മുംബൈയിൽ കരുത്തുകാട്ടി ബിജെപി, ഒറ്റയ്ക്ക് മത്സരിച്ച കോൺ​ഗ്രസ് ഒറ്റയക്കത്തിലൊതുങ്ങി, മഹായുതി സഖ്യം ഭരണത്തിലേക്ക്

ബ്രിഹൺമുംബൈ മുനിസിപ്പൽ കോർപ്പറേഷൻ തെരഞ്ഞെടുപ്പിൽ ബിജെപി നയിക്കുന്ന മഹായുതി സഖ്യം കേവല ഭൂരിപക്ഷം നേടി. 88 സീറ്റുകൾ നേടി ബിജെപി ഏറ്റവും വലിയ ഒറ്റകക്ഷിയായപ്പോൾ, ഒറ്റയ്ക്ക് മത്സരിച്ച കോൺഗ്രസ് എട്ട് സീറ്റുകളിലൊതുങ്ങി. 

മുംബൈ: ശിവസേന പാർട്ടികളുടെ ശക്തികേന്ദ്രമായ ബ്രിഹൺമുംബൈ മുനിസിപ്പൽ കോർപ്പറേഷനിൽ കേവല ഭൂരിപക്ഷം കടന്ന് ബിജെപി നയിക്കുന്ന എൻഡിസ സഖ്യം. ആകെ 227 വാർഡുകളിൽ 88 വാർഡുകളിൽ ബിജെപി വിജയത്തിലേക്ക് കുതിക്കുന്നു. ശിവസേന ഏക്നാഥ് ഷിൻഡെ വിഭാ​ഗം 28 വാർഡുകളും വിജയിച്ചു. ഇതോടെ മഹായുതി സഖ്യം കേവല ഭൂരിപക്ഷം കടന്നു. അതേസമയം, ശിവസേന ഉദ്ധവ് താക്കറെ വിഭാ​ഗം ശക്തമായ മത്സരം കാഴ്ച വെച്ചു. ഉദ്ധവ് താക്കറെയുടെ പാർട്ടി 74 സീറ്റിൽ ഒറ്റക്ക് മുന്നിലെത്തി. അതേസമയം, ഒറ്റക്ക് മത്സരിച്ച കോൺ​ഗ്രസ് ഒറ്റയക്കത്തിലൊതുങ്ങി. വെറും എട്ട് വാർഡുകളിൽ മാത്രമാണ് കോൺ​ഗ്രസ് വിജയിച്ചത്. രാജ് താക്കറെയുടെ മഹാരാഷ്ട്ര നവനിർമാൺ സേന അഞ്ച് സീറ്റിലൊതുങ്ങി. ഇരു എൻസിപി പാർട്ടികൾക്കും ഒറ്റ സീറ്റിൽ പോലും വിജയിക്കാനായില്ല.

മഹാരാഷ്ട്ര മുൻസിപ്പൽ കോർപറേഷൻ തെരഞ്ഞെടുപ്പിൽ ബിജെപിക്ക് വൻ മുന്നേറ്റമാണുണ്ടായത്. 29 മുൻസിപ്പൽ കോർപറേഷനുകളിൽ 14 ഇടത്താണ് ബിജെപി -ശിവസേന ഏക്നാഥ് ഷിൻഡെ വിഭാഗം-എൻസിപി അജിത് പവാർ എന്ന സഖ്യം മുന്നേറുന്നത്. 13 ഇടങ്ങളിൽ ഇന്ത്യ മുന്നണിയാണ് ലീഡ് ചെയ്യുന്നത്.

മുംബൈ കോര്‍പ്പറേഷനിസല്‍ ആകെ 52.94% പോളിംഗ് രേഖപ്പെടുത്തി. നാല് വർഷത്തെ കാലതാമസത്തിന് ശേഷമാണ് തെരഞ്ഞെടുപ്പ് നടക്കുന്നത്. 2017 ലാണ് ഒടുവില്‍ ബിഎംസി തെരഞ്ഞെടുപ്പ് നടന്നത്. ഷെഡ്യൂൾ അനുസരിച്ച്, തെരഞ്ഞെടുപ്പ് 2022ല്‍ നടക്കേണ്ടതായിരുന്നു. എന്നാല്‍ കൊവിഡ് അടക്കമുള്ള കാരണങ്ങളാല്‍ തെരഞ്ഞെടുപ്പ് വൈകി.