Thyroid: ഈ ലക്ഷണങ്ങളെ അവഗണിക്കരുത്; തൈറോയ്ഡിന്റെ സൂചനയാകാം
Synopsis
തൈറോയ്ഡ് ഹോര്മോണിന്റെ ഉല്പാദനം കൂടുന്നതും കുറയുന്നതുമാണ് (ഹൈപ്പര് തൈറോയ്ഡിസം, ഹൈപ്പോ തൈറോയ്ഡിസം) പ്രധാന രോഗങ്ങള്.
തൈറോയ്ഡ് എന്നത് ഒരു രോഗമല്ല, എല്ലാവരിലും കാണുന്ന ഒരു ഗ്രന്ഥിയാണ് എന്നതാണ് ആദ്യം മനസ്സിലാക്കേണ്ട കാര്യം. ശരീരത്തിന്റെ വളര്ച്ചയിലും ഉപാപചയ പ്രവര്ത്തനങ്ങളിലും നിര്ണ്ണായക പങ്ക് വഹിക്കുന്ന ഒരു ഗ്രന്ഥിയാണ് തൈറോയ്ഡ്. കഴുത്തിന്റെ മുന്ഭാഗത്തായി സ്ഥിതിചെയ്യുന്ന തൈറോയ്ഡിന് ഒരു ചിത്രശലഭത്തിന് സമാനമായ ആകൃതിയാണുള്ളത്. ഈ ഗ്രന്ഥിയുടെ പ്രവര്ത്തനങ്ങളിലുണ്ടാവുന്ന ഏത് മാറ്റവും ശരീരത്തില് കാര്യമായ പ്രത്യാഘാതങ്ങളുണ്ടാക്കും.
തൈറോയ്ഡ് ഹോര്മോണിന്റെ ഉല്പാദനം കൂടുന്നതും കുറയുന്നതുമാണ് (ഹൈപ്പര് തൈറോയ്ഡിസം, ഹൈപ്പോ തൈറോയ്ഡിസം) പ്രധാന രോഗങ്ങള്. വിവിധ തൈറോയ്ഡ് രോഗങ്ങളെ സൂചിപ്പിക്കുന്ന നിരവധി ലക്ഷണങ്ങളുണ്ട്. അവയാകട്ടെ നമ്മുടെ നിത്യ ജീവിതത്തില് പ്രകടമാകുന്നവയുമാണ്. തൈറോയ്ഡ് രോഗങ്ങളെ നേരത്തെ കണ്ടെത്താനുളള ലക്ഷണങ്ങള് എന്തൊക്കെയാണെന്ന് നോക്കാം...
ഒന്ന്...
കഴുത്തിൽ നീർക്കെട്ടുപോലെ തോന്നുക, കാഴ്ചയിൽ കഴുത്തിൽ മുഴപോലെ വീർപ്പു കാണുക, അടഞ്ഞ ശബ്ദം എന്നിവയെല്ലാം തൈറോയ്ഡ് പ്രശ്നങ്ങളുടെ സൂചനകളാകാം.
രണ്ട്...
ഒരു കാരണവുമില്ലാതെ ക്ഷീണം പലര്ക്കും അനുഭവപ്പെടാറുണ്ട്. ദൈനംദിന പ്രവൃത്തികൾ ചെയ്യുന്നതിനുള്ള ഉന്മേഷം ചോർന്നു പോകുന്ന പോലെ തോന്നാം. പല രോഗങ്ങള്ക്കും ഈ ലക്ഷണം ഉണ്ടാകാം. ഒരു കാരണവും ഇല്ലാതെയും ഇങ്ങനെയുണ്ടാകാം. എന്തായാലും ഈ ലക്ഷണം തൈറോയ്ഡ് രോഗങ്ങളുടെയും സൂചനയാകാം. തൈറോയ്ഡ് ഹോർമോണുകളുടെ പ്രവർത്തനം കൂടിയാലും കുറഞ്ഞാലും ക്ഷീണം അനുഭവപ്പെടും. ഹൈപ്പർതൈറോയിഡിസം ഉള്ളവരിലാകട്ടെ രാത്രിയിൽ ഉറക്കം കിട്ടാതെയും വരാറുണ്ട്. പകൽ മുഴുവൻ അവർ തളർന്നു കാണപ്പെടുന്നു. ഹൈപ്പർതൈറോയിഡിസം ഉള്ള ചിലർ പതിവിലേറെ ഉർജസ്വലരായി കാണപ്പെടാറുമുണ്ട്.
മൂന്ന്...
ശരീരഭാരത്തിലുണ്ടാകുന്ന വ്യതിയാനങ്ങളും തൈറോയ്ഡിന്റെ ലക്ഷണമാകാം. തൈറോയ്ഡ് ഹോർമോണുകൾ കൂടിയാൽ ശരീരഭാരം കുറയും. ഹോർമോൺ കുറഞ്ഞാൽ ശരീരഭാരം കൂടും. അതിനാല് ശരീരത്തിന്റെ ഭാരവ്യതിയാനങ്ങളും ശ്രദ്ധിക്കണം.
നാല്...
വിഷാദം പല കാരണങ്ങള് കൊണ്ടുണ്ടാകാം. എന്നാല് ചില രോഗങ്ങളുടെ കാരണമായും ഇത് വരാറുണ്ട്. ചിലരില് ഡിപ്രഷന് പിന്നില് ഹൈപ്പോതൈറോയിഡിസമാകാം. ഉത്കണ്ഠയ്ക്കു കാരണമാകുന്നത് ഹൈപ്പർതൈറോയിഡിസവും ആകാം.
അഞ്ച്...
ആഹാരത്തിലും വ്യായാമത്തിലും ശ്രദ്ധിച്ചിട്ടും കൊളസ്ട്രോൾ ലെവൽ ഉയരുന്നുണ്ടെങ്കില്, ചിലപ്പോള് അത് ഹൈപ്പോതൈറോയിഡിസമാകാം. കൊളസ്ട്രോൾ ലെവൽ കുറയുന്നുണ്ടെങ്കിൽ അത് ഹൈപ്പർതൈറോയിഡിസത്തിന്റെ ലക്ഷണമാകാം. അതിനാല് കൊളസ്ട്രോൾ ലെവൽ ഇടയ്ക്ക് പരിശോധിക്കുന്നത് നല്ലതാണ്.
ആറ്...
ഹൈപ്പോതൈറോയിഡിസമുള്ളവരിൽ അമിത രക്തസ്രാവത്തോടു കൂടിയും അസഹ്യവേദനയോടെയും ആർത്തവം വരാം. സമയം തെറ്റി വരുന്ന ആർത്തവം, ശുഷ്കമായ ആർത്തവദിനങ്ങൾ, നേരിയ രക്തസ്രാവം എന്നിവ ഹൈപ്പർതൈറോയിഡിസവുമായി ബന്ധപ്പെട്ടിരിക്കുന്നു. ചിലരില് തൈറോയ്ഡ് രോഗം വന്ധ്യതയ്ക്ക് കാരണമാകാം.
ഏഴ്...
ചില ഉദരപ്രശ്നങ്ങളും തൈറോയ്ഡുമായി ബന്ധപ്പെട്ടതാകാം. കടുത്ത മലബന്ധം ചിലപ്പോള് ഹൈപ്പോതൈറോയിഡിസം കൊണ്ടാകാം.
മേല്പ്പറഞ്ഞ ലക്ഷണങ്ങള് ഉള്ളവര് തൈറോയ്ഡ് പിടിപെട്ടതായി കണക്കാക്കേണ്ടതില്ല. എന്നാല് ഈ ലക്ഷണങ്ങളുള്ളവര് വൈദ്യസഹായം തേടുകയും ആവശ്യമായ പരിശോധനകള് നടത്താനും തയ്യാറാകണം.
Also Read: അറിയാം അവഗണിക്കാൻ പാടില്ലാത്ത വൃക്കരോഗത്തിന്റെ ലക്ഷണങ്ങള്...