'രാജസ്ഥാൻ മോഡൽ' പ്രചാരണമാക്കി കോൺ​ഗ്രസ്, താരപ്രചാരകനായി ​ഗെഹ്ലോട്ട്; കർണാടക ഒപ്പം നില്‍ക്കുമോ?

4 ലക്ഷം രാജസ്ഥാനികളാണ് കർണാടകത്തിൽ സ്ഥിരതാമസക്കാരായുള്ളത്. ഇവരിൽ ഒന്നരലക്ഷം പേരും ഇവിടെ വോട്ടുള്ളവരാണ്. സംസ്ഥാനത്തെ വോട്ടിം​ഗ് ശതമാനത്തിന്റെ നാല് ശതമാനം രാജസ്ഥാനികളാണെന്ന് ചുരുക്കം. അതുകൊണ്ട് ഇവരുടെ ഓരോ വോട്ടും നിർണാ‌യകമാണ്

ബം​ഗളൂരു: കർണാടകയിൽ തെരഞ്ഞെടുപ്പ് പ്രചരണം കൊടുമ്പിരി കൊള്ളുമ്പോൾ തങ്ങളുടെ താരപ്രചാരകനായി രാജസ്ഥാൻ മുഖ്യമന്ത്രി അശോക് ​ഗെഹ്ലോട്ടിനെ ഇറക്കി കോൺ​ഗ്രസ്. സദ്ഭരണത്തിന്റെ മാതൃക‌യായി രാജസ്ഥാനെ ഉയർത്തിക്കാ‌ട്ടാനാണ് കോൺ​ഗ്രസിന്റെ ശ്രമം. തിങ്കളാഴ്ച ബം​ഗളൂരുവിലും മാം​ഗ്ലൂരിലും ​ഗെഹ്ലോട്ട് പ്രചാരണത്തിനെത്തി‌യിരുന്നു.  രണ്ടിടത്തുമുള്ള രാജസ്ഥാനികളെ ലക്ഷ്യംവച്ചാണ് കോൺ​ഗ്രസ് നീക്കം.

4 ലക്ഷം രാജസ്ഥാനികളാണ് കർണാടകത്തിൽ സ്ഥിരതാമസക്കാരായുള്ളത്. ഇവരിൽ ഒന്നരലക്ഷം പേരും ഇവിടെ വോട്ടുള്ളവരാണ്. സംസ്ഥാനത്തെ വോട്ടിം​ഗ് ശതമാനത്തിന്റെ നാല് ശതമാനം രാജസ്ഥാനികളാണെന്ന് ചുരുക്കം. അതുകൊണ്ട് ഇവരുടെ ഓരോ വോട്ടും നിർണാ‌യകമാണ്.  മാർവാഡി വ്യാപാരി സമൂഹത്തെ സ്വാധീനിക്കാൻ ​ഗെഹ്ലോട്ടിന്റെ വരവിന് കഴിയുമെന്നാണ് കോൺ​ഗ്രസിന്റെ കണക്കുകൂട്ടൽ. രാജസ്ഥാനിൽ നിന്ന് പ്രചരണത്തിനെത്തി‌യ ഏക കോൺ​ഗ്രസ് നേതാവാണ് ​ഗെഹ്ലോട്ട്. അദ്ദേഹത്തിന്റെ രാഷ്ട്രീയ ശത്രുവായ സച്ചിൻ പൈലറ്റിനെ കോൺ​ഗ്രസ് കർണാടകയിലെത്തിച്ചില്ല എന്നതും ശ്രദ്ധേയമാണ്. 

രാജസ്ഥാനിൽ ഈ വർഷം അവസാനം തെരഞ്ഞെടുപ്പ് നടക്കാനിരിക്കുക‌യാണ്. രാജ്യത്ത് കോൺ​ഗ്രസിന് ഭരണമുള്ള ചുരുക്കം സംസ്ഥാനങ്ങളിൽ ഒന്നാണ് രാജസ്ഥാൻ. കർണാടകയിൽ പ്രചാരണത്തിനെത്തി‌യ പ്രധാനമന്ത്രി നരേന്ദ്രമോദി കഴിഞ്ഞ ആഴ്ച രാജസ്ഥാൻ കോൺ​ഗ്രസിനെ കടന്നാക്രമിച്ചിരുന്നു. മൂന്നു ദിവസത്തിനിടെ രണ്ട് തവണയാണ് മോദി രാജസ്ഥാൻ കോൺ​ഗ്രസിനെതിരെ ആഞ്ഞടിച്ചത്. കോൺ​ഗ്രസിന് വോട്ട് ചെയ്യുകയെന്നാൽ അസ്തിരമായ സർക്കാരിന് വോട്ട് ചെയ്യുക എന്നാണെന്നാണ് അദ്ദേഹം അഭിപ്രായപ്പെട്ടത്. രാജസ്ഥാനും ഛത്തീസ്​ഗഡും സൂചിപ്പിച്ചായിരുന്നു പരാമർശം. 

കോൺ​ഗ്രസിൽ മാത്രമല്ല ബിജെപിയിലും രാജസ്ഥാനിൽ ആഭ്യന്തരപ്രശ്നങ്ങളുണ്ടെന്നാണ് ഇതിനോട് ​ഗെഹ്ലോട്ട് തിരിച്ചടിച്ചത്. ജനവിധി‌യിലൂടെ അധികാരത്തിലെത്തിയ സർക്കാരിനെ അട്ടിമറിക്കലാണ് ബിജെപി മാതൃകയെന്നും അദ്ദേഹം വിമർശിച്ചു. മധ്യപ്രദേശ്, ​ഗോവ, മണിപ്പൂർ എന്നിവിടങ്ങളാണ് ഉദാഹരണമായി ചൂണ്ടിക്കാ‌ട്ടിയ‌ത്. രാജസ്ഥാനിൽ ബിജെപി‌യുടെ പരിശ്രമം പരാജയപ്പെട്ടെന്നും ​ഗെഹ്ലോട്ട് അഭിപ്രായപ്പെ‌ട്ടു. രാജസ്ഥാനിൽ കോൺ​ഗ്രസിനെ താഴെയിറക്കാൻ മുടക്കിയ പണം ബിജെപിക്ക് നഷ്ടമായി എന്നാണ് അദ്ദേഹം പരിഹസിച്ചത്.  "കോൺഗ്രസ് എവിടെ സർക്കാർ രൂപീകരിച്ചാലും, സമൂഹത്തിലെ എല്ലാ വിഭാഗങ്ങളുടെയും ഉന്നമനം ലക്ഷ്‌യമാക്കും, രാജസ്ഥാൻ മോഡൽ നടപ്പാക്കും," ഗെലോട്ട് പൊതുവേദിയിൽ പറഞ്ഞു.