കുറിച്ച് എഴുതിയിട്ടുണ്ട്. 

യുവാക്കളുടെ പ്രതീകമായി എങ്ങനെ മോദി മാറിയെന്നത് വിശദീകരിക്കുന്ന പി വി സിന്ധുവിന്‍റേതടക്കമുള്ള ലേഖനവും പുസ്കകത്തെ ശ്രദ്ധേയമാക്കുന്നു.