'കൊറോണയുടെ ഉറവിടം വുഹാനാണെന്നാണ് ലോകം വിശ്വസിക്കുന്നത്'; ചൈന‍ക്കെതിരെ പരാമർശവുമായി ബിജെപി നേതാവ്

കൊറോണ വൈറസിനെ ചൈനീസ് വൈറസ് എന്ന് വിശേഷിപ്പിക്കുന്നത് ദുഷ്കീർത്തി പ്രചരണമാണെന്ന് കത്തിൽ അദ്ദേഹം പറയുന്നു. 

ദില്ലി: ചൈനയ്ക്കെതിരെ വീണ്ടും ബിജെപി നേതാവും തെലങ്കാന നിയമസഭ അംഗവുമായ രാജ സിംഗ്. കൊറോണ വൈറസിന്റെ ഉത്ഭവം ചൈനീസ് ന​ഗരമായ വുഹാനിൽ നിന്നാണെന്ന് ലോകം മുഴുവനും വിശ്വസിക്കുന്നു എന്നാണ് ടി രാജാ സിം​ഗിന്റെ ഏറ്റവും പുതിയ വിവാദ പ്രസ്താവന. പ്രസ്താവനയ്ക്കെതിരെ അനിഷ്ടം പ്രകടിപ്പിച്ച് ചൈനീസ് കൗൺസിലറായ ലിയു ബിങ് രാജാ സിം​ഗിന് കത്തയച്ചിരുന്നു. കൊറോണ വൈറസിനെ ചൈനീസ് വൈറസ് എന്ന് വിശേഷിപ്പിക്കുന്നത് ദുഷ്കീർത്തി പ്രചരണമാണെന്ന് കത്തിൽ അദ്ദേഹം പറയുന്നു. 

ലിയു ബിം​ഗിന്റെ കത്തിന് രാജാ സിം​ഗിന്റെ മറുപടി ഇപ്രകാരമായിരുന്നു. 'നിങ്ങളുടെ സന്ദേശം എനിക്ക് ലഭിച്ചു. ഞാൻ മാത്രമല്ല, ലോകം മുഴുവനുമുള്ളവർ വിശ്വസിക്കുന്നത് ചൈനീസ് ന​ഗരമായ വുഹാനിൽ നിന്നാണ് കൊറോണ പൊട്ടിപ്പുറപ്പെട്ടത് എന്നാണ്. അമേരിക്കൻ പ്രസിഡന്റ് ഡോണാൾഡ് ട്രംപ് പ്രസ്താവിച്ചത് കൊറോണ വൈറസ് അല്ല, ഇത്  ചൈനീസ് വൈറസ്  ആണ് എന്നാണ്.' സിം​ഗ് കത്തിൽ പറഞ്ഞു. കൊറോണ വൈറസിനെ പ്രതിരോധിക്കാൻ എത്രയും പെട്ടെന്ന് മരുന്ന് കണ്ടുപിടിക്കുന്ന കാര്യത്തിൽ ലോകാരോ​ഗ്യ സംഘടനയെ സഹായിക്കണമെന്നും അദ്ദേഹം അഭ്യർത്ഥിച്ചു. ഒരു ലക്ഷത്തിലധികം ജനങ്ങളാണ് കൊറോണ വൈറസ് ബാധം മൂലം ലോകത്ത് പലയിടങ്ങളിലായി മരിച്ചത്. 1.6 മില്യൺ ആളുകൾ രോ​ഗബാധിതരാണ്.