'ഇന്ത്യയിലെ 'ജെൻസി'ക്ക് ബിജെപിയിൽ വിശ്വാസം': ബിഎംസി വിജയം ഉയർത്തിക്കാട്ടി ബംഗാളിൽ പ്രധാനമന്ത്രിയുടെ പ്രസംഗം

ഇന്ത്യയുടെ രാഷ്ട്രീയ ദിശ നിശ്ചയിക്കുന്നത് ഇനി യുവാക്കളാണെന്നും അവർ ഇന്ന് ബിജെപിയുടെ വികസന രാഷ്ട്രീയത്തിനൊപ്പമാണെന്നും പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ മാൾഡയിൽ നടന്ന ബഹുജന റാലിയെ അഭിസംബോധന ചെയ്യുകയായിരുന്നു അദ്ദേഹം.

മാൾഡ: ഇന്ത്യയിലെ പുതിയ തലമുറ ബിജെപിയുടെ വികസന മാതൃകയിൽ പൂർണ്ണ വിശ്വാസമർപ്പിച്ചിരിക്കുകയാണെന്ന് പ്രധാനമന്ത്രി നരേന്ദ്ര മോദി. പശ്ചിമ ബംഗാളിലെ മാൾഡയിൽ നടന്ന തെരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം. മുംബൈ മുനിസിപ്പൽ കോർപ്പറേഷൻ (BMC) തെരഞ്ഞെടുപ്പിൽ ബിജെപി നേടിയ ഉജ്ജ്വല വിജയം ഇതിന് തെളിവാണെന്നും അദ്ദേഹം കൂട്ടിച്ചേർത്തു..ബംഗാളിലെ വരാനിരിക്കുന്ന നിയമസഭാ തെരഞ്ഞെടുപ്പിന് മുന്നോടിയായി ബിജെപിയുടെ പ്രചാരണത്തിന് ശക്തി പകരുന്നതായിരുന്നു അദ്ദേഹത്തിന്റെ വാക്കുകൾ.

ചരിത്രത്തിലാദ്യമായി മുംബൈ കോർപ്പറേഷനിൽ ബിജെപി നേടിയ വിജയം രാജ്യത്തെ രാഷ്ട്രീയ മാറ്റത്തിന്റെ വലിയ സൂചനയാണെന്ന് മോദി ചൂണ്ടിക്കാട്ടി. യുവാക്കൾ ഇന്ന് വികസനത്തിനും രാഷ്ട്രീയ സ്ഥിരതയ്ക്കുമാണ് വോട്ട് ചെയ്യുന്നത്. ബിഎംസി തെരഞ്ഞെടുപ്പ് ഫലം ഇതിന് തെളിവാണ്. ഇതേ വികസന കാംക്ഷ ബംഗാളിലെ യുവാക്കളിലും താൻ കാണുന്നുണ്ടെന്ന് അദ്ദേഹം പറഞ്ഞു. പ്രസംഗത്തിനിടെ ബിജെപിക്ക് വലിയ മുന്നേറ്റം ലഭിച്ച തിരുവനന്തപുരം കോർപ്പറേഷനിലെ ഫലങ്ങളെയും അദ്ദേഹം പരാമർശിച്ചു.

മമതാ ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസ് സർക്കാരിനെതിരെ രൂക്ഷമായ വിമർശനമാണ് പ്രധാനമന്ത്രി ഉന്നയിച്ചത്. കേന്ദ്ര സർക്കാർ നടപ്പിലാക്കുന്ന ആയുഷ്മാൻ ഭാരത് ഉൾപ്പെടെയുള്ള ജനക്ഷേമ പദ്ധതികൾ ബംഗാളിലെ ജനങ്ങൾക്ക് ലഭ്യമാക്കാതെ തൃണമൂൽ സർക്കാർ തടയുകയാണെന്ന് അദ്ദേഹം ആരോപിച്ചു. അഴിമതിയും ഗുണ്ടായിസവും വികസന മുരടിപ്പുമാണ് ബംഗാളിലെ ഇന്നത്തെ അവസ്ഥയെന്നും, 'മാ മതി മാനുഷ്' എന്ന് പറയുന്നവർ സാധാരണക്കാരുടെ ശത്രുക്കളായി മാറിയെന്നും മോദി കുറ്റപ്പെടുത്തി.

മാൾഡയിലെ റാലിക്ക് മുന്നോടിയായി രാജ്യത്തെ ആദ്യത്തെ വന്ദേ ഭാരത് സ്ലീപ്പർ ട്രെയിൻ (ഹൗറ - ഗുവാഹത്തി) അദ്ദേഹം ഫ്ലാഗ് ഓഫ് ചെയ്തിരുന്നു. 3,000 കോടിയിലധികം രൂപയുടെ റെയിൽ-റോഡ് വികസന പദ്ധതികൾ അദ്ദേഹം സംസ്ഥാനത്തിന് സമർപ്പിച്ചു. "പൽത്താനോ ദോർക്കാർ, ചായ് ബിജെപി സർക്കാർ" (മാറ്റം അനിവാര്യമാണ്, ബിജെപി സർക്കാർ വേണം) എന്ന മുദ്രാവാക്യമുയർത്തിയ അദ്ദേഹം, 2047-ഓടെ വികസിത ഇന്ത്യയെന്ന ലക്ഷ്യം കൈവരിക്കാൻ കിഴക്കൻ ഇന്ത്യയുടെ വികസനം അനിവാര്യമാണെന്നും ഓർമ്മിപ്പിച്ചു. ബംഗാളിലെ ജനങ്ങൾ ഈ മാറ്റത്തിനായി തയ്യാറെടുക്കണമെന്ന ആഹ്വാനത്തോടെയാണ് അദ്ദേഹം പ്രസംഗം അവസാനിപ്പിച്ചത്.