ആർഎസ്എസിന് മാറാൻ കഴിയുമോ, സംഘടനയ്ക്ക് സ്ത്രീമേധാവി ഉണ്ടാകുമോ? മോഹൻ ഭ​ഗവതിനോട് ദി​ഗ്വിജയ് സിം​ഗിന്റെ ചോദ്യങ്ങൾ

സ്ത്രീകളെ തുല്യരായി പരിഗണിക്കണമെന്നും വീടിനുള്ളില്‍ അടച്ചിടരുതെന്നും  മോഹന്‍ ഭഗവത് തന്റെ പ്രസംഗത്തില്‍  പറഞ്ഞിരുന്നു . നാ​ഗ്പൂരിൽ നടന്ന ആർഎസ്എസ് ദസറ റാലിയിലായിരുന്നു മോഹൻ ഭ​ഗവതിന്റെ പ്രസ്താവന. ആർഎസ്എസ് മാറുകയാണോയെന്നും സംഘടന അതിന്റെ അടിസ്ഥാന  തത്വങ്ങളില്‍ നിന്ന് വ്യതിചലിച്ചു തുടങ്ങിയോ എന്നും ദിഗ്വിവിജയ് സിം​ഗ് ചോദിച്ചു.  

ദില്ലി: ആർഎസ്എസിന് മാറാൻ കഴിയുമോയെന്ന് വെല്ലുവിളിച്ച് മുതിർന്ന കോൺ​ഗ്രസ് നേതാവ് ദി​ഗ്വിജയ് സിം​ഗ്. ആർഎസ്എസ് അധ്യക്ഷൻ മോഹൻ ഭ​ഗവത് ദസറ ദിനത്തിൽ സ്ത്രീകളെ അനുകൂലിച്ച് നടത്തിയ പ്രസം​ഗത്തിന് പിന്നാലെയാണ് ട്വീറ്റുകളിലൂടെ ചോദ്യങ്ങൾ ഉയർത്തി ദി​ഗ്വിജയ് സിം​ഗ് രം​ഗത്തെത്തിയത്. ആര്‍എസ്എസ് ഒരു സ്ത്രീയെ സംഘടനയുടെ മേധാവിയായി നിയമിക്കുമോയെന്നതാണ് പ്രധാന ചോദ്യം. 

സ്ത്രീകളെ തുല്യരായി പരിഗണിക്കണമെന്നും വീടിനുള്ളില്‍ അടച്ചിടരുതെന്നും  മോഹന്‍ ഭഗവത് തന്റെ പ്രസംഗത്തില്‍  പറഞ്ഞിരുന്നു . നാ​ഗ്പൂരിൽ നടന്ന ആർഎസ്എസ് ദസറ റാലിയിലായിരുന്നു മോഹൻ ഭ​ഗവതിന്റെ പ്രസ്താവന. ആർഎസ്എസ് മാറുകയാണോയെന്നും സംഘടന അതിന്റെ അടിസ്ഥാന  തത്വങ്ങളില്‍ നിന്ന് വ്യതിചലിച്ചു തുടങ്ങിയോ എന്നും ദിഗ്വിവിജയ് സിം​ഗ് ചോദിച്ചു.  ആർഎസ്എസ് മാറ്റത്തിന്റെ പാതയിലാണോ? ചീറ്റപ്പുലിക്ക് അതിന്റെ ദേഹത്തെ പുള്ളികൾ മാറ്റാൻ കഴിയുമോ? ആർഎസ്എസിന്റെ സ്വഭാവം മാറ്റുന്ന കാര്യം അവർ ആലോചിക്കുന്നുണ്ടെങ്കിൽ എനിക്ക് ചിലത് ചോദിക്കാനുണ്ട്. ഇങ്ങനെ പറഞ്ഞാണ് ദി​ഗ്വിജയ് സിം​ഗ് ചോദ്യങ്ങൾ ചോദിക്കുന്നത്. 

 ഹിന്ദു രാഷ്ട്രം എന്ന അജണ്ട ആർഎസ്എസ് ഉപേക്ഷിക്കുമോ? ഒരു സ്ത്രീയെ സര്‍സംഘചാലക് ആയി നിയമിക്കുമോ? അടുത്ത സര്‍സംഘചാലക് കൊങ്കണസ്ത /ചിറ്റ്പാവന്‍ /ബ്രാഹ്‌മണനല്ലാത്ത ആളായിരിക്കുമോ?  സ്ഥിരമായി ആര്‍.എസ്.എസ്. അംഗത്വം ഉണ്ടാകുമോ? അംഗത്വം ന്യൂനപക്ഷങ്ങള്‍ക്ക് തുറന്നുകൊടുക്കുമോ? എന്നിങ്ങനെയാണ് ദി​ഗ്വിജയ് സിം​ഗിന്റെ ചോദ്യങ്ങൾ. 

തന്റെ എല്ലാ ചോദ്യങ്ങള്‍ക്കും സംശയങ്ങള്‍ക്കുമുള്ള ഉത്തരം ശരിയായി നല്‍കിയാല്‍ തനിക്ക് ആര്‍എസ്എസുമായി ഒരു പ്രശ്‌നവുമില്ല. അങ്ങനെ ചെയ്യാന്‍ കഴിയുമെങ്കില്‍ താൻ മോഹൻ ഭ​ഗവതിന്റെ ആരാധകനാകുമെന്നും ദിഗ്വിവിജയ് സിം​ഗ് ട്വീറ്റില്‍ പറയുന്നു. 

നാഗ്പൂരിലെ ആർഎസ്എസ് ആസ്ഥാനത്ത് വിജയദശമി ആഘോഷ പരിപാടികൾക്ക് ഇക്കുറി ഒരു വനിതയായിരുന്നു മുഖ്യാതിഥി. എവറസ്റ്റ് ആദ്യമായി കീഴടക്കിയ വനിത സന്തോഷ് യാദവായിരുന്നു മുഖ്യാതിഥി. ചരിത്രത്തിൽ ആദ്യമായിട്ടാണ് ഒരു വനിത ചടങ്ങിൽ മുഖ്യാതിഥി ആയി എത്തുന്നത്. 1992- 1993 വർഷങ്ങളിൽ രണ്ട് തവണയാണ് സന്തോഷ് യാദവ് എവറസ്റ്റ് കീഴടക്കിയത്. ഹരിയാന സ്വദേശിയാണ് സന്തോഷ് യാദവ്. സ്ത്രീ ശാക്തീകരണം ഇല്ലാതെ സമൂഹത്തിന് പുരോഗതി ഉണ്ടാകില്ലെന്ന് മോഹൻ ഭഗവത് പറഞ്ഞു. ജെൻഡർ ഇക്വാലിറ്റി അതിപ്രധാനമാണെന്നും അദ്ദേഹം കൂട്ടിച്ചേര്‍ത്തിരുന്നു.