ജോലിയൊന്നും ചെയ്യാതെ മാസം 20000 രൂപ നേടാം; റിട്ടയർമെൻ്റ് ജീവിതം അടിച്ചുപൊളിക്കാൻ ഒരു വഴി

വിരമിച്ചതിന് ശേഷം സ്ഥിരവരുമാനം ആഗ്രഹിക്കുന്നവർക്ക് ഏറ്റവും സുരക്ഷിതമായ നിക്ഷേപ മാർഗമാണ് പോസ്റ്റ് ഓഫീസ് പദ്ധതികൾ. അതിലൊന്നാണ് സീനിയർ സിറ്റിസൺ സേവിംഗ്സ് സ്കീം (SCSS). ഒറ്റത്തവണയായി പണം നിക്ഷേപിച്ചാൽ എല്ലാ മാസവും മികച്ച വരുമാനം ഉറപ്പാക്കാം.

എന്താണ് സീനിയർ സിറ്റിസൺ സേവിംഗ്‌സ് സ്‌കീം?

മുതിർന്ന പൗരന്മാർക്കായുള്ള ഒരു ലഘു സമ്പാദ്യ പദ്ധതിയാണിത്. 60 വയസ് കഴിഞ്ഞവർ, 55-60 വയസിനിടയിൽ വിആർഎസ് എടുത്ത സർക്കാർ ജീവനക്കാർ, 50-60 വയസിനിടയിൽ വിരമിച്ച പ്രതിരോധ സേനാംഗങ്ങൾ എന്നിവർക്ക് ഈ പദ്ധതിയിൽ ചേരാം. ഒറ്റയ്‌ക്കോ പങ്കാളിയുമായി ചേർന്നോ അക്കൗണ്ട് തുടങ്ങാം.

പലിശ നിരക്ക് എത്ര? വരുമാനം എങ്ങനെ?

നിലവിൽ 8.2% ആണ് വാർഷിക പലിശ. ഇത് ഓരോ മൂന്ന് മാസം കൂടുമ്പോഴും അക്കൗണ്ടിലെത്തും. ഉദാഹരണത്തിന്, 30 ലക്ഷം രൂപ നിക്ഷേപിച്ചാൽ 8.2% പലിശ നിരക്കിൽ വർഷം 2,46,000 രൂപ കിട്ടും. അതായത് മാസം ഏകദേശം 20,500 രൂപ. ബാങ്ക് സ്ഥിര നിക്ഷേപങ്ങളെക്കാൾ മികച്ച നേട്ടമാണിത്. 5 വർഷമാണ് കാലാവധി, വേണമെങ്കിൽ നീട്ടാം. പരമാവധി 30 ലക്ഷം രൂപ വരെ നിക്ഷേപിക്കാം.

നികുതി ആനുകൂല്യങ്ങൾ

ഈ പദ്ധതിയിലെ നിക്ഷേപത്തിന് ആദായനികുതി നിയമത്തിലെ സെക്ഷൻ 80C പ്രകാരം 1.5 ലക്ഷം രൂപ വരെ ഇളവ് ലഭിക്കും. എന്നാൽ പലിശ വരുമാനത്തിന് നികുതി നൽകണം. നിശ്ചിത പരിധി കഴിഞ്ഞാൽ TDS പിടിക്കും. അതിനാൽ നികുതി കാര്യങ്ങൾ മുൻകൂട്ടി പ്ലാൻ ചെയ്യുന്നത് നല്ലതാണ്.

അക്കൗണ്ട് എങ്ങനെ തുടങ്ങാം?

അടുത്തുള്ള പോസ്റ്റ് ഓഫീസിൽ SCSS അക്കൗണ്ട് തുറക്കാം. ഇതിനായി ആധാർ, പാൻ, വയസ് തെളിയിക്കുന്ന രേഖ, വിരമിക്കൽ സർട്ടിഫിക്കറ്റ് (ബാധകമായവർക്ക്) എന്നിവ വേണം. ഒരു വർഷത്തിനുള്ളിൽ അക്കൗണ്ട് ക്ലോസ് ചെയ്താൽ പലിശ കിട്ടില്ല. 1-2 വർഷത്തിനിടയിൽ 1.5% പിഴയും 2-5 വർഷത്തിനിടയിൽ 1% പിഴയും ഈടാക്കും.

അടിയന്തര സാഹചര്യങ്ങളിൽ പണം പിൻവലിക്കാനുള്ള സൗകര്യം

റിസ്‌ക് എടുക്കാൻ താൽപര്യമില്ലാത്ത മുതിർന്ന പൗരന്മാർക്ക് സ്ഥിര വരുമാനം ഉറപ്പാക്കാൻ SCSS ഒരു മികച്ച വഴിയാണ്. വലിയൊരു തുക നിക്ഷേപിച്ചാൽ പ്രതിമാസ ചെലവുകൾക്ക് ആവശ്യമായ പണം ലഭിക്കും. സർക്കാർ ഗ്യാരണ്ടി, ആകർഷകമായ പലിശ, നികുതി ഇളവുകൾ എന്നിവയെല്ലാം ഈ പദ്ധതിയെ വിശ്വസനീയമാക്കുന്നു.