പാക് ഭീകരത തുറന്നുകാട്ടാനുള്ള സംഘത്തിലേക്ക് തരൂരിനെ കോണ്ഗ്രസ് നിര്ദേശിച്ചിട്ടില്ല, പാർട്ടി ലിസ്റ്റ് പുറത്ത്
Synopsis
കോണ്ഗ്രസ് കൊടുത്ത ലിസ്റ്റില് പേരില്ലാത്ത ശശി തരൂരിനെയൈാണ് കേന്ദ്ര സര്ക്കാര് സംഘത്തില് ഉള്പ്പെടുത്തിയത്.
ദില്ലി:പാക് ഭീകരത തുറന്ന് കാട്ടാനുള്ള കേന്ദ്ര സര്ക്കാരിന്റെ വിദേശ പര്യടന സംഘത്തിലേക്ക് കോണ്ഗ്രസ് ശശി തരൂരിനെ നിര്ദേശിച്ചില്ലെന്ന് ഔദ്യോഗിക സ്ഥിരീകരണം. കോണ്ഗ്രസ് നേതാവ് ജയറാം രമേശാണ് സമൂഹ മാധ്യമത്തില് പാര്ട്ടി കൊടുത്ത ലിസ്റ്റ് പുറത്ത് വിട്ടത്. ആനന്ദ് ശർമ, ഗൗരവ് ഗൊഗോയ്, ഡോ.സയിദ് നസീർ ഹുസൈൻ, രാജാ ബ്രാർ എന്നിവരുടെ പേരുകളാണ് കോണ്ഗ്രസ് നല്കിയത്. എന്നാല് ഇതെല്ലാം തള്ളിയാണ് കേന്ദ്ര സര്ക്കാര് ശശി തരൂരിനെ പ്രതിനിധി സംഘത്തില് ഉള്പ്പെടുത്തിയത്.
പഹല് ഗാം ആക്രമണം മുതല് ഓപ്പറേഷന് സിന്ദൂര് വരെ. ലോകരാജ്യങ്ങള്ക്ക് മുന്നില് ഇന്ത്യയുടെ നിര്ണ്ണായക നാളുകള് വിശദീകരിക്കാനാണ് കേന്ദ്രസര്ക്കാര് ദൗത്യ സംഘത്തെ അയക്കുന്നത്. ഈ മാസം 22 മുതല് അടുത്ത മാസം പകുതിവരെ നീളുന്ന ദൗത്യം. എല്ലാ രാഷ്ട്രീയ പാര്ട്ടികളില് നിന്നുമുള്ള എംപിമാരും മുന് മന്ത്രിമാരും ഉള്പ്പെടുന്ന സമിതിയാകും സന്ദര്ശിക്കുക.പല സംഘങ്ങളായി യുഎസ്, യൂറോപ്പ്, മിഡില് ഈസ്റ്റ് എന്നിവിടങ്ങളിലാകും പര്യടനം. ആദ്യ സംഘത്തെ നയിക്കാന് തരൂര് എന്നതാണ് സര്ക്കാരിന്റെ തീരുമാനം .വിദേശകാര്യ പാര്ലമെന്ററി സമിതിയുടെ ചെയര്മാന്, യുഎന്നിലെ അനുഭവ പരിചയം, വിദേശ വിഷയങ്ങളിലെ അഗാധ പാണ്ഡിത്യം ഇതൊക്കെയാണ് രാഷ്ട്രീയം മാറ്റി വച്ച് തരൂരിനെ പരിഗണിച്ചതിനുള്ള ഘടകങ്ങള്.
തരൂരിനെ പരിഗണിച്ചതിലൂടെ കോണ്ഗ്രസിന്റെ ഉത്തരം മുട്ടിക്കുക കൂടിയാണ് ഉന്നം. ഇന്ത്യ പാക് സംഘര്ഷത്തില് പാര്ട്ടി നിലപാട് മറികടന്ന് കേന്ദ്രസര്ക്കാരിന് തരൂര് വലിയ പിന്തുണയാണ് നല്കുന്നത്. അഭിപ്രായ പ്രകടനത്തില് പാര്ട്ടി ലക്ഷ്മണ രേഖയും വരച്ചെങ്കിലും വിദേശകാര്യ വിഷയത്തില് സ്വന്തം നിലക്ക് അഭിപ്രായം പറയുമെന്ന് തന്നെയാണ് തരൂര് ആവര്ത്തിക്കുന്നത്.