വെള്ളിയാഴ്ച വൈകുന്നേരത്തെ കണക്കനുസരിച്ച് രാജ്യത്തെ കൊവിഡ് രോഗബാധിതരുടെ എണ്ണം 724 ആയി ഉയർന്നു. 17 പേരാണ് ഇതുവരെ കൊവിഡ് ബാധ മൂലം മരണപ്പെട്ടത്.
ദില്ലി: രാജ്യത്തെ കൊവിഡ് ബാധിതരുടെ എണ്ണത്തിൽ വർധന തുടരുന്നു. കഴിഞ്ഞ 24 മണിക്കൂറിനിടെ രാജ്യത്ത് 75 പേർക്ക് കൂടി കൊവിഡ് വൈറസ് ബാധ സ്ഥിരീകരിച്ചു. നാല് പേരാണ് ഈ മണിക്കൂറുകളിൽ കൊവിഡ് ബാധ മൂലം മരണപ്പെട്ടത്. വെള്ളിയാഴ്ച വൈകുന്നേരത്തെ കണക്കനുസരിച്ച് രാജ്യത്തെ കൊവിഡ് രോഗബാധിതരുടെ എണ്ണം 724 ആയി ഉയർന്നു. 17 പേരാണ് ഇതുവരെ കൊവിഡ് ബാധ മൂലം മരണപ്പെട്ടത്.
അതേസമയം പൊതുമേഖല സ്ഥാപനമായ ബിഇഎൽ 30,000 വെൻ്റെിലേറ്ററുകൾ രണ്ട് മാസത്തിനുള്ളിൽ തയ്യാറാക്കും. പതിനായിരം വെൻ്റിലേറ്ററുകൾ മറ്റു പൊതുമേഖല സ്ഥാപനങ്ങളെ കൊണ്ടു നിർമ്മിക്കാനും തീരുമാനമായിട്ടുണ്ട്. രാജ്യത്തെ വൻകിട വ്യവസായ ഗ്രൂപ്പായ മഹീന്ദ്ര പതിനായിരം രൂപ മാത്രം വില വരുന്ന ചെറു വെൻ്റിലേറ്റുകൾ ഉണ്ടാക്കും എന്ന് നേരത്തെ അറിയിച്ചിരുന്നു. രണ്ട് മാസത്തിനകം മിനി വെൻ്റിലേറ്റർ പരീക്ഷണാടിസ്ഥാനത്തിൽ പുറത്തിറക്കാനുള്ള ശ്രമത്തിലാണ് തങ്ങളുടെ സാങ്കേതിക സംഘമെന്ന് ആനന്ദ മഹീന്ദ്ര നേരത്തെ വ്യക്തമാക്കിയിരുന്നു.