പ്രധാനമന്ത്രി നരേന്ദ്ര മോദിക്കെതിരായ പോസ്റ്റുകൾ: മെറ്റാ ഇന്ത്യ മേധാവിക്കെതിരെയടക്കം കേസെടുത്ത് ഹൈദരാബാദ് പൊലീസ്

പ്രധാനമന്ത്രി നരേന്ദ്ര മോദിക്കെതിരെ അധിക്ഷേപകരവും മോർഫ് ചെയ്തതുമായ ദൃശ്യങ്ങൾ പ്രചരിപ്പിച്ചതിന് മെറ്റാ ഇന്ത്യ മേധാവി അരുൺ ശ്രീനിവാസിനും നിരവധി സോഷ്യൽ മീഡിയ അക്കൗണ്ടുകൾക്കുമെതിരെ ഹൈദരാബാദ് സൈബർ ക്രൈം പോലീസ് കേസെടുത്തു. ബി.ജെ.പി പ്രവർത്തകർ നൽകിയ പരാതിയുടെ അടിസ്ഥാനത്തിലാണ് നടപടി

ഹൈദരാബാദ്: പ്രധാനമന്ത്രി നരേന്ദ്ര മോദിക്കെതിരെ അധിക്ഷേപകരവും മോർഫ് ചെയ്തതുമായ ദൃശ്യങ്ങളും ചിത്രങ്ങളും പ്രചരിപ്പിച്ച സംഭവത്തിൽ മെറ്റാ ഇന്ത്യ മേധാവി അരുൺ ശ്രീനിവാസിനും നിരവധി ഫേസ്ബുക്ക്, ഇൻസ്റ്റാഗ്രാം അക്കൗണ്ടുകൾക്കുമെതിരെ തെലങ്കാനയിൽ കേസ്. ഹൈദരാബാദ് സൈബർ ക്രൈം പോലീസാണ് കേസെടുത്തത്. കോക്രോച്ച് ജനതാ പാർട്ടി നടത്തിയ പ്രതിഷേധങ്ങൾക്കിടെ വിദ്വേഷ പ്രചരണം നടത്തിയതിനാണ് നടപടി. തെലങ്കാന ബി.ജെ.പി പ്രവർത്തകനായ ടി. സായികിരൺ ഗൗഡ്, വ്യവസായിയായ എസ്. അരവിന്ദ് റെഡ്ഡി എന്നിവർ നൽകിയ പ്രത്യേക പരാതികളുടെ അടിസ്ഥാനത്തിലാണ് കേസെടുത്തിരിക്കുന്നത്.

പ്രധാനമന്ത്രിയെ വളരെ അശ്ലീലവും അപകീർത്തികരവും തെറ്റിദ്ധരിപ്പിക്കുന്നതുമായ രീതിയിൽ ചിത്രീകരിക്കുന്ന എ.ഐ ഉപയോഗിച്ച് നിർമ്മിച്ച നിരവധി വീഡിയോകളും ചിത്രങ്ങളും ഇൻസ്റ്റാഗ്രാം ഉപയോഗിക്കുന്നതിനിടെ ശ്രദ്ധയിൽപ്പെട്ടതായി പരാതിക്കാർ ആരോപിക്കുന്നു. പൊതുജനങ്ങളെ തെറ്റിദ്ധരിപ്പിക്കാനും വിദ്വേഷം വളർത്താനും സമാധാനം തകർക്കാനും വ്യക്തികളുടെ അന്തസ്സിനെ ചോദ്യം ചെയ്യാനും ലക്ഷ്യമിട്ടാണ് ഇത്തരം ഉള്ളടക്കങ്ങൾ പ്രചരിപ്പിച്ചതെന്നും, ഇതിന് വ്യാപ്തി കൂട്ടുന്ന രീതിയിലുള്ള വിദ്വേഷ കമന്റുകൾ പോസ്റ്റുകൾക്ക് താഴെ ഉടനീളം വന്നിട്ടുണ്ടെന്നും പരാതിയിൽ ചൂണ്ടിക്കാട്ടുന്നു. നേരത്തെ പ്രധാനമന്ത്രിയുടെ ഔദ്യോഗിക ഫേസ്ബുക്ക് അക്കൗണ്ടിൽ നിന്നുള്ള വീഡിയോ സാങ്കേതിക തകരാർ കാരണം താൽക്കാലികമായി ബ്ലോക്ക് ചെയ്യപ്പെട്ട സംഭവം കേന്ദ്ര സർക്കാരിന്റെ കടുത്ത അമർഷത്തിന് ഇടയാക്കിയിരുന്നു. ഇതിന് പിന്നാലെയാണ് ഹൈദരാബാദിൽ നിയമനടപടി ഉണ്ടായിരിക്കുന്നത്.

പ്രധാനമന്ത്രിയുടേത് അടക്കമുള്ള പ്രമുഖരുടെ പോസ്റ്റുകളിൽ കർശന പരിശോധന ഉറപ്പാക്കാൻ കൂടുതൽ സുരക്ഷാ സംവിധാനങ്ങൾ ഏർപ്പെടുത്തുമെന്ന് മെറ്റാ കേന്ദ്ര സർക്കാരിനെ അറിയിച്ചു. ഇനിമുതൽ പ്രധാനമന്ത്രിയുടെ അക്കൗണ്ടുമായി ബന്ധപ്പെട്ട തടസ്സങ്ങളോ തീരുമാനങ്ങളോ ഉണ്ടായാൽ മെറ്റായിലെ രണ്ട് മുതിർന്ന ഉദ്യോഗസ്ഥർ നേരിട്ട് പരിശോധിച്ച് ഉറപ്പുവരുത്തിയ ശേഷം മാത്രമേ നടപടി സ്വീകരിക്കൂ എന്ന് കമ്പനി വ്യവസ്ഥ ചെയ്തിട്ടുണ്ട്. ഉള്ളടക്ക നിയന്ത്രണം ഉൾപ്പെടെയുള്ള മറ്റ് പ്രധാന വിഷയങ്ങൾ ചർച്ച ചെയ്യുന്നതിനായി മെറ്റാ പ്രതിനിധികൾ ഉടൻ തന്നെ കേന്ദ്ര സർക്കാരുമായി ഉന്നതതല കൂടിക്കാഴ്ച നടത്തും. ഇതിനിടെ ജന്തർ മന്തറിലും ജൂലൈ 20-ന് നടന്ന 'സൻസദ് ചലോ' മാർച്ചിനിടെയും നടന്ന പ്രതിഷേധങ്ങൾക്കിടെ പ്രധാനമന്ത്രിക്കെതിരെ അധിക്ഷേപകരമായ പോസ്റ്റുകളും വീഡിയോകളും പ്രചരിപ്പിച്ച സംഭവത്തിൽ ദില്ലി പോലീസും കർശന നടപടി സ്വീകരിച്ചിട്ടുണ്ട്. അധിക്ഷേപകരമായ ഉള്ളടക്കങ്ങൾ ഉടനടി നീക്കം ചെയ്യണമെന്ന് നിർദ്ദേശിച്ച് പ്രമുഖ വാർത്താ പോർട്ടലുകളുടെ അക്കൗണ്ടുകൾ ഉൾപ്പെടെയുള്ള സോഷ്യൽ മീഡിയ പ്ലാറ്റ്‌ഫോമുകൾക്ക് ദില്ലി പോലീസ് നോട്ടീസ് അയച്ചിട്ടുണ്ട്.