'കുടി'ച്ച് തീരുന്ന ജീവിതങ്ങള്‍; ആവര്‍ത്തിക്കപ്പെടുന്ന ദുരന്തങ്ങള്‍
First Published Oct 14, 2019, 4:06 PM ISTമദ്യം ഒരു കുടുംബത്തെ ഏങ്ങനെയൊക്കെ ഇല്ലാതാക്കുന്നുവെന്ന ആശയത്തില്‍ നിന്നാണ് "ആവര്‍ത്തനം" എന്ന ഫോട്ടോ സ്റ്റോറി ഉണ്ടാകുന്നത്. ശ്യാം സത്യന്‍റെ 'അച്ഛന്‍' എന്ന ഫോട്ടോസ്റ്റോറിയില്‍ നിന്നുള്ള പ്രചോദനവും ആവര്‍ത്തനം എന്ന ചിത്രകഥയിലേക്ക് തങ്ങളെ എത്തിച്ചെന്ന് ആവര്‍ത്തവത്തിന്‍റെ ഡിഒപിയായി വര്‍ക്ക് ചെയ്ത അജോ എബ്രഹം ഏഷ്യാനെറ്റ് ഓണ്‍ലൈനോട് പറഞ്ഞു.
ഗൃഹനാഥന്‍റെ അമിത മദ്യോപയോഗത്തെ തുടര്‍ന്ന് തകരുന്ന കുടുംബത്തെ അയാള്‍ തന്നെ പിന്നീട് കൈപിടിച്ചുയര്‍ത്താന്‍ ശ്രമിക്കുന്നുണ്ടെങ്കിലും മദ്യം തീര്‍ത്ത ദുരന്തത്തിന്‍റെ ഓര്‍മ്മകള്‍ മകളെ അച്ഛനില്‍ നിന്നും അകറ്റുന്നു. അവള്‍ക്ക്, ജനിച്ച വീടിനെക്കാള്‍, വളര്‍ത്തിയ അച്ഛനേക്കാള്‍ സുരക്ഷിതത്വം മറ്റൊരാളില്‍ നിന്ന് ലഭിക്കുമെന്ന വിശ്വാസത്തില്‍ മകള്‍ അച്ഛനെ ഉപേക്ഷിക്കുന്നു.
ആവര്‍ത്തനം എന്ന ഫോട്ടോ സ്റ്റോറിയുടെ സംവിധാനം സുജിത്ത് സുദര്‍ശനാണ്. ഇരുവരും കൊല്ലം ജില്ലക്കാരാണ്. സുജിത്ത്, ആല്‍ബം ഡിസൈനിങ്ങ് വര്‍ക്കുകള്‍ ചെയ്യുന്നു. മെക്കാനിക്കല്‍ എഞ്ചിനീയറിങ്ങ് കഴിഞ്ഞ അജോ, ഇഷ്ടപ്പെട്ട ജോലി ചെയ്യാനായി എഞ്ചിനീയറിങ്ങ് ഉപേക്ഷിക്കുകയും ഫോട്ടോഗ്രഫിയിലേക്ക് തിരിയുകയുമായിരുന്നു. ആവര്‍ത്തനത്തില്‍ പ്രധാന കഥാപാത്രമായി എത്തിയിരിക്കുന്നത് അനുരാജ് മാറനാട് ആണ്. മുരുകന്‍ എം വേണു, അനന്ദു കൃഷ്ണന്‍ എന്നിവരാണ് വെളിച്ച സംവിധാനം. കാണാം ആവര്‍ത്തനക്കാഴ്ചകള്‍.