ജീവിതം കൊണ്ട് തുഴഞ്ഞ് വാരിക്കൂട്ടിയ മാലിന്യങ്ങള്‍ നീക്കണം; രാജപ്പേട്ടന് ഒരു വീട് വേണം, വള്ളവും
First Published Feb 1, 2021, 11:07 AM ISTപതിവ് പോലെ അതിരാവിലെ തന്നെ അരയ്ക്ക് താഴെ തളര്‍ന്ന ശരീരവും വലിച്ച് രാജപ്പേട്ടന് വേമ്പനാട്ട് കായലിലേക്ക് പോയിരുന്നു. പരിസ്ഥിതി സംരക്ഷിക്കുന്ന സാധാരണ ജനങ്ങളെ കുറിച്ച് പ്രധാനമന്ത്രിയുടെ മന്‍കിബാത്തില്‍ തന്‍റെ പേര് കേട്ടതിന്‍റെ ആഹ്ളാദമൊന്നും അദ്ദേഹത്തിന്‍റെ മുഖത്തില്ല. എന്നത്തെയും പോലെ സാധാരണ ദിവസം. ശരീരമുയര്‍ത്തിയ പരിമിതികളെ വെല്ലുവിളിച്ച് ജീവിക്കാനായി വീട്ടില്‍ നിന്ന് വള്ളമൂന്നി വേമ്പനാട്ട് കയലിലേക്ക് തുഴഞ്ഞ് പോയതാണ് എന്‍ എസ് രാജപ്പന്‍ എന്ന രാജപ്പേട്ടന്. പതിനാല് വര്‍ഷമായി അദ്ദേഹം വേമ്പനാട്ട് കായലിലേക്ക് തുഴയുന്നു. മീന്‍ പിടിക്കാനല്ല. കഴിഞ്ഞ പതിനാല് വര്‍ഷത്തിനിടെ രാജപ്പേട്ടന് വേമ്പനാട്ട് കായലില്‍ നിന്ന് മീന്‍ പിടിച്ചിട്ടില്ല. പിടിച്ചതും കോരിയെടുത്തതും നാട്ടുകാര് വലിച്ചെറിഞ്ഞ പ്ലാസ്റ്റിക് മാലിന്യങ്ങളായിരുന്നു. രാജപ്പേട്ടന്‍റെ ചെറിയ ശ്രമം വെമ്പനാട്ട് കായലിനെ അത്രയെങ്കിലും മലിനമാക്കുന്നതില്‍ നിന്ന് തടഞ്ഞു. അദൃശ്യമായ വലിയൊരു മാറ്റത്തിന്‍റെ തുടക്കമാണ് ആ ചെറിയ ശ്രമം. അതേ, എന്തുകൊണ്ടും രാജ്യത്തിന്‍റെ ആദരം നേടാന്‍ യോഗ്യനായ മനുഷ്യനാണ് കോട്ടയം കുമരകം, മഞ്ചാടിക്കരി സ്വദേശി എന്‍ എസ് രാജപ്പന്‍. ചിത്രങ്ങള്‍ ഏഷ്യാനെറ്റ് ന്യൂസ് ക്യാമറാമാന്‍ ജി കെ പി വിജേഷ്.