Health Tips: മഴക്കാലത്ത് കൊതുകിനെ തുരത്താന് വീടിനുള്ളില് ചെയ്യേണ്ട കാര്യങ്ങള്...
Synopsis
ഡെങ്കിപ്പനി, ചിക്കുൻഗുനിയ, മലമ്പനി, മലേറിയ എന്നു വേണ്ട ഒട്ടുമിക്ക അസുഖങ്ങളും പരത്തുന്നത് കൊതുകുകളാണ്. കൊതുകുകളെ പൂര്ണമായി നശിപ്പിക്കുക സാധ്യമല്ലെങ്കിലും ജാഗ്രതയോടെയുള്ള ശുചിത്വ ശീലങ്ങള് കൈക്കൊണ്ടാല് അവയുടെ വ്യാപനം കുറയ്ക്കാന് കഴിയുന്നതാണ്.
രാജ്യത്ത് കൊതുകുജന്യ രോഗങ്ങള് വര്ധിച്ചു വരുന്നതായാണ് പല കണക്കുകളും സൂചിപ്പിക്കുന്നത്. പ്രത്യേകിച്ച് മലക്കാലത്ത് കൊതുകുകള് പെരുകാന് സാധ്യത ഏറെയാണ്. ഡെങ്കിപ്പനി, ചിക്കുൻഗുനിയ, മലമ്പനി, മലേറിയ എന്നു വേണ്ട ഒട്ടുമിക്ക അസുഖങ്ങളും പരത്തുന്നത് കൊതുകുകളാണ്. കൊതുകുകളെ പൂര്ണമായി നശിപ്പിക്കുക സാധ്യമല്ലെങ്കിലും ജാഗ്രതയോടെയുള്ള ശുചിത്വ ശീലങ്ങള് കൈക്കൊണ്ടാല് അവയുടെ വ്യാപനം കുറയ്ക്കാന് കഴിയുന്നതാണ്. വീടിന് ചുറ്റും വെള്ളം കെട്ടി നില്ക്കാതെ നോക്കുകയാണ് പ്രധാന പരിഹാരം.
കൊതുകിനെ തുരത്താന് വീട്ടില് തന്നെ ചെയ്യാവുന്ന ചില കാര്യങ്ങള് എന്തൊക്കെയാണെന്ന് നോക്കാം...
ഒന്ന്...
വീടിന് ചുറ്റും വെള്ളം കെട്ടി നില്ക്കാതെ നോക്കുക എന്നതാണ് ആദ്യം ചെയ്യേണ്ടത്. സെപ്റ്റിക് ടാങ്കുകളും വെള്ളം സൂക്ഷിക്കുന്ന സംഭരണികളും എല്ലാം അടച്ചുവയ്ക്കണം. തുറന്നതും കുടിക്കാനും കുളിക്കാനും ഉപയോഗിക്കാത്തതുമായ ജലശേഖരങ്ങളിൽ കൊതുകിന്റെ മുട്ട വിരിഞ്ഞിറങ്ങുന്ന ലാർവകളെ നശിപ്പിക്കാൻ മണ്ണെണ്ണയോ മറ്റു രാസലായനികളോ തളിക്കാം.
രണ്ട്...
കൊതുകുവലകൾ ഉപയോഗിച്ച് വാതിലും ജനലും മൂടുക. ജനലുകളും വാതിലുകളും സന്ധ്യയ്ക്കുമുമ്പ് അടച്ചിട്ട് അവ നേരിയ കമ്പിവലയുപയോഗിച്ചു മൂടണം.
മൂന്ന്...
കൊതുകിൽ നിന്ന് രക്ഷ നേടാനുള്ള ഉത്തമമാർഗമാണ് വെളുത്തുള്ളി. വെളുത്തുള്ളി ചതച്ചെടുത്ത് വെള്ളത്തിലിട്ടു ചൂടാക്കിയ ശേഷം മുറിയിൽ തളിച്ചാൽ കൊതുകിനെ അകറ്റാം.
നാല്...
ഗ്രാമ്പൂവിന്റെയും നാരങ്ങയുടെയും മണം കൊതുകിന് അലോസരമുണ്ടാക്കും എന്നാണ് ചില പഠനങ്ങള് സൂചിപ്പിക്കുന്നത്. അതുകൊണ്ടുതന്നെ, ചെറുനാരങ്ങയില് ഗ്രാമ്പൂ കുത്തി മുറികളില് വയ്ക്കുന്നത് കൊതുകിനെ തുരത്താന് നല്ലതാണ്. അതുപോലെതന്നെ, നാരങ്ങയും ഗ്രാമ്പൂവും കറുവപ്പട്ടയും ഇട്ട് തിളപ്പിച്ച വെള്ളം തണുത്തതിന് ശേഷം റൂമില് സ്പ്രേ ചെയ്താല് കൊതുക് ശല്യം ഉണ്ടാവില്ല എന്നാണ് 'സെന്റര് ഫോര് ഡിസീസ് കണ്ട്രോള്' തന്നെ അഭിപ്രായപ്പെടുന്നത്.
അഞ്ച്...
വേപ്പില എണ്ണ ശരീരത്ത് പുരട്ടുന്നത് കൊതുക് കടിക്കാതിരിക്കാന് സഹായിക്കുമെന്നാണ് 'അമേരിക്കന് മൊസ്കിറ്റോ കണ്ട്രോള് അസോസിയേഷ'ന്റെ ജേണലില് പറയുന്നത്. അതുപോലെ തന്നെ, കര്പ്പൂരത്തിനൊപ്പം ആര്യവേപ്പില കൂടി ഉണക്കി കത്തിച്ചാല് കൊതുക് വരില്ല. വേപ്പെണ്ണ മുറിയില് സ്പ്രേ ചെയ്യുന്നതും കൊതുകിനെ ഓടിക്കാന് നല്ലതാണ്.
ആറ്...
തുളസിയില പുകയ്ക്കുകയോ മുറിയില് വയ്ക്കുകയോ ചെയ്യുന്നത് കൊതുകിനെ തുരത്താനുള്ള മറ്റൊരു വഴിയാണ്. മുറിക്കുള്ളില് കൊതുക് പ്രവേശിക്കാതിരിക്കാന് ജനാലകളിലോ വാതിലിന് പുറത്തോ തുളസിയില വയ്ക്കാം.
കൊതുക് കടിച്ചാല് ആ അസ്വസ്ഥതകൾ കുറയ്ക്കാൻ വീട്ടില് ചെയ്യേണ്ട കാര്യങ്ങള് എന്തൊക്കെയാണെന്ന് നോക്കാം...
1. കൊതുക് കടിച്ച ഭാഗത്ത് ഐസ് വയ്ക്കുന്നത് വേദന മാറാന് സഹായിക്കും.
2. കറ്റാര്വാഴയുടെ ജെല് കൊതുക് കടിച്ച ഭാഗത്ത് പുരട്ടുന്നതും നല്ലതാണ്.
3.കൊതുക് കടിച്ച ഭാഗത്ത് തേന് പുരട്ടുന്നതും വേദനയും അസ്വസ്ഥതയും മാറാന് സഹായിക്കും.
4. ഉള്ളി നീര് കൊതുക് കടിച്ച ഭാഗത്ത് വയ്ക്കുന്നതും അസ്വസ്ഥതകൾ കുറയ്ക്കാൻ സഹായിക്കും.
Also Read: പല്ലുകളിലെ കറ മാറാന് പരീക്ഷിക്കാം ഈ 12 വഴികള്...
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം
ഏഷ്യാനെറ്റ് ന്യൂസ് മലയാളത്തിലൂടെ Health News അറിയൂ. Food and Recipes തുടങ്ങി മികച്ച ജീവിതം നയിക്കാൻ സഹായിക്കുന്ന ടിപ്സുകളും ലേഖനങ്ങളും — നിങ്ങളുടെ ദിവസങ്ങളെ കൂടുതൽ മനോഹരമാക്കാൻ Asianet News Malayalam