രക്തസമ്മർദ്ദം വീട്ടില് പരിശോധിക്കാം; ശ്രദ്ധിക്കേണ്ട പത്ത് കാര്യങ്ങള്...
Synopsis
രക്തസമ്മർദ്ദം യഥാസമയം കണ്ടുപിടിക്കാതിരിക്കുന്നതും ചികിത്സ തേടാതിരിക്കുന്നതുമാണ് പലപ്പോഴും അപകടകരമാകുന്നത്. മദ്യപാനം, മാനസിക സമ്മർദ്ദം, അമിതമായ ഉപ്പിന്റെ ഉപയോഗം, അമിതവണ്ണം, പുകവലി, എന്നിവ രക്തസമ്മർദ്ദം വർദ്ധിപ്പിക്കുന്നു എന്നാണ് ലോകാരോഗ്യ സംഘടന വ്യക്തമാക്കുന്നത്.
ഉയര്ന്ന രക്തസമ്മര്ദം അല്ലെങ്കില് ഹൈപ്പര് ടെന്ഷന് ഇപ്പോള് ചെറുപ്പക്കാരില് വരെ കാണപ്പെടുന്ന ഒരു രോഗമായി മാറിയിട്ടുണ്ട്. രക്തധമനികളുടെ ഭിത്തികളിൽ രക്തം ചെലുത്തുന്ന മർദമാണ് രക്തസമ്മര്ദ്ദം. രക്തസമ്മർദ്ദം മൂലം ഹൃദയാഘാതം, സ്ട്രോക്ക് പോലെയുള്ള നിരവധി പ്രശ്നങ്ങളാണ് പലരേയും പിടിപെടുന്നത്. രക്തസമ്മർദ്ദം യഥാസമയം കണ്ടുപിടിക്കാതിരിക്കുന്നതും ചികിത്സ തേടാതിരിക്കുന്നതുമാണ് പലപ്പോഴും അപകടകരമാകുന്നത്. മദ്യപാനം, മാനസിക സമ്മർദ്ദം, അമിതമായ ഉപ്പിന്റെ ഉപയോഗം, അമിതവണ്ണം, പുകവലി, എന്നിവ രക്തസമ്മർദ്ദം വർദ്ധിപ്പിക്കുന്നു എന്നാണ് ലോകാരോഗ്യ സംഘടന വ്യക്തമാക്കുന്നത്.
തലവേദന, നെഞ്ചുവേദന, നടക്കുമ്പോള് കാലുവേദന, തണുത്ത കൈകാലുകള്, മൂക്കിൽ നിന്ന് രക്തസ്രാവം ഉണ്ടാകുക, കാഴ്ച മങ്ങല്, ക്ഷീണം, തലക്കറക്കം, ഛര്ദ്ദി തുടങ്ങിയവ ചിലപ്പോള് ഉയർന്ന രക്തസമ്മർദ്ദത്തിന്റെ ലക്ഷണമാകാം. ബിപി ഇടയ്ക്കിടയ്ക്ക് കൂടുന്നവര് വീട്ടില് തന്നെ ഇത് പരിശോധന നടത്തുന്നത് നല്ലതാണ്.
രക്തസമ്മര്ദ്ദം പരിശോധിക്കുമ്പോള് ശ്രദ്ധിക്കേണ്ട കാര്യങ്ങള് എന്തൊക്കെയാണെന്ന് നോക്കാം...
ഒന്ന്...
ആദ്യമായി ബിപി നോക്കുമ്പോള് രണ്ട് കൈകളിലും നോക്കുക. ഏത് കൈയില് ആണോ ബിപി കൂടുതല് ആ കൈയിലായിരിക്കണം പിന്നീട് ബിപി നോക്കേണ്ടത്.
രണ്ട്...
ബിപി ഉപകരണം കൈയിൽ കെട്ടുന്ന ബാന്റിന്റെ നടുഭാഗത്ത് ഒരു ബ്ലാഡർ ഉണ്ട്. ഇതു ഹൃദയത്തിന്റെ നടുഭാഗത്തിന് സമാന്തരമായി വരണം. ഇതിനായി കൈകൾ ഒരു മേശപ്പുറത്ത് വച്ചതിന് ശേഷം ബിപി കഫ് കെട്ടാം.
മൂന്ന്...
രക്തസമ്മര്ദ്ദം പരിശോധിക്കുന്നതിന് അര മണിക്കൂര് മുമ്പ് ചായ, കാപ്പി എന്നിവ കുടിക്കരുത്. പുകവലിയും ഒഴിവാക്കുക.
നാല്...
കസേരയില് നടുനിവര്ത്തി ഇരുന്ന് തന്നെ പരിശോധിക്കണം.
അഞ്ച്...
രക്തസമ്മർദ്ദം അളക്കുന്നതിന് 30 മിനിറ്റ് മുമ്പെങ്കിലും ഭക്ഷണം, മദ്യം, പുകവലി എന്നിവ കഴിക്കരുത്. എന്തെങ്കിലും മരുന്ന് കഴിക്കുന്നവര് അത് കഴിക്കുന്നതിന് മുമ്പ് ബിപി നോക്കണം.
ആറ്...
വ്യായാമം, കുളി എന്നിവ കഴിഞ്ഞയുടന് തന്നെ ബിപി പരിശോധിക്കരുത്. ബിപി എടുക്കുന്നതിനു അഞ്ച്- പത്ത് മിനിറ്റ് മുമ്പ് വിശ്രമിച്ചിരിക്കണം.
ഏഴ്...
ബിപി എല്ലാ ദിവസവും ഒരേ സമയം തന്നെ നോക്കണം.
എട്ട്...
വസ്ത്രങ്ങളുടെ പുറത്തോടെ പരിശോധന നടത്തരുത്. വസ്ത്രത്തിന് മുകളിൽ ബിപി കഫ് ഇടുന്നത് കൃത്യമായ ഫലം നല്കില്ല.
ഒമ്പത്...
രക്തസമ്മർദ്ദം പരിശോധിക്കുന്ന സമയത്ത് സംസാരിക്കരുത്.
പത്ത്...
കൃത്യമായ ഫലം കിട്ടാന് മൂന്ന് തവണ വരെ പരിശോധിച്ചു നോക്കാം.
Also Read: തൈറോയ്ഡ് രോഗികള്ക്ക് ഡയറ്റില് ഉള്പ്പെടുത്താം ഈ എട്ട് പാനീയങ്ങള്...
ഏഷ്യാനെറ്റ് ന്യൂസ് മലയാളത്തിലൂടെ Health News അറിയൂ. Food and Recipes തുടങ്ങി മികച്ച ജീവിതം നയിക്കാൻ സഹായിക്കുന്ന ടിപ്സുകളും ലേഖനങ്ങളും — നിങ്ങളുടെ ദിവസങ്ങളെ കൂടുതൽ മനോഹരമാക്കാൻ Asianet News Malayalam