Diet For Lungs : ശ്വാസകോശത്തിന്റെ ആരോഗ്യത്തിന് കഴിക്കാം ഈ ആറ് ഭക്ഷണങ്ങള്...
Synopsis
പുകവലി ഒഴിവാക്കുകയും മലിനവായു ശ്വസിക്കാതിരിക്കുകയും ജീവിതശൈലിയില് ചില മാറ്റങ്ങള് വരുത്തുകയും ചെയ്താല് തന്നെ ഒരു പരിധി വരെ ശ്വാസകോശത്തെ സംരക്ഷിക്കാന് കഴിയും.
നമ്മുടെ ശരീരത്തിലെ ഏറ്റവും പ്രധാനപ്പെട്ട അവയവങ്ങളില് ഒന്നാണ് ശ്വാസകോശം (Lungs). അതുകൊണ്ടുതന്നെ അവയെ ആരോഗ്യത്തോടെ നിലനിര്ത്തേണ്ടത് വളരെ പ്രധാനമാണ്. പലപ്പോഴും ചിട്ടയില്ലാത്ത ജീവിതശൈലിയാണ് (lifestyle) ശ്വാസകോശസംബന്ധമായ രോഗങ്ങള്ക്ക് കാരണം.
പുകവലി (smoking) ഒഴിവാക്കുകയും മലിനവായു ശ്വസിക്കാതിരിക്കുകയും ജീവിതശൈലിയില് ചില മാറ്റങ്ങള് വരുത്തുകയും ചെയ്താല് തന്നെ ഒരു പരിധി വരെ ശ്വാസകോശത്തെ സംരക്ഷിക്കാന് കഴിയും. ശ്വാസകോശത്തിന്റെ ആരോഗ്യത്തിനായി ഭക്ഷണകാര്യത്തിലും പ്രത്യേകം ശ്രദ്ധ വേണം. അത്തരത്തില് ശ്വാസകോശത്തിന്റെ ആരോഗ്യത്തിന് സഹായിക്കുന്ന ചില ഭക്ഷണങ്ങള് ഏതൊക്കെയെന്ന് നോക്കാം.
ഒന്ന്...
ആന്റി ഓക്സിഡന്റുകള് ധാരാളം അടങ്ങിയ ബെറി പഴങ്ങള് ആണ് ആദ്യമായി ഈ പട്ടികയില് ഉള്പ്പെടുന്നത്. സ്ട്രോബെറി, ബ്ലൂബെറി, ബ്ലാക്ക്ബെറി, റാസ്പ്ബെറി തുടങ്ങിയ ബെറി പഴങ്ങള് ശ്വാസകോശത്തിന്റെ ആരോഗ്യത്തിന് ഏറെ നല്ലതാണ്. ഒപ്പം കൊളസ്ട്രോളില് നിന്നും രക്ഷ നേടാനും ഹൃദയത്തിന്റെ ആരോഗ്യത്തിനും ഇവ ഡയറ്റില് ഉള്പ്പെടുത്തുന്നത് നല്ലതാണ്.
രണ്ട്...
ഏതെങ്കിലുമൊരു പച്ചിലക്കറി ദിവസവും ശീലമാക്കാം. ചീര, കാബേജ്, മുരിങ്ങയില തുടങ്ങിയവയില് ഏതെങ്കിലുമൊന്ന് ഭക്ഷണത്തില് ഉള്പ്പെടുത്തുന്നത് ശ്വാസകോശത്തെ ബാധിക്കുന്ന അര്ബുദത്തെ തടയാന് സഹായിക്കുമെന്നാണ് പഠനങ്ങള് പറയുന്നത്.
മൂന്ന്...
തക്കാളി പോഷകങ്ങളുടെയും വിറ്റാമിനുകളുടെയും കലവറയാണ്. വിറ്റാമിന് എ, വിറ്റാമിന് സി, വിറ്റാമിന് കെ, പൊട്ടാസ്യം, മാംഗനീസ്, മഗ്നീഷ്യം, ഫോസ്ഫറസ്, നാരുകള്, പ്രോട്ടീന് എന്നിവ തക്കാളിയില് അടങ്ങിയിരിക്കുന്നു. തക്കാളിയില് അടങ്ങിയിരിക്കുന്ന ലൈക്കോപീന് ശ്വാസകോശത്തിന്റെ ആരോഗ്യത്തിന് ഏറെ നല്ലതാണ്. അതിനാല് ഇടയ്ക്ക് തക്കാളി ജ്യൂസ് കുടിക്കുന്നത് നല്ലതാണ്.
നാല്...
ബീറ്റ്റൂട്ടാണ് ആണ് അടുത്തതായി ഈ പട്ടികയില് ഉള്പ്പെടുന്നത്. നൈട്രേറ്റ് ധാരാളം അടങ്ങിയ ബീറ്റ്റൂട്ട് ശ്വാസകോശത്തിന്റെ ആരോഗ്യത്തിന് മികച്ചതാണ്. കൂടാതെ വിറ്റാമിന് സി, പൊട്ടാസ്യം, മഗ്നീഷ്യം തുടങ്ങിയവ അടങ്ങിയ ബീറ്റ്റൂട്ട് ശരീരത്തിന്റെ മൊത്തം ആരോഗ്യത്തിനും നല്ലതാണ്.
അഞ്ച്...
ആന്റി ഓക്സിഡന്റുകളും ഫ്ലവനോയിഡുകളും വിറ്റാമിൻ സിയും ധാരാളം അടങ്ങിയിട്ടുള്ള ആപ്പിള് ദിവസവും കഴിക്കുന്നത് ശ്വാസകോശത്തിന്റെ ആരോഗ്യത്തിന് നല്ലതാണ്. വിറ്റാമിൻ ബി , പൊട്ടാസ്യം, കാത്സ്യം എന്നിവ അടങ്ങിയിട്ടുള്ള ആപ്പിള് ഹൃദയത്തിന്റെ ആരോഗ്യത്തിനും നല്ലതാണ്.
ആറ്...
ശ്വാസകോശത്തെ സംരക്ഷിക്കാന് ഭക്ഷണത്തില് മഞ്ഞള് ധാരാളമായി ഉള്പ്പെടുത്താം. 'കുര്കുമിന്' എന്ന രാസവസ്തുവാണ് മഞ്ഞളിന് അതിന്റെ നിറം നല്കുന്നത്. ഇത് അനേകം രോഗാവസ്ഥകളില് പ്രയോജനം ചെയ്യുന്നതാണ്. ശ്വാസകോശത്തെ ബാധിക്കുന്ന വൈറസിനെതിരേയും മഞ്ഞള് ഫലപ്രദമെന്ന് തെളിഞ്ഞിട്ടുണ്ട്.
Also Read: സമ്മർദ്ദം കുറയ്ക്കാൻ കഴിക്കാം ഈ ഭക്ഷണങ്ങൾ
ഏഷ്യാനെറ്റ് ന്യൂസ് മലയാളത്തിലൂടെ Health News അറിയൂ. Food and Recipes തുടങ്ങി മികച്ച ജീവിതം നയിക്കാൻ സഹായിക്കുന്ന ടിപ്സുകളും ലേഖനങ്ങളും — നിങ്ങളുടെ ദിവസങ്ങളെ കൂടുതൽ മനോഹരമാക്കാൻ Asianet News Malayalam