തൊണ്ടയിലെ ക്യാന്സര്; ഈ ലക്ഷണങ്ങൾ അറിയാതെ പോകരുത്...
Synopsis
മദ്യപാനവും പുകവലിയും ലഹരി വസ്തുക്കളുടെ ഉപയോഗവുമാണ് പലപ്പോഴും തൊണ്ടയിലെ അർബുദത്തിന് കാരണമാകുന്നത്.
പ്രായ, ലിംഗ ഭേദമന്യേ ആരെയും ബാധിക്കാവുന്ന അര്ബുദമാണ് തൊണ്ടയില് വരുന്ന അര്ബുദം. മൂക്കിന് പിന്നില് ആരംഭിച്ച് കഴുത്തില് അവസാനിക്കുന്ന പേശികളുടെ ഒരു കുഴലാണ് തൊണ്ട. ഇവിടെ ഉണ്ടാകുന്ന കോശങ്ങളുടെ അമിത വളര്ച്ച ശ്വാസകോശ സംവിധാനത്തെ സാരമായി ബാധിക്കും. മദ്യപാനവും പുകവലിയും ലഹരി വസ്തുക്കളുടെ ഉപയോഗവുമാണ് പലപ്പോഴും തൊണ്ടയിലെ അർബുദത്തിന് കാരണമാകുന്നത്.
തൊണ്ടയില് ക്യാന്സറിന്റെ ലക്ഷണങ്ങള് എന്തൊക്കെയാണെന്ന് നോക്കാം.
ഒന്ന്...
ഒരാഴ്ചയില് കൂടുതലുള്ള ചുമ നിസ്സാരമാക്കരുത്. അതേസമയം, സാധാരണ ചുമ വന്നാല് ഇതോര്ത്ത് പേടിക്കേണ്ട. ഒരാഴ്ച നിര്ത്താതെയുള്ള ചുമ വന്നാല് ഒരു ഡോക്ടറെ കാണുക. ശ്വസിക്കാനുള്ള ബുദ്ധിമുട്ടും നിസാരമായി കാണരുത്.
രണ്ട്...
ഭക്ഷണം ഇറക്കാന് പ്രയാസം തോന്നുന്നത് ചിലപ്പോള് ഈ രോഗത്തിന്റെ ലക്ഷണമാകാം. ഇങ്ങനെ എന്തെങ്കിലും ബുദ്ധിമുട്ട് തോന്നിയാല് ഉടന് ഡോക്ടറെ കാണുക.
മൂന്ന്...
തൊണ്ടയിലെ ക്യാന്സര് ചിലപ്പോള് ചെവിയിലേക്കുള്ള രക്തക്കുഴലുകളെ സമ്മര്ദത്തില്ലാക്കാന് സാധ്യതയുണ്ട്. അതിനാല് നാലോ അഞ്ചോ ദിവസം നീണ്ടു നില്ക്കുന്ന ചെവി വേദന സൂക്ഷിക്കുക.
നാല്...
തണുപ്പ് കാലമായാല് തൊണ്ടയില് ഇന്ഫെക്ഷന് സാധാരണമാണ്. എന്നാല് മരുന്നുകള് കഴിച്ച ശേഷവും കുറഞ്ഞില്ലെങ്കില് ഡോക്ടറെ കാണുക.
അഞ്ച്...
തൊണ്ടയില് മാറാതെ നില്ക്കുന്ന മുറിവോ മുഴയോ ഉണ്ടെങ്കില് ശ്രദ്ധിക്കണം. 15-20 ദിവസങ്ങള് കഴിഞ്ഞിട്ടും വായിലെ മുറിവുകള് ഉണങ്ങുന്നില്ലെങ്കില് ഡോക്ടറെ കാണുക.
ആറ്...
പെട്ടെന്നുള്ള ശബ്ദമാറ്റം ശ്രദ്ധിക്കേണ്ടതാണ്. ശബ്ദത്തിലെ ചെറിയ മാറ്റങ്ങള് പോലും നിസ്സാരമായി കാണരുത്.
ഏഴ്...
മൂക്കില് നിന്ന് രക്തസ്രാവം, വിട്ടു മാറാത്ത മൂക്കടപ്പ്, നിരന്തരമായ സൈനസ് അണുബാധ, ഇടയ്ക്കിടെ ഉണ്ടാകുന്ന തലവേദന, വിശദീകരിക്കാനാവാത്ത ഭാരനഷ്ടം തുടങ്ങിയവയും ചിലരില് തൊണ്ടയിലെ ക്യാന്സറിന്റെ ലക്ഷണങ്ങളാകാം.
മേല്പ്പറഞ്ഞ ലക്ഷണങ്ങള് ഉള്ളതുകൊണ്ട് രോഗം പിടിപ്പെട്ടതായി സ്വയം സ്ഥിരീകരിക്കരുത്. ഈ ലക്ഷണങ്ങളുള്ളവര് ഡോക്ടറുടെ സേവനം തേടി കൃത്യമായ പരിശോധനകള് നടത്തുകയാണ് വേണ്ടത്. വായ, നാക്ക്, ടോണ്സില്, ശ്വാസനാളി എന്നിങ്ങനെ പല ഭാഗങ്ങളിലേക്കും തൊണ്ടയിലെ അര്ബുദം പടരാമെന്നതിനാല് ലക്ഷണങ്ങള് ശ്രദ്ധയില്പ്പെട്ടാല് ഉടന് ഡോക്ടറെ കാണുക.
Also Read: പ്രമേഹ രോഗികൾക്ക് കഴിക്കാമോയെന്ന് സംശയമുള്ള നാല് ഭക്ഷണങ്ങള്...