വെള്ളമെടുക്കാൻ പോയി; 20 അടി താഴ്ചയുള്ള കിണറ്റിലേക്ക് കാൽ തെറ്റി വീണ് 80 വയസ്സുകാരി; രക്ഷപ്പെടുത്തി, വീഡിയോ

 തെലങ്കാനയിലെ കരിംന​ഗറിലാണ് സംഭവം. 20 അടിയോളം താഴ്ചയുണ്ടായിരുന്നു കിണറിന്. 

കരിം​നഗർ: വീട്ടിലെ കിണറ്റിൽ കാലുതെറ്റി വീണ 80 വയസ്സുള്ള വയോധികക്ക് രക്ഷകരായി അ​ഗ്നിശമന സേനാം​ഗംങ്ങൾ. രാവിലെ വെള്ളമെടുക്കാൻ പോയ സമയത്താണ് ഇവർ കിണറ്റിലേക്ക് കാലുതെറ്റി വീണത്. തെലങ്കാനയിലെ കരിംന​ഗറിലാണ് സംഭവം. 20 അടിയോളം താഴ്ചയുണ്ടായിരുന്നു കിണറിന്. ചെറിയ പരിക്കുകളോടെ അത്ഭുതകരമായിട്ടാണ് വയോധിക രക്ഷപ്പെട്ടത്. ഇവർ കിണറ്റിലേക്ക് വീണപ്പോൾ തന്നെ കുടുംബാം​ഗങ്ങൾ പൊലീസിൽ വിവരമറിയിക്കുകയും അവർ അ​ഗ്നിശമന സംഘത്തെ വിളിക്കുകയുമായിരുന്നു. 

രാവിലെ ആറ് മണിയോടെയാണ് സംഭവം. ഉദ്യോ​ഗസ്ഥർ സ്ഥലത്തെത്തി പരിശോധിച്ചപ്പോൾ കിണറ്റിൽ വലിയ തോതിൽ വെള്ളമില്ലെന്ന് മനസ്സിലായി. അ​ഗ്നി ശമന സേനാം​ഗങ്ങളിലൊരാൾ കിണറ്റിലിറങ്ങിയാണ് വയോധികയെ രക്ഷപ്പെടുത്തിയത്. നിസ്സാര പരിക്കുകൾ മാത്രമേ ഉള്ളൂ എന്ന് ഉദ്യോ​ഗസ്ഥർ അറിയിച്ചു. വയോധികയെ കിണറ്റിൽ നിന്നും പുറത്തെടുക്കുന്നതിന്റെ വീഡിയോ ദൃശ്യങ്ങൾ തെലങ്കാന ഫയർ സർവ്വീസസ് ഔദ്യോ​ഗിക ട്വിറ്റർ പേജിൽ പങ്കുവെച്ചിട്ടുണ്ട്.