പെണ്ണും പെണ്ണും പ്രേമിച്ചു തുടങ്ങിയത് ഇന്നോ ഇന്നലെയോ അല്ല; ഇതാ തെളിവുകള്‍, ചിത്രങ്ങള്‍ കാണാം
First Published Aug 9, 2020, 3:15 PM ISTകാലങ്ങളായി സ്വവർഗരതിയെ 'അത്ര സ്വാഭാവികമല്ല' എന്നാണ് ആളുകള്‍ കണ്ടിരുന്നത്. പാപത്തിന്‍റെ, അവഹേളനത്തിന്‍റെ, വെറുപ്പിന്‍റെ കടുംചായങ്ങൾ പൂശി അവയെ വികൃതമാക്കാൻ നമ്മുടെ 'സന്മാർഗ്ഗികത' നമ്മെ പ്രേരിപ്പിച്ചു. സമൂഹത്തിന്‍റെ ക്രൂരതയെ ഭയന്ന് തന്‍റെ ലൈംഗികത മറച്ചുവക്കേണ്ടി വന്നിരുന്നു പലർക്കും. അവസാനം സ്വന്തം ജീവിതം വരെ ഉപേക്ഷിക്കാൻ പ്രേരിപ്പിക്കുന്ന കടുത്ത നിരാശയിലേക്ക് അവർ കൂപ്പുകുത്തുമായിരുന്നു. പക്ഷേ, ഈ വികാരങ്ങൾ എല്ലാകാലത്തുമുണ്ടായിരുന്നു. സ്വവർഗരതിയെ വിലക്കപ്പെട്ട ഒന്നായി കരുതിയിരുന്ന ഒരു കാലഘട്ടത്തിൽ പകർത്തിയ ഈ ശ്രദ്ധേയമായ ചിത്രങ്ങൾ അതിന്‍റെ തെളിവുകളാണ്. പത്തൊൻപതാം നൂറ്റാണ്ടിലെയും, ഇരുപതാം നൂറ്റാണ്ടിലെയും സ്ത്രീ സങ്കല്‍പ്പങ്ങളെ വെല്ലുവിളിക്കുന്നതാണ് ഈ ചിത്രങ്ങൾ. വളരെ അടുത്ത് ഇടകലർന്ന് ചുംബിക്കുകയും, ആലിംഗനം ചെയ്യുകയും, പരസ്‍പരം ചാരിയിരിക്കുകയും ചെയ്യുന്ന, വളരെ അടുപ്പം പുലര്‍ത്തുന്ന സ്ത്രീകളെ ഇതിൽ കാണാം. 1800 -ന്‍റെയും 1900 -ന്‍റെയും തുടക്കത്തിൽ പരസ്യമായി പരസ്‍പരം പ്രണയിക്കാൻ ചങ്കൂറ്റം കാണിച്ച സ്ത്രീകളുടെ വേറിട്ട മുഖമാണ് ഇതിലൂടെ പ്രകടമാകുന്നത്.
വിക്ടോറിയൻ കാലഘട്ടത്തിലും, ഇരുപതാം നൂറ്റാണ്ടിലും ഇത്തരം ഇണക്കങ്ങളുടെ കഥ പറയുന്ന ചിത്രങ്ങൾ അസാമാന്യ ധൈര്യത്തിന്‍റെ ഒരു പ്രകടനം തന്നെയായിരുന്നു. വിക്ടോറിയൻ കാലഘട്ടത്തിൽ ഒരു പുരുഷന് മറ്റൊരു പുരുഷനോട് സ്നേഹം തോന്നുന്നത് നിയമത്തിന്‍റെ മുന്നിൽ കുറ്റകരമായിരുന്നു. എന്നാൽ, സ്ത്രീകൾ തമ്മിലുള്ള ലൈംഗികത പലപ്പോഴും നിയമത്തിന്‍റെ കണ്ണിൽ നിന്നും ഒഴിവാക്കപ്പെട്ടിരുന്നു. പത്തൊൻപതാം നൂറ്റാണ്ടിലെ കലകളിൽ പോലും സ്വവർഗ്ഗ ലൈംഗികതയുടെ പ്രകടനം കാണാം. എന്നിരുന്നാലും പരസ്യമായ ലൈംഗിക പ്രകടനങ്ങളെ ഒരിക്കലും ആ കാലഘട്ടം അംഗീകരിച്ചിരുന്നില്ല. അതുകൊണ്ടുതന്നെ അത്തരം പഴയ ചിത്രങ്ങൾ മിക്കവയും കുടുംബാംഗങ്ങൾ തന്നെ നശിപ്പിച്ചിരിക്കാം. എന്നാൽ, ശേഷിച്ച ഈ ചിത്രങ്ങൾ കാലത്തെ അതിജീവിച്ച് നിലനിൽക്കുന്നത് അസാധാരണമാണ്. ഇംഗ്ലണ്ടിലും വെയിൽസിലും രണ്ട് സ്ത്രീകൾ ബന്ധത്തിൽ ഏർപ്പെടുന്നത് നിയമവിരുദ്ധമല്ലെങ്കിലും, സ്വവർഗ ദമ്പതികളെ വലിയ തോതിൽ സമൂഹം എതിർത്തിരുന്നു.