ക്യാൻസർ അതിജീവനം: ജാഗ്രതയോടെ പുതുജീവിതത്തിലേക്ക് കടക്കാം; ആരോഗ്യ സംരക്ഷണം ഇങ്ങനെ

ക്യാൻസർ അതിജീവിച്ചവരുടെ ദീർഘകാല ആരോഗ്യം നിലനിർത്താനും ജീവിതനിലവാരം മെച്ചപ്പെടുത്തുന്നതിനുമുള്ള പരിചരണം ആവശ്യമാണ്. സർവൈവർഷിപ്പ് കെയറിനെ കുറിച്ച് എഴുതുകയാണ് ആസ്റ്റർ മിംസ് കണ്ണൂരിലെ മെഡിക്കൽ ഓൺകോളജി വിഭാഗം മേധാവി ഡോ. മനു പ്രസാദ്.

മനുഷ്യന്റെ നിശ്ചയദാർഢ്യത്തിന്റെയും പ്രത്യാശയുടെയും ഉദാത്തമായ ഓർമ്മപ്പെടുത്തലാണ് ദേശീയ ക്യാൻസർ സർവൈവേഴ്‌സ് ദിനം. ക്യാൻസർ എന്ന രോഗനിർണ്ണയത്തെ ധീരതയോടെ നേരിട്ട ദശലക്ഷക്കണക്കിന് ആളുകളെ ആദരിക്കാനും, ഒട്ടനവധി മനുഷ്യർക്ക് അതിജീവനം സാധ്യമാക്കിയ ഓങ്കോളജി രംഗത്തെ മികച്ച പുരോഗതികളെ ആഘോഷിക്കാനുമുള്ള സമയമാണിത്. സജീവമായ ചികിത്സകൾ അവസാനിക്കുന്നത് കൊണ്ട് മാത്രം ക്യാൻസർ യാത്ര അവസാനിക്കുന്നില്ല. പലർക്കും ഇത് 'സർവൈവർഷിപ്പ്' എന്ന പുതിയൊരു ജീവിതഘട്ടത്തിന്റെ തുടക്കം മാത്രമാണ്.

ചികിത്സ പൂർത്തിയാക്കി മടങ്ങുന്ന രോഗികളിൽ വലിയ ആശ്വാസത്തോടൊപ്പം തന്നെ ഭാവിയെക്കുറിച്ചുള്ള നേരിയ ആശങ്കയും കാണാറുണ്ട്. തീവ്രപരിചരണ അന്തരീക്ഷത്തിൽ നിന്നും പെട്ടെന്ന് സാധാരണ ജീവിതത്തിലേക്ക് മാറുമ്പോൾ ഈ അങ്കലാപ്പ് സ്വാഭാവികമാണ്. ആധുനിക ഓങ്കോളജിയുടെ ലക്ഷ്യം രോഗം മാറ്റുക എന്നതിലുപരി, വ്യക്തിയെ പൂർണ്ണ ആരോഗ്യത്തോടെ ജീവിതത്തിലേക്ക് തിരികെ കൊണ്ടുവരുക എന്നതാണ്. ഇതിനായി ചികിത്സയ്ക്ക് ശേഷമുള്ള കാലയളവിന് കൃത്യമായ മുൻഗണന നൽകേണ്ടതുണ്ട്.

പുതിയ ജീവിതത്തിലെ വെല്ലുവിളികൾ

ക്യാൻസർ ചികിത്സകൾ ശരീരത്തിലും മനസ്സിലും വലിയ ആഘാതം ഉണ്ടാക്കാറുണ്ട്. ഇതിന്റെ ശാരീരിക-മാനസിക മാറ്റങ്ങൾ വർഷങ്ങളോളം നീണ്ടുനിന്നേക്കാം. അതുകൊണ്ടുതന്നെ രോഗമില്ലാത്ത അവസ്ഥയിലും തുടർച്ചയായ നിരീക്ഷണം ആവശ്യമാണ്. രോഗികൾ പ്രധാനമായും രണ്ട് തരത്തിലുള്ള പാർശ്വഫലങ്ങളാണ് നേരിടുന്നത്. ചികിത്സാ സമയത്ത് തുടങ്ങി നീണ്ടുനിൽക്കുന്ന ദീർഘകാല പ്രത്യാഘാതങ്ങളും, ചികിത്സ കഴിഞ്ഞ് മാസങ്ങളോ വർഷങ്ങളോ കഴിഞ്ഞ് മാത്രം പുറത്തുവരുന്ന വൈകിയുള്ള പ്രത്യാഘാതങ്ങളും.

അതിജീവിതരിൽ സാധാരണയായി കഠിനമായ തളർച്ച, ഉറക്കക്കുറവ്, അസ്ഥിക്ഷയം, പേശീവേദന, കൈകാലുകളിൽ തരിപ്പ് ഉണ്ടാക്കുന്ന ന്യൂറോപ്പതി, ലിംഫ് നോഡുകളുടെ തകരാർ മൂലമുള്ള ലിംഫെഡീമ എന്നിവ കാണപ്പെടാറുണ്ട്. കൂടാതെ, ചില മരുന്നുകളും റേഡിയേഷനും ഹൃദയപേശികളെ ബാധിക്കുന്ന കാർഡിയോടോക്സിസിറ്റി, ശ്വാസകോശത്തിലെ തഴമ്പുകൾ, തൈറോയ്ഡ് പ്രവർത്തനങ്ങൾ മന്ദീഭവിക്കുന്ന അവസ്ഥ, കോഗ്നിറ്റീവ് തകരാറുകൾ, ഉത്കണ്ഠ, വിഷാദം എന്നിവയും ഉണ്ടാകാം. വളരെ അപൂർവ്വമായി, മുൻപ് ലഭിച്ച റേഡിയേഷൻ അല്ലെങ്കിൽ കീമോതെറാപ്പിയുടെ പാർശ്വഫലമായി വർഷങ്ങൾക്ക് ശേഷം പുതിയൊരു ക്യാൻസർ വരാനുള്ള സാധ്യതയുമുണ്ട്. ഈ പ്രശ്നങ്ങളെല്ലാം മുൻകൂട്ടി കണ്ട് പ്രതിരോധിക്കുക എന്നതാണ് സമഗ്രമായ സർവൈവർഷിപ്പ് പരിചരണത്തിന്റെ ലക്ഷ്യം.

സർവൈവർഷിപ്പ് പരിചരണത്തിന്റെ നാല് പ്രധാന ഘടകങ്ങൾ

നിരീക്ഷണവും പരിശോധനയും

ക്യാൻസർ വീണ്ടും വരുന്നത് തുടക്കത്തിലെ കണ്ടെത്താനും പുതിയ ക്യാൻസറുകൾ വരാനുള്ള സാധ്യത നിരീക്ഷിക്കാനും കൃത്യമായ പരിശോധനകൾ ആവശ്യമാണ്. എന്നാൽ രോഗലക്ഷണങ്ങളില്ലാത്ത അവസ്ഥയിൽ അനാവശ്യമായ പരിശോധനകൾ ഒഴിവാക്കുകയും വേണം.

പാർശ്വഫലങ്ങളുടെ നിർമ്മാർജ്ജനം

ചികിത്സ മൂലമുണ്ടായ ശാരീരിക-മാനസിക ബുദ്ധിമുട്ടുകൾക്ക് ഫിസിയോതെറാപ്പി, കൗൺസിലിംഗ്, പുനരധിവാസ സേവനങ്ങൾ എന്നിവയിലൂടെ പരിഹാരം കാണുന്നു.

ആരോഗ്യ സംരക്ഷണം

ശരിയായ പോഷകാഹാരം, വ്യായാമം, ശരീരഭാര നിയന്ത്രണം, പുകവലി-മദ്യപാന വർജ്ജനം എന്നിവയിലൂടെ ആരോഗ്യം മെച്ചപ്പെടുത്തുകയും രോഗസാധ്യതകൾ കുറയ്ക്കുകയും ചെയ്യുന്നു.

പരിചരണ ഏകോപനം

രോഗിയുടെ ചികിത്സാ വിവരങ്ങളും ഫോളോ അപ്പ് നിർദ്ദേശങ്ങളും അടങ്ങിയ 'സർവൈവർഷിപ്പ് കെയർ പ്ലാൻ' ഓരോ രോഗിക്കും നൽകുന്നത് വളരെ ഉപയോഗപ്രദമാണ്. രോഗിക്ക് മുൻപ് ലഭിച്ച ശസ്ത്രക്രിയ, കീമോതെറാപ്പി, റേഡിയേഷൻ തുടങ്ങിയ ചികിത്സകളുടെ കൃത്യമായ വിവരങ്ങളും, ഭാവിയിൽ അവർ നടത്തേണ്ട സ്കാനിങ്ങുകൾ, രക്തപരിശോധനകൾ എന്നിവയുടെ സമയക്രമവും ഇതിൽ ഉൾപ്പെടുത്തിയിരിക്കണം. ദീർഘകാല തുടർപരിശോധനകളിൽ പ്രാഥമിക ആരോഗ്യ പരിരക്ഷാ ദാതാക്കൾക്ക് വലിയ പങ്കുണ്ട്. ഇത് ക്യാൻസർ സെന്ററുകളിലേക്കുള്ള ദൂരവും മാനസിക ഉത്കണ്ഠയും ചികിത്സാച്ചെലവും കുറയ്ക്കാൻ സഹായിക്കും. കൂടാതെ, മുൻകാല ചികിത്സകൾ കാരണം വർദ്ധിക്കാൻ സാധ്യതയുള്ള രക്തസമ്മർദ്ദം, പ്രമേഹം തുടങ്ങിയ മറ്റ് രോഗങ്ങളെ നിയന്ത്രിക്കാനും ഇവർക്ക് സാധിക്കും.

അതുകൊണ്ട് തന്നെ ഓങ്കോളജിസ്റ്റോ, പ്രത്യേക സർവൈവർഷിപ്പ് ക്ലിനിക്കോ, പ്രാഥമിക ആരോഗ്യ പരിരക്ഷാ ദാതാവോ ആകട്ടെ അവരുമായുള്ള കൃത്യമായ തുടർപരിശോധനകളിൽ യാതൊരു വിട്ടുവീഴ്ചയും വരുത്തരുത്. വൈകി ഉണ്ടാകുന്ന പാർശ്വഫലങ്ങൾ വിലയിരുത്താനും, രോഗം വീണ്ടും വരുന്നുണ്ടോ എന്ന് നിരീക്ഷിക്കാനും, രോഗം വീണ്ടുമെന്ന ഭയം പോലുള്ള മാനസിക ബുദ്ധിമുട്ടുകൾ കൈകാര്യം ചെയ്യാനും ഈ കൂടിക്കാഴ്ചകൾ അത്യാവശ്യമാണ്. കൃത്യമായ ദീർഘകാല നിരീക്ഷണത്തിലൂടെയും ആരോഗ്യകരമായ ജീവിതശൈലിയിലൂടെയും ക്യാൻസറിന് ശേഷമുള്ള ജീവിതം കൂടുതൽ മനോഹരവും പ്രചോദനാത്മകവുമാക്കാൻ നമുക്ക് സാധിക്കും.

ഡോ. മനു പ്രസാദ്

മെഡിക്കൽ ഓൺകോളജി വിഭാഗം മേധാവി

ആസ്റ്റർ മിംസ് കണ്ണൂർ