ഹരിയാനയിലെ സോനിപത്ത് സ്വദേശിയായ പൊലീസ് കോണ്‍സ്റ്റബിളിന് വടക്ക് കിഴക്കന്‍ ദില്ലിയിലായിരുന്നു ഡ്യൂട്ടി
ദില്ലി: ദില്ലിയില്‍ അനാരോഗ്യത്തെത്തുടര്‍ന്ന് ഡ്യൂട്ടിയിലുണ്ടായിരുന്ന പൊലീസ് കോണ്‍സ്റ്റബിള്‍ മരിച്ചു. ഇയാളുടെ കൊവിഡ് 19 പരിശോധനാഫലം ലഭിക്കാനായി കാത്തിരിക്കുകയാണെന്ന് പൊലീസ് വ്യക്തമാക്കി.
ഹരിയാനയിലെ സോനിപത്ത് സ്വദേശിയായ 31 കാരനായ കോണ്‍സ്റ്റബിളിന് വടക്ക് കിഴക്കന്‍ ദില്ലിയിലായിരുന്നു ഡ്യൂട്ടി. ചൊവ്വാഴ്ചയാണ് അദ്ദേഹത്തിന് പെട്ടന്ന് അസ്വസ്ഥത അനുഭവപ്പെട്ടത്. ഉടന്‍ തന്നെ ആശുപത്രിയില്‍ എത്തിച്ചു. രാം മനോഹര്‍ ലോഹ്യാ ആശുപത്രിയില്‍ വച്ചാണ് പൊലീസ് ഓഫീസര്‍ മരിച്ചത്.
പൊലീസ് ഓഫീസറുടെ സാമ്പിളുകള്‍ പരിശോധനയ്ക്കയച്ചിരുന്നു. ഇതിന്‍റെ ഫലം ലഭിക്കാനായി കാത്തിരിക്കുകയാണെന്ന് പൊലീസ് വ്യക്തമാക്കി. ഇദ്ദേഹവുമായി സമ്പര്‍ക്കത്തിലുണ്ടായിരുന്ന പൊലീസ് ഓഫീസര്‍മാര്‍ ഇപ്പോള്‍ വീട്ടില്‍ നിരീക്ഷണത്തിലാണ്.