ചികിത്സാ ചെലവ് താങ്ങാനായില്ല, അമിതമായി ഓക്സിജൻ ശ്വസിച്ച് യുവാവ് ഹോട്ടൽമുറിയിൽ ജീവനൊടുക്കി

അമിതമായി ഓക്സിജൻ എടുക്കുമ്പോൾ ഹൃദയമിടിപ്പ് മന്ദഗതിയിലാക്കി അപകടകരമാംവിധം താഴ്ന്ന നിലയിലായി മരണ കാരണമാകുമെന്ന് വിദ​ഗ്ധർ പറയുന്നു.

ദില്ലി: ചികിത്സാ ചെലവ് താങ്ങാനാകാത്തതിനാൽ ഹോട്ടലിൽ മുറിയെടുത്ത് ഓക്സിജൻ സിലിണ്ടറിൽ നിന്ന്  അമിതമായി ഓക്സിജൻ ശ്വസിച്ച് യുവാവ് ആത്മഹത്യ ചെയ്തായി പൊലീസ്. 24കാരനായ നിതേഷ് എന്ന യുവാവിന്റെ മൃതദേഹമാണ് ഹോട്ടലിൽ നിന്ന് കണ്ടെത്തിയത്. രോ​ഗിയായ യുവാവ്,  ചികിത്സാ ചെലവിൽ ആശങ്കപ്പെട്ടിരുന്നെന്നും ഇതാണ് ആത്മഹത്യ ചെയ്യാനുള്ള കാരണമായി എഴുതിവെച്ചതെന്നും പൊലീസ് വ്യക്തമാക്കി.

ചൊവ്വാഴ്ച നോർത്ത് ദില്ലയിലെ ആദർശ് നഗറിൽ ഹോട്ടൽ മുറിയെടുത്ത നിതേഷ് ബാഗുമായാണ് മുറിയിലേക്ക് പോയത്. ഓക്സിജൻ സിലിണ്ടറും ട്യൂബുമായിരുന്നു ബാ​ഗിൽ. പ്ലാസ്റ്റിക് കവറുകൊണ്ട് മുഖം മറച്ച നിലയിലാണ് ഇയാളെ മരിച്ച നിലയിൽ കണ്ടെത്തിയത്. പ്ലാസ്റ്റിക് ബാഗിൽ നിന്ന് ഒരു ചെറിയ ഓക്സിജൻ സിലിണ്ടറുമായി ബന്ധിപ്പിച്ച ട്യൂബ് കണ്ടെടുത്തു. അമിതമായി ഓക്സിജൻ എടുക്കുമ്പോൾ ഹൃദയമിടിപ്പ് മന്ദഗതിയിലാക്കി അപകടകരമാംവിധം താഴ്ന്ന നിലയിലായി മരണ കാരണമാകുമെന്ന് വിദ​ഗ്ധർ പറയുന്നു.

പൊലീസ് കണ്ടെടുത്ത ആത്മഹത്യാ കുറിപ്പിൽ നിതേഷ് തന്റെ ദീർഘനാളത്തെ അസുഖം വിഷമിക്കുന്നുണ്ടെന്നും ചികിത്സാ ചെലവ് താങ്ങാനാകുന്നില്ലെന്നും സൂചിപ്പിച്ചിരുന്നു. തന്റെ ചികിത്സക്കായി മാതാപിതാക്കൾ കൂടുതൽ പണം ചെലവഴിക്കാൻ ആഗ്രഹിക്കാത്തതിനാൽ ജീവിതം അവസാനിപ്പിക്കാൻ വേദനയില്ലാത്ത മാർ​ഗത്തിനായി ഓൺലൈനിൽ തിരഞ്ഞു. അങ്ങനെയാണ് ഓക്സിജൻ സിലിണ്ടർ രീതി ഇയാൾ കണ്ടെത്തിയതെന്നും പൊലീസ് പറഞ്ഞു. ഫോൺ പരിശോധിച്ചപ്പോൾ ഇതുമായി ബന്ധപ്പെട്ട നിരവധി വീഡിയോകൾ ‌യുവാവ് കണ്ടതായി പൊലീസ് അറിയിച്ചു.