പതിവ് വാര്‍ത്താസമ്മേളനം ഒഴിവാക്കി യെച്ചൂരി; തെരഞ്ഞെടുപ്പിലേറ്റ തിരിച്ചടി ആഴത്തിൽ വിലയിരുത്തുമെന്ന് പ്രസ്താവന

സമുദായ സംഘടനകളുടെ നിലപാടിന് പ്രാധാന്യം നൽകി കേരള ഘടകം തയ്യാറാക്കിയ റിപ്പോർട്ട് കേന്ദ്ര നേതൃത്വം നിരാകരിച്ചു

ദില്ലി: തെരഞ്ഞെടുപ്പിലേറ്റ തിരിച്ചടി ആഴത്തിൽ വിലയിരുത്തി വീഴ്ച മറികടക്കുമെന്ന് സിപിഎം കേന്ദ്ര കമ്മിറ്റി. കേരളത്തിലുൾപ്പടെ പാർട്ടിക്കേറ്റ തിരിച്ചടി നിരാശാജനകമെന്നും ദില്ലിയിൽ നടന്ന കേന്ദ്ര കമ്മിറ്റി യോഗത്തിനു ശേഷം സിപിഎം വാർത്താക്കുറിപ്പിൽ അറിയിച്ചു. കേരളത്തിലെ അടക്കം തോൽവിയുടെ കാരണം എന്തെന്ന വിലയിരുത്തൽ ഇല്ലാതെയാണ് വാർത്താക്കുറിപ്പ് ഇറക്കിയത്. സിപിഎം ജനറൽ സെക്രട്ടറി സീതാറാം യെച്ചൂരി ഇന്ന് പതിവ് വാർത്താ സമ്മേളനവും ഒഴിവാക്കി.

സംസ്ഥാനങ്ങളിലെ പാർട്ടിയുടെ ദൗർബല്യവും കുറവുകളും കേന്ദ്ര കമ്മിറ്റി ചൂണ്ടിക്കാട്ടി. ഇത് പരിഹരിക്കാനായുള്ള സംഘടനാ നടപടികൾക്ക് രൂപം നൽകിയെന്നും സംസ്ഥാന ഘടകങ്ങൾ ഇത് നടപ്പാക്കുമെന്നും സിപിഎം വ്യക്തമാക്കി.  സമുദായ സംഘടനകളുടെ നിലപാടിന് പ്രാധാന്യം നൽകി കേരള ഘടകം തയ്യാറാക്കിയ റിപ്പോർട്ട് കേന്ദ്ര നേതൃത്വം നിരാകരിച്ചു. തെറ്റുതിരുത്തലിന് കേന്ദ്ര നേതൃത്വം നേരിട്ട് മേൽനോട്ടം വഹിക്കുമെന്നാണ് സൂചന. 

ഏഷ്യാനെറ്റ് ന്യൂസ്