പശ്ചിമേഷ്യ പുകയുന്നതിനിടെ നിർണായക നീക്കവുമായി ഇന്ത്യയും ഫ്രാൻസും; സൈന്യങ്ങൾ തമ്മിൽ തന്ത്രപ്രധാന ചർച്ച നടത്തി

മാർച്ച് 9, 10 തീയതികളിലായിരുന്നു ഇന്ത്യൻ കരസേനയും ഫ്രഞ്ച് കരസേനയും തമ്മിൽ നിർണായകമായ ചർച്ച നടന്നത്. ദീർഘദൂര ആക്രമണ ശേഷിയെക്കുറിച്ചായിരുന്നു പ്രധാന ചർച്ച. . 

ദില്ലി: വിദഗ്ധതല ചർച്ച നടത്തി ഇന്ത്യൻ കരസേനയും ഫ്രഞ്ച് കരസേനയും. മാർച്ച് 9, 10 തീയതികളിലായിരുന്നു ചർച്ച നടന്നത്. സൈനിക സഹകരണം മെച്ചപ്പെടുത്തുന്നതിനും ആധുനിക യുദ്ധമുറകളെക്കുറിച്ച് പരസ്പരം മനസ്സിലാക്കുന്നതിനും വേണ്ടിയായിരുന്നു ഈ കൂടിക്കാഴ്ച. ഇന്നത്തെ യുദ്ധ സാഹചര്യങ്ങളിൽ ഏറ്റവും പ്രധാനപ്പെട്ട രണ്ട് കാര്യങ്ങളാണ് ഈ ചർച്ചയിൽ വിഷയമായത്. ദീർഘദൂര ലക്ഷ്യങ്ങളെ ആക്രമിക്കാനുള്ള ശേഷിയും കൃത്യതയോടെ ലക്ഷ്യം ഭേദിക്കാൻ കഴിയുന്ന ആയുധ സംവിധാനങ്ങളും എങ്ങനെ ഉപയോഗിക്കാം എന്നതിലായിരുന്നു പ്രധാന ഊന്നൽ.

‘വിഷയ വിദഗ്ദ്ധരുടെ കൈമാറ്റം ഇന്ത്യൻ ആർമിയും ഫ്രഞ്ച് ആർമിയും തമ്മിൽ 2026 മാർച്ച് 09, 10 തീയതികളിൽ നടന്നു. ആധുനിക യുദ്ധത്തിൽ ലോംഗ് റേഞ്ച് വെക്‌ടേഴ്‌സ് (LRVs), പ്രിസിഷൻ ഗൈഡഡ് മ്യൂണിഷൻസ് (PGMs) എന്നിവയുടെ ഉപയോഗത്തിലായിരുന്നു ശ്രദ്ധ കേന്ദ്രീകരിച്ചത്. ഇരു സൈന്യങ്ങളിലെയും പ്രതിനിധികൾ പ്രവർത്തനപരമായ ഉപയോഗം, സൈദ്ധാന്തിക വികാസങ്ങൾ, പ്രിസിഷൻ ഫയറുകളിലെയും ഡീപ്-സ്ട്രൈക്ക് കഴിവുകളിലെയും ആഗോള പ്രവണതകൾ എന്നിവയെക്കുറിച്ചുള്ള കാഴ്ചപ്പാടുകൾ കൈമാറി. ഇത് സൈനിക പഠനത്തിനും ആഴത്തിലുള്ള പ്രതിരോധ സഹകരണത്തിനും സഹായകമായി.’ ഇന്ത്യൻ കരസേനയുടെ അഡീഷണൽ ഡയറക്ടറേറ്റ് ജനറൽ ഓഫ് പബ്ലിക് ഇൻഫർമേഷൻ എക്‌സിൽ കുറിച്ചു. 

ആധുനിക സൈനിക നീക്കങ്ങളിൽ കൃത്യതയോടെ ആക്രമണം നടത്താനുള്ള കഴിവ് എത്രത്തോളം പ്രധാനമാണെന്ന് ഈ ചർച്ചയിൽ ഇരുവിഭാഗവും വിലയിരുത്തി. കുറഞ്ഞ നാശനഷ്ടങ്ങളുണ്ടാക്കി തന്ത്രപ്രധാനമായ ലക്ഷ്യങ്ങൾ തകർക്കാൻ സഹായിക്കുന്ന ലോംഗ് റേഞ്ച് വെക്‌ടേഴ്‌സും പ്രിസിഷൻ ഗൈഡഡ് മ്യൂണിഷൻസും ഇന്നത്തെ കാലത്ത് അത്യാവശ്യമാണ്. ഈ സംവിധാനങ്ങളുടെ ഉപയോഗം, പുതിയ സാങ്കേതികവിദ്യകൾ, യുദ്ധതന്ത്രങ്ങളിലെ മാറ്റങ്ങൾ എന്നിവയെല്ലാം ഇരു രാജ്യങ്ങളിലെയും സൈനിക വിദഗ്ധർ ചർച്ച ചെയ്തു.

പങ്കാളിത്തമുള്ള സൈന്യങ്ങൾക്കിടയിൽ പരസ്പര ധാരണ വർദ്ധിപ്പിക്കാനും ആവശ്യമുള്ളിടത്ത് ഒരുമിച്ച് പ്രവർത്തിക്കാനുള്ള കഴിവ് മെച്ചപ്പെടുത്താനും ഇത്തരം വിദഗ്ദ്ധ ചർച്ചകൾ സഹായിക്കും. പ്രതിരോധ ആസൂത്രണത്തെ സ്വാധീനിക്കുന്ന ആഗോള സൈനിക പ്രവണതകൾ, സാങ്കേതിക കണ്ടുപിടുത്തങ്ങൾ, തന്ത്രപരമായ ചിന്തകൾ എന്നിവയെക്കുറിച്ച് അറിവ് നേടാനും ഇത് ഇരുപക്ഷത്തെയും സഹായിക്കുന്നു.

ഇതിനിടെ, മാലിദ്വീപിലെ ഇന്ത്യൻ ഹൈക്കമ്മീഷണർ ജി. ബാലസുബ്രഹ്മണ്യൻ കരസേനാ മേധാവി ജനറൽ ഉപേന്ദ്ര ദ്വിവേദിയുമായി കൂടിക്കാഴ്ച നടത്തി. ഇന്ത്യ-മാലിദ്വീപ് തന്ത്രപരമായ പങ്കാളിത്തം കൂടുതൽ ശക്തമാക്കുന്നതിനുള്ള വഴികളാണ് ഇരുവരും ചർച്ച ചെയ്തത്. മാറിക്കൊണ്ടിരിക്കുന്ന പ്രാദേശിക സുരക്ഷാ സാഹചര്യങ്ങൾക്കിടയിൽ ഉഭയകക്ഷി സഹകരണം മെച്ചപ്പെടുത്തുന്നതിലായിരുന്നു കൂടിക്കാഴ്ചയുടെ പ്രധാന ശ്രദ്ധ. ഇന്ത്യൻ മഹാസമുദ്ര മേഖലയിലെ നിലവിലെ സുരക്ഷാ സ്ഥിതിഗതികൾ ഇരുവരും വിലയിരുത്തി. മേഖലയിൽ സ്ഥിരതയും സുരക്ഷയും സഹകരണവും നിലനിർത്തുന്നതിന് ഇന്ത്യയും മാലിദ്വീപും തമ്മിലുള്ള നിരന്തരമായ ഇടപെടൽ പ്രധാനമാണെന്നും ചർച്ചയിൽ വിലയിരുത്തി.