കൊവിഡ് 19; ഐസോലേഷനിൽ കഴിയാൻ വിസമ്മതിച്ച് ​മുൻമന്ത്രി; രാഷ്ട്രീയ പകപോക്കലെന്ന് ആരോപണം

രാഷ്ട്രീയപ്രവർത്തകനായ ഒരാൾ ക്വാറന്റൈനിലാണെന്ന് ​ഗോവ ആരോ​ഗ്യമന്ത്രി വിശ്വജിത് റാണ വെളിപ്പെടുത്തിയിരുന്നു. എന്നാൽ അദ്ദേഹത്തിന്റെ സ്വകാര്യതയെ മാനിച്ച് പേര് വെളിപ്പെടുത്താൻ ആരോ​ഗ്യമന്ത്രി തയ്യാറായില്ല. 

​ഗോവ: കോറോണ ഭീതി വ്യാപകമാകുന്ന പശ്ചാത്തലത്തിലും ഐസോലേഷനിൽ കഴിയാൻ വിസമ്മതിച്ച് ഗോവ മുൻ ​ മന്ത്രി ഫ്രാൻസിസ്കോ മിക്കി പച്ചെക്കോ. സംസ്ഥാന ആരോ​ഗ്യവകുപ്പ് നൽകിയ നിർദ്ദേശങ്ങൾ രാഷ്ട്രീയ പ്രേരിതമാണ് എന്നായിരുന്നു മുൻമന്ത്രിയുടെ ആരോപണം. ഐസോലേഷനിൽ കഴിയാൻ വിസമ്മതിച്ച മന്ത്രി രാഷ്ട്രീയ കുടിപ്പക എന്നാണ് ആരോ​ഗ്യവകുപ്പിന്റെ നിർദ്ദേശങ്ങളെ വിശേഷിപ്പിച്ചത്. ​ഗോവ ടൂറിസം മുൻമന്ത്രിയാണ് ഫ്രാൻസിസ്കോ മിക്കി പച്ചെക്കോ. ദുബായ്-ബാം​ഗ്ലൂർ വിമാനത്തിൽ യാത്ര ചെയ്ത വ്യക്തിയാണ് ഇദ്ദേഹം. ഈ വിമാനത്തിൽ യാത്ര ചെയ്ത 43 യാത്രക്കാരിൽ 63 കാരനായ ഒരാൾക്ക് കൊവിഡ് 19 സ്ഥിരീകരിച്ചിരുന്നു. അതിനെ തുടർന്ന് ബാക്കി യാത്രക്കാരെ ക്വാറന്റൈനിലാക്കാൻ ആരോ​ഗ്യവകുപ്പ് തീരുമാനിക്കുകയായിരുന്നു.

ഞാൻ ക്വാറന്റൈനിലാകാൻ തയ്യാറല്ല. കാരണം അതിന്റെ ആവശ്യമില്ല. ബിജെപിക്കെതിരെ പ്രചരണം നടത്തുന്നതിനാൽ എന്നോട് രാഷ്ട്രീയ കുടിപ്പക തീർക്കുകയാണ്. മിക്കി പച്ചെക്കോ ആരോപിച്ചു. രാഷ്ട്രീയപ്രവർത്തകനായ ഒരാൾ ക്വാറന്റൈനിലാണെന്ന് ​ഗോവ ആരോ​ഗ്യമന്ത്രി വിശ്വജിത് റാണ വെളിപ്പെടുത്തിയിരുന്നു. എന്നാൽ അദ്ദേഹത്തിന്റെ സ്വകാര്യതയെ മാനിച്ച് പേര് വെളിപ്പെടുത്താൻ ആരോ​ഗ്യമന്ത്രി തയ്യാറായില്ല. താൻ വിമാനത്തിൽ യാത്ര ചെയ്തിരുന്നതായി പച്ചെക്കോ സമ്മതിച്ചിട്ടുണ്ട്. എന്നാൽ കൊവിഡ് 19 സ്ഥിരീകരിച്ച യാത്രക്കാരന്റെ അടുത്തായിരുന്നില്ല താൻ ഇരുന്നത് എന്നാണ് പച്ചെക്കോയുടെ അവകാശ വാദം. ആരോ​ഗ്യവകുപ്പിൽ നിന്നുളള ഉദ്യോ​ഗസ്ഥർ പച്ചെക്കോയുടെ വീട്ടിലെത്തിയെങ്കിലും അവരുടെ നിർദ്ദേശങ്ങൾ കൈക്കൊള്ളാതെ മടക്കി അയക്കുകയാണ് ചെയ്തത്.